ԿԸՀ նախագահ. Հոսանքազրկումը որևէ կերպ չի կարող ազդել ո՛չ քվեարկության արդյունքների, ո՛չ էլ դրանց ամփոփման գործընթացի վրա

Արմինֆո. Հոսանքազրկումը որևէ կերպ չի կարող ազդել ո՛չ քվեարկության արդյունքների, ո՛չ էլ դրանց ամփոփման գործընթացի վրա: Հունիսի 7-ին կայացած մամուլի ասուլիսի ժամանակ նման հայտարարությամբ հանդես եկավ Կենտրոնական ընտրական հանձնաժողովի (ԿԸՀ) նախագահ Վահագն Հովակիմյանը:

Միևնույն ժամանակ նա նշեց, որ յուրաքանչյուր ընտրատեղամասի տրամադրվել է երկուական հատուկ LED լամպ, որոնք ընդունակ են լուսավորություն ապահովել 10 ժամվա ընթացքում:

Բացի այդ, ԿԸՀ ղեկավարն ընդգծեց, որ ընտրատեղամասերում օգտագործվող սարքերի լիարժեք աշխատանքի համար էլեկտրամատակարարում չի պահանջվում, քանի որ դրանք աշխատում են մարտկոցներով: Նրա խոսքով՝ ինքնավար սնուցմամբ են գործում նաև տեղամասերում տեղադրված տեսախցիկները, որոնք իրական ժամանակի ռեժիմով հեռարձակում են կատարվողը։

«Նույնիսկ եթե էլեկտրաէներգիայի անջատման պատճառով մենք պատկերը չտեսնենք, ձայնագրությունը միևնույն է հասանելի կլինի: Այսինքն՝ ցանկացած դեպքում ամեն ինչ ձայնագրվելու է, և այս կամ այն տեղամասում խախտման վերաբերյալ ազդանշան ստանալու կամ որևէ խնդիր առաջանալու դեպքում մենք կկարողանանք ամբողջությամբ վերարտադրել իրադարձությունները և հասկանալ, թե հատկապես ինչ է տեղի ունեցել», - ասաց Հովակիմյանը:

Հիշեցնենք, որ ընտրական իրավունք ունեցող Հայաստանի 2.503.976 քաղաքացիներից քվեարկությանը մասնակցել է 1.476.597 մարդ: Այսպիսով, մասնակցությունը կազմել է 58,97%:

Նշենք նաև, որ հունիսի 7-ի վաղ առավոտից դիտորդները, հանձնաժողովների անդամները, զանգվածային լրատվամիջոցների ներկայացուցիչները արձանագրում են ընտրական գործընթացի բազմաթիվ խախտումներ: Բացի այդ, այսօր վթարային անջատումներ են գրանցվել Երևանի տասնյակ հասցեներում, ինչպես նաև Զովունի, Եղվարդ, Արտիմետ, Առինջ գյուղերում և Գյումրի քաղաքում: Սա առաջին դեպքը չէ, երբ երկրում ընտրությունների անցկացման օրը հանկարծակի լույսերն անջատվում են։ Այսպես, 2021 թվականի հունիսին կայացած խորհրդարանական արտահերթ ընտրությունների ժամանակ նույնպես ժամը 20:00-ին՝ ընտրատեղամասերի փակվելուց հետո, կես երկիրը հոսանքազրկվել էր: