«Ուժեղ Հայաստան». Սամվել Կարապետյանի ծրագրերը թույլ կտան վերջ դնել ծայրահեղ աղքատությանը երկրում

Արմինֆո. «Ուժեղ Հայաստան» դաշինքի առաջնորդ Սամվել Կարապետյանի հեղափոխական ծրագրերը թույլ կտան վերջ դնել երկրում ծայրահեղ աղքատությանը և լուծել մի խնդիր, որը տասնամյակներ շարունակ չի լուծվել։ Այս մասին Facebook-ի իր էջում գրել է «Ուժեղ Հայաստան» կուսակցության մամուլի քարտուղար Մարիաննա Քաղրամանյանը։

Նրա խոսքով՝ հունիսի 4-ին կայացած նախընտրական բանավեճի ժամանակ հնչած քաղաքական հարցերի և մեկ մարդու (նկատի ունի վարչապետ Նիկոլ Փաշինյանին - խմբ.) բարձրացրած աղմուկի ֆոնին աննկատ է մնացել չափազանց կարևոր մի տեղեկատվություն. Սամվել Կարապետյանը Հայաստանում անապահով ընտանիքների համար էլեկտրաէներգիան և ջուրը կդարձնի անվճար։ Քաղրամանյանը պարզաբանել է, որ բնակչության սոցիալապես անապահով խմբի աջակցության այս նախաձեռնությունն իրականացվելու է «Աղքատության հաղթահարում» պետական հիմնադրամի շրջանակներում։

«Հիշեցնեմ, որ նույն հիմնադրամի միջոցների հաշվին ծայրահեղ աղքատության մեջ գտնվող ընտանիքները ամսական 150,000 դրամի չափով օգնություն կստանան։ Այս հեղափոխական ծրագրերը թույլ կտան Հայաստանի հաջորդ վարչապետ Սամվել Կարապետյանին վերջ դնել մեր երկրում ծայրահեղ աղքատությանը և լուծել մի խնդիր, որը տասնամյակներ շարունակ չի լուծվել»,- հայտարարել է քաղաքական ուժի մամուլի քարտուղարը։

Այս կապակցությամբ նա հիշեցրել է, որ այսօր Հայաստանում 660 հազար մարդ ապրում է աղքատության մեջ, որոնցից մոտ 200 հազարը երեխաներ են, իսկ շուրջ 30 հազար մարդ գտնվում է ծայրահեղ աղքատության եզրին։ Քաղրամանյանը վստահեցրել է, որ այս խնդիրները հաջողվելու է լուծել հենց իրենց քաղաքական ուժի ծրագրերի շնորհիվ։ «Այս ծրագրերը թույլ կտան կարճ ժամկետներում վերացնել ծայրահեղ աղքատությունը Հայաստանում, իսկ աղքատության հաղթահարումը, ինչպես նշել է Սամվել Կարապետյանը, կդառնա իր պատվի հարցը։ Ուժեղ Հայաստանում չի լինի «հացի» խնդիր ունեցող մարդ։ Հայաստանը լինելու է ուժեղ»,- ամփոփել է Քաղրամանյանը։

Հավելենք, որ «Ուժեղ Հայաստան» դաշինքի անդամ Արամ Վարդևանյանը հայտարարել էր, որ 2021 թվականին Հայաստանի աղքատ բնակչության ցուցանիշը կազմում էր 27%։ Այնինչ, կառավարող «Քաղաքացիական պայմանագիր» կուսակցության նախընտրական խոստումների համաձայն, այդ ցուցանիշը պետք է կրկնակի նվազեր։ Մինչդեռ, նրա խոսքով, ինչպես վկայում են վերջին պաշտոնական տվյալները, աղքատության մակարդակը երկրում կազմում է շուրջ 22%, իսկ ծայրահեղ աղքատության վիճակում է գտնվում մոտ 30 հազար մարդ։