Կարապետյան․ Հայաստանում խաղաղության ապահովման բանաձևը կլինի ուժեղ դիվանագիտությունը

Արմինֆո. Հայաստանում խաղաղության ապահովման բանաձևը կլինի ուժեղ դիվանագիտության առկայությունը երկրում։ Այդ մասին մայիսի 22-ին Երեւանում կայացած մամուլի ասուլիսում հայտարարել է "Ուժեղ Հայաստան" դաշինքի առաջնորդ Սամվել Կարապետյանը, անդրադառնալով հարցին,  թե որն է իրենց քաղաքական ուժի խաղաղության բանաձեւը։

 Ընդ որում, նա պարզաբանել է, թե կոնկրետ ինչ են մտադիր անել խաղաղության հաստատման համար ։ Առաջին հերթին, ըստ Կարապետյանի, պետք է վերականգնել հարաբերությունները Հայաստանի դաշնակիցների հետ։ "Բացի այդ, մենք մտադիր ենք ուժեղացնել մեր հարաբերություններն այլ գերտերությունների հետ։ Ես արդեն ասել եմ, որ երկիրն այլ ընտրություն չունի։ Մենք պետք է վստահելի հարաբերություններ ունենանք (մեր դաշնակիցների հետ-խմբ.)", - հայտարարել Է դաշինքի առաջնորդը։

Մինչդեռ, ինչպես նշել է Կարապետյանը, Հայաստանի գործող ղեկավարությունը իշխանությունը պահելու համար ամենօրյա ինտրիգների մեջ է եւ թռչկոտում է տարբեր կողմերի միջեւ, միաժամանակ երկիր է ներմուծում ադրբեջանական նարատիվները: "Ուժեղ Հայաստան" դաշինքի առաջնորդը զգուշացրել է, որ դա հղի է երկրի համար նոր փորձություններով: "Եվ ես վստահ եմ, որ շատ շուտով մենք դա կտեսնենք։ Իսկ մենք մտադիր ենք ստեղծել ժամանակակից բանակ և այնտեղ ապահովել ծառայության արժանապատիվ պայմաններ։ Բոլոր զինծառայողները կստանան աշխատավարձ։ Մենք այնպես կանենք, որ բանակում ծառայելը հպարտության առիթ դառնա, այլ ոչ թե՝ պատճառ, որ մարդիկ հեռանան երկրից", - ընդգծել է Կարապետյանը։

Խոսելով այն մասին, թե ինչ է նշանակում ճիշտ դիվանագիտություն, "Ուժեղ Հայաստան" դաշինքի առաջնորդը պարզաբանել է, որ խաղաղություն չի կարող լինել առանց երաշխավորների: Ընդ որում, նա նշել է, որ այն երկրները, որոնք կդառնան խաղաղության երաշխավորներ, վկայի կարգավիճակ չեն ունենա։ Նրա խոսքով՝ նրանց հետ կկնքվեն պայմանագրեր, որոնց շրջանակներում տվյալ պետությունները պարտավոր կլինեն երաշխավորել խաղաղությունը Հայաստանում։ "Մենք լավ ենք հասկանում, թե որ երկրները կարող են հանդես գալ որպես երաշխավոր, սակայն այս պահին չհնչեցնենք, թե կոնկրետ որ պետությունների մասին է խոսքը։ Դրանք կլինեն տարածաշրջանային առանցքային պետությունները։ Բայց եթե, օրինակ, ԱՄՆ-ն էլ ցանկանա երաշխավոր դառնալ, ապա մենք ուրախ կլինենք։ Եթե ԵՄ-ն էլ ցանկանա դառնալ մեր խաղաղության երաշխավորը, նույնպես լավ է։ Ամենակարեւորն այն է, որ այդ երաշխավորները լինեն", - պարզաբանել է դաշինքի առաջնորդը։

Նա ուշադրություն է հրավիրել այն հանգամանքի վրա, որ այսօր երկրի իշխանություններն արդեն հանձնել են տարածքների մի մասը և հայտարարել խաղաղության հաստատման մասին։ Սակայն, ինչպես նշել է Կարապետյանը, վաղը կարող է պարզվել, որ պետք է նոր տարածքներ հանձնել, որպեսզի այդ խաղաղությունը պահպանվի, օրինակ ՝ Սյունիքը և ոչ միայն։ "Իսկ մենք էլ մտադիր ենք շատ արագ դուրս գալ այս նվաստացած վիճակից։ Մի կարծեք, թե դրա համար տարիներ են պետք: Ոչ, դա շատ արագ կարվի: Համոզված եմ, որ մենք կարող ենք դա անել: Ինձ ասում են, որ ես փորձ չունեմ, բայց դա սխալ կարծիք է, ես ունեմ: Ես գիտեմ, թե ինչպես կառուցել հարաբերություններ այնպես, որ քեզ վստահեն", - հավաստիացրել է Կարապետյանը։ Ամփոփելով ՝ նա հարց է տվեց, թե էլ ինչ պետք է տեղի ունենա, որպեսզի բոլորը հասկանան, որ այսօր հայ ժողովուրդը կանգնած է պետության կորստի շեմին:

Հունվարի 14-ին Հայաստանի ԱԳՆ-ը հրապարակել է Վաշինգտոնում սստոորագրված «Թրամփի ուղի՝ հանուն միջազգային խաղաղության և բարգավաճման» (ԹՐԻՓՓ) նախագծի` Հայաստան-ԱՄՆ իրականացման շրջանակի հրապարակման վերաբերյալ համատեղ հայտարարությունը։ 12 էջանոց փաստաթղթում ներկայացված են նախագծի հիմնական նպատակները և դրա գործունեության մեխանիզմները։ Մասնավորապես, ընդգծվում է, որ Հայաստանը մտադիր է թույլատրել և աջակցել ԹՐԻՓՓ զարգացման ընկերության հիմնմանը։ «Ակնկալվում է, որ ընկերությունը պատասխանատու կլինի ԹՐԻՓՓ-ի զարգացման համար՝ 49 տարի նախնական ժամկետով նրան տրամադրվող կառուցապատման իրավունքով։ Հայաստանը մտադիր է ԱՄՆ-ին առաջարկել ԹՐԻՓՓ զարգացման ընկերության 74% մասնաբաժինը և պահպանել 26% մասնաբաժինը։ Ակնկալվում է, որ այս համագործակցությունը կերկարաձգվի ևս 50 տարով՝ Հայաստանի կառավարությանը հավելյալ սեփականության տրամադրմամբ նրա մասնաբաժինը դարձնելով 49%։ Ակնկալվում է, որ ԹՐԻՓՓ զարգացման ընկերության բաժնետերերի փոփոխությունը (ներառյալ մասնաբաժինների վաճառք, նվիրատվություն, միավորում, անջատում, վերակազմակերպում կամ որևէ այլ իրավական կամ փաստացի գործողություն) և վերջնական շահույթի սեփականատերերի փոփոխությունը ենթակա կլինի Հայաստանի և ԱՄՆ կառավարությունների հետ նախօրոք համաձայնեցմանը», - ասվում է փաստաթղթում։

Հիշեցնենք, որ 2025 թվականի օգոստոսի 8-ին Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը Վաշինգտոնում ստորագրել են յոթ կետից բաղկացած համատեղ "Խաղաղության հռչակագիր"։ Այն նախատեսում է համատեղ դիմում Եվրոպայի անվտանգության եւ համագործակցության կազմակերպությանը (ԵԱՀԿ) ԵԱՀԿ Մինսկի գործընթացի եւ դրա հետ կապված կառույցների դադարեցման մասին, ինչպես նաեւ Հայաստանի տարածքով տրանսպորտային միջանցքի ստեղծում, որը կկապի Ադրբեջանն իր նախիջեւանյան էքսկլավի հետ, որը շրջապատված է Հայաստանով, Թուրքիայով եւ Իրանով: