ԵԽ Հայաստանի իշխանություններին հորդորում է միջոցներ ձեռնարկել փողերի լվացման դեմ արդյունավետ պայքարի նպատակով

Եվրախորհրդի փորձագետներն էական թերություններ են հայտնաբերել Հայաստանում փողերի լվացմանն անչվող   հետաքննություններում: Այդ մասին հաղորդվում է կազմակերպության պաշտոնական կայքում:

«Իշխանությունները պետք է անհապաղ միջոցներ ձեռնարկեն`  ապահովելու համար, որ իրավապահների ջանքերը լիովին համապատասխանեն փողերի լվացման ռիսկերին, որոնք առկա են այդ երկրում», - համոզված են կազմակերպության փորձագետները։

Ընդ որում  նշվում է, որ ընդհանուր առմամբ, Հայաստանը բավականաչափ առաջընթաց է արձանագրել այդ ուղղությամբ իրավական ամուր բազա ստեղծելու գործում, արդյունավետ են համարվում նաև ֆինանսական համակարգում ձեռնարկվող կանխարգելիչ միջոցները:

«Ահաբեկչության ֆինանսավորումը հայտնաբերելու և կանխարգելելու համար մեխանիզմները բավականին գործուն են: Խաբեությունը, հարկերից խուսափելը, մաքսանենգությունը և յուրացումները փողերի լվացման ամենաբարձր ռիսկերն են։ Հայաստանի տնտեսությունում բանկային համակարգը և անշարժ գույքի շուկան ամենախոցելի ոլորտներն են փողերի լվացման համար։ Ֆինանսական ուսումնասիրությունները շատ արդյունավետ են, սակայն իրավապահները հաճախ արդյունավետ չեն օգտագործում դրանք՝ փողերի լվացումից հանցավոր եկամուտները ապացուցելու, հետևելու, ձերբակալելու և բռնագրավելու համար», - ասվում է Եվրախորհրդի պաշտոնական կայքում զետեղված հաղորդագրությունում։