Ռուսաստանը Հայաստանին ներկայացրել է ՀԿԵ կոնցեսիայի վերաբերյալ բոլոր պարզաբանումները

Արմինֆո. Ռուսաստանը Հայաստանին պարզաբանել է "Հարավկովկասյան երկաթուղու" կոնցեսիայի վերաբերյալ նրան անհանգստացնող բոլոր պահերը։ ՏԱՍՍ-ի հետ հարցազրույցում  այդ մասին հայտարարել է ՌԴ ԱԳՆ ԱՊՀ երկրների չորրորդ դեպարտամենտի տնօրեն Միխայիլ Կալուգինը:

"Այս թեման (ՀԿԵ - ի կոնցեսիան-խմբ. ՏԱՍՍ) մանրամասն քննարկվել է ապրիլի 1-ին Ռուսաստանի եւ Հայաստանի ղեկավարների բանակցություններում։ Պարզաբանումներ են տրվել հայկական կողմին անհանգստացնող բոլոր պահերի վերաբերյալ, ըմբռնում է ձեռք բերվել հետագա աշխատանքի մոդալլության վերաբերյալ, այդ թվում ՝ տարածաշրջանային հաղորդակցությունների ապաշրջափակմանը ռուսական կողմի մասնակցության համատեքստում", - արձանագրել է դիվանագետը։

Նա ընդգծել է, որ Մոսկվայում ֆիքսել են ՀՀ վարչապետ Նիկոլ Փաշինյանի այն հայտարարությունը, թե հանրապետությունում մտադիր չեն կոնցեսիայի հետ կապված հարցերը քննարկել "Ռուսաստանի թիկունքում":

"Չենք կարող համաձայնել այն պնդմանը, որ ռուսական ընկերության կողմից Հայկական երկաթուղիների կառավարումը որեւէ կերպ սահմանափակում է Հայաստանի մրցակցային առավելությունները, ընդհակառակը, համոզված ենք, որ այն ստեղծում է դրանք",- նկատել է Կալուգինը: Նրա կարծիքով, "չէ որ՝ եթե չլիներ ռուսական կոնցեսիայի շրջանակներում երկաթուղային ցանցի ֆունկցիոնալության վերականգնմանը եւ պահպանմանն ուղղված քրտնաջան աշխատանքը, այսօր ավելի դժվար կլիներ խոսել Հարավային Կովկասում տրանսպորտային զարկերակների "վերագործարկմանը" Հայաստանի մասնակցության հեռանկարների մասին":

ՌԴ ԱԳՆ դեպարտամենտի տնօրենը հիշեցրել է, որ "2008 թվականից հայկական երկաթուղիներում ներդրումները կազմել են մոտ 30 մլրդ ռուբլի, բացի այդ, Հայաստանի բյուջե է վճարվել մոտ 15 մլրդ ռուբլի, ներդրված միջոցների մի մասն ուղղվել է շարժակազմի նորացմանը": "Ի դեպ, նոր գնացքներից մեկը՝ Երևան - Գյումրի երթուղու համար, փորձարկել է անմիջապես վարչապետը ՝ Հայաստանի ղեկավարության այլ ներկայացուցիչների հետ", - նշել է Կալուգինը: Նա վստահ է, որ ՀԿԵ-ն շարունակում է մնալ հանրապետության ամենախոշոր գործատուներից մեկը ՝ ապահովելով շուրջ 2,5 հազար աշխատատեղ"։

"Մեր կողմից տեսնում ենք համատեղ փոխշահավետ աշխատանքի մեծ ներուժ, որի գրավականներից մեկը ռուս մասնագետների կողմից հայկական երկաթուղային ցանցի գրագետ կառավարումն է", - նշել Է դիվանագետը:

Նշենք, որ փետրվարի 13-ին ՀՀ վարչապետ Նիկոլ Փաշինյանը լրագրողների հետ զրույցում հայտարարել էր, որ ռուսական կողմից Հայաստանի երկաթուղիների կոնցեսիոն կառավարման փաստը Հայաստանի համար մրցակցային խնդիրներ է ստեղծում, և շատ միջազգային գործընկերներ ցանկանում են շրջանցել հայկական տարածքը ենթակառուցվածքային նախագծեր իրականացնելիս: Այդ առումով նա առաջարկել Էր ՌԴ - ին մտածել երրորդ, բարեկամ երկրին կոնցեսիան վաճառելու մասին։ Որպես օրինակ նա առաջարկել Էր Ղազախստանը, ԱՄԷ - ն կամ Կատարը։

Հիշեցնենք, որ " ՀԿԵ " ՓԲԸ-ն "Ռուսական երկաթուղիներ" ԲԲԸ 100% դուստր ընկերությունն է: 2008 թվականի փետրվարի 13-ին Երևանում "Ռուսական երկաթուղիներ" ԲԲԸ-ի և Հայաստանի Հանրապետության միջև ստորագրվել է կոնցեսիոն պայմանագիր հանրապետության երկաթուղային տրանսպորտի համակարգը "ՀԿԵ" ՓԲԸ կառավարմանը հանձնելու մասին: Պայմանագրի համաձայն, կոնցեսիոն կառավարման ժամկետը 30 տարի է ՝ կողմերի փոխադարձ համաձայնությամբ աշխատանքի առաջին քսան տարիներից հետո ևս 10 տարով երկարաձգելու իրավունքով ։ "ՀԿԵ" ՓԲԸ խնդիրների մեջ են մտնում ՀՀ երկաթուղու ենթակառուցվածքի արդիականացումը, Հայաստանին սահմանակից պետությունների հետ համագործակցության զարգացումը, ներհանրապետական և միջազգային ուղևորափոխադրումների և բեռնափոխադրումների զարգացումը: Ընկերության կողմից իրականացվող ներդրումների չափը կազմում է 572 մլն դոլար: "ՀԿԵ" ՓԲԸ-ն իր գործունեությունը սկսել է 2008թ. հունիսի 1-ից: