Օվերչուկը Հայաստանին կոչ է արել կողմնորոշվել, թե «ինչ մուրաբա է եփելու»

Արմինֆո. Հայաստանին անհրաժեշտ է կողմնորոշվել Եվրասիական տնտեսական միության (ԵԱՏՄ) և ԵՄ-ի միջև, այլապես նա չի հասկանա, թե «ինչ մուրաբա է եփելու», համոզված է ՌԴ փոխվարչապետ Ալեքսեյ Օվերչուկը։

«Եթե, դիցուք, Հայաստանը գնում է դեպի Եվրոպական միություն, նշանակում է՝ այնտեղ առաջանում են նոր ստանդարտներ, նոր տեխնիկական կանոնակարգեր, որոնք չեն համապատասխանում մերոնց։ Պարզ օրինակ՝ դուք ցանկանում եք կազմակերպել մուրաբայի արտադրություն։ Ձեզ անհրաժեշտ է ինչ-որ սարքավորում գնել։ Դուք այդ սարքավորումը գնելու եք եվրոպակա՞ն ստանդարտներով, թե՞ եվրասիական ստանդարտներով»,- Պետերբուրգի միջազգային տնտեսական համաժողովի (ՊՄՏՀ) շրջանակներում ՏԱՍՍ-ին տված հարցազրույցում օրինակ է բերել Օվերչուկը։

«Եվ ահա, քանի դեռ դուք չեք ունենա այս բացարձակապես պարզ ու ակնհայտ հարցի պատասխանը, դուք չեք կարողանա կողմնորոշվել, թե ինչ մուրաբա եք պատրաստելու, ինչ փաթեթավորմամբ, ինչպիսին է լինելու այդ ապրանքի նկարագրությունը, ինչպիսի պահանջներ են լինելու, ինչ լեզուներով։ Այդ ամենը պետք է հասկանալ»,- պարզաբանել է փոխվարչապետը։

Նա մատնանշել է, որ «եթե Հայաստանը գնում է դեպի Եվրոպական միություն, ապա նա պետք է կողմնորոշվի և ընտրություն կատարի, թե որտեղ լինի»։ «Այս կապակցությամբ հայտարարությունը, որն ընդունվել է ԵԱՏՄ չորս առաջնորդների կողմից Աստանայում կայացած վերջին Բարձրագույն եվրասիական տնտեսական խորհրդում, միանգամայն հստակ առաջարկում է հայկական ղեկավարությանը մտածել հնարավորինս արագ հանրաքվե անցկացնելու մասին»,- հիշեցրել է Օվերչուկը։

Նրա կարծիքով՝ դա բոլորի շահերից կբխեր, քանի որ այսօր ստեղծված անորոշ կարգավիճակը անորոշություն է առաջացնում, առաջին հերթին՝ ներդրողների համար։ «Անորոշությունը վնասում է բոլորին, այդ թվում՝ հենց Հայաստանին։ Ուստի ԵԱՏՄ առաջնորդները խնդրել են հնարավորության դեպքում որքան հնարավոր է շուտ կողմնորոշվել»,- նշել է ռուս փոխվարչապետը։

Մայիսի 9-ին Ռուսաստանի նախագահ Վլադիմիր Պուտինը լրագրողների հետ զրույցում առաջարկել էր Հայաստանին որքան հնարավոր է շուտ կողմնորոշվել ԵՄ-ին և ԵԱՏՄ-ին անդամակցության հարցում՝ նշելով, որ պատրաստ են անհրաժեշտության դեպքում «քաղաքակիրթ ամուսնալուծություն սկսել»։ Երևանում ի պատասխան նշել են, որ կլքեն ԵԱՏՄ-ն, երբ հարկ համարեն։ Իսկ արդեն մայիսի 29-ին ԵԱՏՄ 5 երկրներից 4-ի ղեկավարները բանաձև են ընդունել, որով Հայաստանին հանձնարարում (խորհուրդ) են տալիս հանրաքվե անցկացնել ԵԱՏՄ-ում երկրի հետագա գտնվելու հարցով։ Նույն օրը ՌԴ նախագահը հայտարարել է, որ Հայաստանը չի կարողանա նստել երկու աթոռի վրա, և նրան պետք է որքան հնարավոր է շուտ կողմնորոշվել ընտրության հարցում։

Նշենք, որ Հայաստանի կառավարությունը 2025 թվականի հունվարի 9-ին հավանություն է տվել Եվրոպական միությանը անդամակցելու գործընթացը սկսելու մասին օրենքի նախագծին, որն առաջարկվել էր «Եվրաքվե» քաղաքացիական նախաձեռնության կողմից։ Նախագիծն ուղարկվել էր Հայաստանի խորհրդարան՝ հաստատման։ Մարտի 26-ին երկրի խորհրդարանը վերջնական ընթերցմամբ ընդունել է այն և ուղարկել նախագահի ստորագրմանը։ Փաստաթուղթը ստորագրվել է նույն թվականի ապրիլի 4-ին։ Մոսկվայում հայտարարել են, որ Ռուսաստանը Հայաստանին է հասցրել այն միտքը, որ Եվրասիական տնտեսական միությանն ու Եվրոպական միությանը միաժամանակյա անդամակցությունն անհնար է: