Արման Թաթոյանը դիմել է Մարկո Ռուբիոյին. TRIPP նախագծի հաջող իրականացումը հնարավոր է Հայաստանի տարածքից ադրբեջանական ԶՈՒ-ի դուրսբերման և Բաքվից հայերի վերադարձի պայմանով

Արմինֆո. «Թրամփի երթուղի» (TRIPP) նախագծի հաջող իրականացման համար անհրաժեշտ է, որ Ադրբեջանը դուրս բերի իր զինված ուժերը (ԶՈՒ) Հայաստանի ինքնիշխան տարածքից և ազատ արձակի ապօրինի պահվող հայ ռազմագերիներին։ Այսպիսի հրապարակային դիմումով ԱՄՆ պետքարտուղար Մարկո Ռուբիոյին է դիմել «Միասնության թևեր» կուսակցության վարչապետի թեկնածու Արման Թաթոյանը՝ ամերիկացի պաշտոնյայի՝ այսօր Երևան սպասվող այցի կապակցությամբ։

«Ցանկանում եմ շնորհավորել Ձեզ Հայաստանի և ԱՄՆ-ի միջև «Թրամփի երթուղու» (TRIPP) վերաբերյալ համաձայնագրի սպասվող ստորագրման կապակցությամբ։ Ես լիովին աջակցում եմ TRIPP-ի վերաբերյալ համաձայնագրին և ապագայում, որպես Հայաստանի վարչապետ, պատրաստ եմ սերտորեն համագործակցել Ձեր վարչակազմի հետ՝ դրա ամբողջական և արդյունավետ կատարման ուղղությամբ»,- ասված է Թաթոյանի՝ Facebook-ի իր էջում հրապարակված բաց նամակում, որն ուղղված է Ռուբիոյին։

Այնուամենայնիվ, նախքան այդ, կուսակցության առաջնորդը Ռուբիոյին կոչ է արել ուշադրություն դարձնել Հայաստանի քաղաքացիների համար նշանակություն ունեցող մի շարք կարևոր հարցերի վրա։ «ԱՄՆ նախագահ Դոնալդ Թրամփը ԱՄՆ 46-րդ նախագահ Ջո Բայդենին անվանել է «տխուր, թույլ և հիմար», ես նույն խոսքերը վերագրում եմ Հայաստանի վարչապետ Նիկոլ Փաշինյանին, ով չափազանց «տխուր է, թույլ և հիմար»՝ Ձեզ հետ հանդիպմանը այս կարևոր հարցերը բարձրացնելու համար։ Իրականությունն այն է, որ TRIPP նախագծի հաջող իրականացման համար անհրաժեշտ է, որ Ադրբեջանը դուրս բերի իր ԶՈՒ-ն Հայաստանի ինքնիշխան տարածքից և ազատ արձակի ապօրինի պահվող հայ ռազմագերիներին։ Վստահ եմ, որ Ձեզ հետ համատեղ աշխատանքը թույլ կտա երկարաժամկետ խաղաղություն հաստատել մեր տարածրջանում»,- ամփոփել է քաղաքական գործիչը։

Հիշեցնենք, որ մայիսի 26-ին ԱՄՆ պետքարտուղար Մարկո Ռուբիոն կժամանի Հայաստան։ Այցի շրջանակներում տեղի կունենա արտաքին գործերի նախարար Արարատ Միրզոյանի և Մարկո Ռուբիոյի հանդիպումը, որից հետո նախարարները հանդես կգան մամուլի համար հայտարարությամբ։

Նշենք, որ մինչ օրս հայտնի չէ ադրբեջանական բանտերում պահվող հայ ռազմագերիների և պատանդների ստույգ թիվը։ Փորձագետների գնահատականներով՝ նրանք մի քանի հարյուրն են։ Այսօր Ադրբեջանի իշխանությունները հաստատում են իրենց մոտ 19 հայերի առկայությունը։ Ադրբեջանական գերության մեջ գտնվողների թվում են նաև Արցախի ռազմաքաղաքական ղեկավարության 8 նախկին և գործող ներկայացուցիչներ։ Նրանք են՝ Արցախի նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, արտաքին գործերի նախկին նախարար Դավիթ Բաբայանը, ինչպես նաև խորհրդարանի խոսնակ Դավիթ Իշխանյանը, Արցախի Պաշտպանության բանակի նախկին հրամանատար, գեներալ Լևոն Մնացականյանը, գեներալ Դավիթ Մանուկյանը և նախկին պետնախարար Ռուբեն Վարդանյանը։

Բաքվի խամաճիկային դատարանը հորինված մեղադրանքներով փետրվարին Արայիկ Հարությունյանին, Դավիթ Բաբայանին, Դավիթ Իշխանյանին, Դավիթ Մանուկյանին, Լևոն Մնացականյանին դատապարտել է ցմահ ազատազրկման, իսկ Բակո Սահակյանին, Արկադի Ղուկասյանին և Ռուբեն Վարդանյանին՝ 20 տարվա ազատազրկման։ Մնացած արցախցիներին այսպես կոչված դատարանը դատապարտել է մինչև 15 տարվա ազատազրկման։