Արցախցի փաստաբան. Հայաստանի դատարանը բավարարել է արցախցու հայցը՝ Միգրացիայի և քաղաքացիության ծառայությանը պարտավորեցնելով  նրան ներառել ընտրացուցակներում

Արմինֆո.  Հայաստանի դատարանը բավարարել է արցախցի Մարատ Եգանյանի հայցը՝ ՀՀ ՆԳՆ միգրացիայի և քաղաքացիության ծառայությանը պարտավորեցնելով նրան ներառել ընտրական ցուցակներում: Այդ մասին Facebook-ի էջում հրապարակված տեսանյութում հաղորդել է արցախցի փաստաբան Ռոման Երիցյանը։

Ինչպես հիշեցրել է փաստաբանը, ՀՀ կառավարության 2023 թվականի որոշմամբ արցախցիներին տրվել է ժամանակավոր պաշտպանության կարգավիճակ, իսկ համաձայն Կոնվենցիայի (փախստականների կարգավիճակի մասին - խմբ.) և օրենքի ուժով փախստական կարող է համարվել միայն այն անձը, ով տվյալ երկրի քաղաքացիություն չունի կամ օտարերկրյա քաղաքացի է: "Այդ առնչությամբ համարվում էր, որ արցախցիները Հայաստանի քաղաքացիներ չեն։ Դրա ֆոնին Հայաստանի ներքին գործերի նախարարության Միգրացիայի եւ քաղաքացիության ծառայությունը հանդես է եկել նույն դիրքորոշմամբ, ինչի պատճառով արցախցիները չեն ընդգրկվել ընտրական ցուցակներում", - հիշեցրել է Երիցյանը ։

Փաստաբանը, սակայն, հաղորդել է, որ ավելի վաղ իր ծանոթ, Արցախի բնակիչ Մարատ Եգանյանը հայտնել էր, որ դիմել է դատարան, և վերջինս բավարարել է իր հայցը և պարտավորեցրել ՀՀ ներքին գործերի նախարարության Միգրացիայի և քաղաքացիության ծառայությանը ըստ հաշվառման վայրի իրեն ընդգրկել ընտրելու իրավունք ունեցող անձանց ցուցակում: «Դատարանը, մասնավորապես, նշել է, որ արդեն քաղաքացի համարվող անձը չի կարող Կառավարության որոշմամբ դադարել այդպիսին լինել։ Ստացվում է, որ մենք ունենք դատարանի որոշում, որով նա պասիվ ընտրական իրավունք է տվել 070 կոդով անձնագիր ունեցող արցախցիներին։ Դա մեծ հաջողություն է", - ընդգծել է Երիցյանը։

Փաստաբանն ուշադրություն է հրավիրել այն հանգամանքին, որ թեև այդ եզակի դեպքը երաշխիք չէ, որ բոլոր դատավորները դիմեն նման ռիսկի և բավարարեն արցախցիների հայցը, սակայն, չնայած դրան, կոչ է արել արցախցիներին փորձել պաշտպանել իրենց իրավունքը: "Սա լավ հնարավորություն է Հայաստանի խորհրդարանական ընտրություններին մասնակցելու և մեր իրավունքն իրացնելու համար։ Եվ եթե դատարանը արցախցիներին համարում է Հայաստանի քաղաքացի, ապա դա նշանակում է, որ նրանք  պետք է օժտված լինեն նաեւ այլ իրավունքներով, այդ թվում՝ պետական պաշտոններ զբաղեցնելու իրավունքով, և՝ ոչ միայն", - ուշադրություն է հրավիրել Երիցյանը։

Արցախցի փաստաբանը խոստովանել է, որ ոչ բոլոր դատարանները կդիմեն նման ռիսկի և, ամենայն հավանականությամբ, որոշ հայցեր կմերժվեն։ "Բայց եթե նրանք բավարարեն հայցերի գոնե 30-40 տոկոսը, ապա դա կարող է մեծ ազդեցություն ունենալ խորհրդարանական ընտրությունների ելքի վրա", - ընդգծել է փաստաբանը:

Այդ առնչությամբ նա իր էջում նաև փուլ առ փուլ պատմել է, թե ինչ պետք է անեն արցախցիները, ովքեր ցանկանում են մասնակցել խորհրդարանական ընտրություններին: Առաջին հերթին, ինչպես նշել է փաստաբանը, անհրաժեշտ է գրավոր դիմում ներկայացնել Հայաստանի Ներքին գործերի նախարարության Միգրացիայի եւ քաղաքացիության ծառայություն՝ իրենց ընտրացուցակներում ներառելու պահանջով: Այն դեպքում, երբ պատասխանը հատուկ ձգձգվում է, փաստաբանը կոչ է արել անմիջապես բողոքել Կենտրոնական ընտրական հանձնաժողով (ԿԸՀ) և Մարդու իրավունքների պաշտպանին:

"Եթե մերժում է եկել, ապա անհրաժեշտ է 3 օրվա ընթացքում, անգամ ընտրությունների օրը, հայց ներկայացնել գրանցման վայրի դատարան։ Որպես հիմք նշել ՀՀ քաղաքացու անձնագրի առկայությունը, նկատելով, որ քաղաքացիությունը պաշտոնապես չի դադարեցվել: Նաև նշել, որ 2026 թվականի մայիսին նույն գործերով արդեն եղել են 3 դատական որոշումներ ՝ հօգուտ հայցվորների։ Դատարանը պարտավոր է արագ քննել գործը, որպեսզի անձը հասցնի քվեարկել։ Դատարանի վճիռը վերջնական է և ուժի մեջ է մտնում հրապարակումից անմիջապես հետո: Դատարանի որոշումից հետո պետք է շտապ նորից դիմել ՆԳՆ Միգրացիայի եւ քաղաքացիության ծառայություն և պահանջել, որպեսզի նեերառեն ընտրողների ցուցակում", - եզրափակել է Երիցյանը:

Հիշեցնենք, որ Հայաստանում խորհրդարանական ընտրությունները նախատեսված են 2026 թվականի հունիսի 7-ին։