Հայաստանում հարցվածների շուրջ 50%-ը պատրաստ է փողոց դուրս գալ, եթե խորհրդարանական ընտրությունները կեղծվեն

Արմինֆո.Հայաստանում հարցվածների շուրջ 50%-ը պատրաստ է փողոց դուրս գալ, եթե խորհրդարանական ընտրությունները կեղծվեն։ Այս մասին են վկայում «MPG» խորհրդատվական ընկերության «Ոչ ճիշտ կապույտ» հարցման տվյալները։

Այն հարցին, թե պատրաստ են արդյոք փողոց դուրս գալ, եթե երկրում հունիսի 7-ին նախատեսված ընտրությունները կեղծվեն, հարցվածների 38,9%-ը հայտարարել է՝ միանշանակ այո, ևս 10,4%-ը՝ ավելի շուտ այո, 9,7%-ը՝ ավելի շուտ ոչ, 35,7%-ը՝ միանշանակ ոչ, 5,3%-ը դժվարացել է պատասխանել։ Հետաքրքիր է, որ ընթացիկ տարվա մայիսին նրանց թիվը, ովքեր միանշանակ պատրաստ էին փողոց դուրս գալ, կազմում էր 40,5%, 10,8%-ն այդ ժամանակ ասում էր՝ ավելի շուտ այո, 8,2%-ը՝ ավելի շուտ ոչ, 34,7%-ը՝ միանշանակ ոչ, 5,9%-ը դժվարացել էր պատասխանել։ Հատկանշական է, որ ապրիլյան հարցման ժամանակ նրանք, ովքեր միանշանակ փողոց դուրս կգային, ավելի քիչ էին՝ ընդամենը 36,6%, իսկ նրանք, ովքեր դուրս չէին գա, ավելի շատ՝ 39,1%։

Միևնույն ժամանակ, համաձայն հարցման, հարցվածների 29,2%-ը համոզված է, որ Հայաստանում ընտրությունները կլինեն արդար, ևս 25,4%-ը նշել է՝ ավելի շուտ արդար, 17,7%-ը՝ ավելի շուտ կեղծված, 16%-ը հայտարարել է, որ միանշանակ կեղծված կլինեն, ևս 11,8%-ը դժվարացել է պատասխանել։

Հարցման համաձայն՝ հարցվածների 91,7%-ը կարողացել է անսխալ նշել ընտրությունների ամսաթիվը։ Մայիսին այդպիսիք կազմում էին 84,4%։ Սխալ են նշել 3,8%-ը, ևս 4,5%-ը հայտարարել է, որ չգիտի ընտրությունների ամսաթիվը։

Այն հարցին, թե որ քաղաքական ուժի նախընտրական քարոզչությունն եք տեսել կամ հանդիպել, հարցվածների 62%-ը նշել է Նիկոլ Փաշինյանի կառավարող «Քաղաքացիական պայմանագիր» ուժը, 45,9%-ը նշել է Սամվել Կարապետյանի «Ուժեղ Հայաստան» դաշինքը, 32,5%-ը՝ երկրորդ նախագահ Ռոբերտ Քոչարյանի «Հայաստան» դաշինքը, 28,2%-ը՝ Գագիկ Ծառուկյանի «Բարգավաճ Հայաստան» կուսակցությունը, 13,7%-ը՝ նախկին օմբուդսմեն Արման Թաթոյանի «Միասնության թևեր» կուսակցությունը, 12,5%-ը նշել է Արամ Սարգսյանի «Հանրապետություն» կուսակցությունը, 12,4%-ը՝ Հայկ Մարությանի «Նոր ուժը», 12%-ը՝ «Բոլորին դեմ», 11,1%-ը՝ Էդմոն Մարուքյանի «Լուսավոր Հայաստան» կուսակցությունը։ Մնացած քաղաքական ուժերի ցուցանիշները տատանվում են 10,2%-ից մինչև 8,2%-ի սահմաններում։ Այլ պատասխան է տվել 0,5%-ը, ևս 24,7%-ը հայտարարել է, որ չի հանդիպել։

Նշենք, որ հարցումն իրականացվել է սույն թվականի հունիսի 2-3-ն ընկած ժամանակահատվածում Հայաստանի Հանրապետության բնակիչների շրջանում հեռախոսազանգերի միջոցով, ընտրանքի ծավալը կազմել է 1104 մարդ, ընտրանքի սխալը՝ +/- 3%:

2011 թվականին «MPG»-ն դարձել է «Gallup International Association»-ի պաշտոնական ներկայացուցիչը Հայաստանում, որն աշխարհում հասարակական կարծիքի ուսումնասիրման ամենահեղինակավոր և անկախ կազմակերպություններից է։ 2003 թվականից ի վեր «MPG»-ն, աշխատելով սոցիոլոգիական և մարքեթինգային հետազոտությունների շուկայում, իրականացրել է տարբեր մասշտաբների ավելի քան 800 նախագիծ։