Քոչարյան․ Հայաստանի իշխանություններն ամեն ինչ անում են, որպեսզի արցախցիները մեկնեն Հայաստանից

Արմինֆո. Ստեղծվում է այնպիսի տպավորություն, որ այսօր ամեն ինչ արվում է, որպեսզի արցախցիները մեկնեն Հայաստանից ։ Այդ մասին հայտարարել է ՀՀ երկրորդ նախագահ, "Հայաստան" ընդդիմադիր դաշինքի առաջնորդ Ռոբերտ Քոչարյանը՝ Գեղարքունիքի մարզի Դպրաբակ գյուղի բնակիչների հետ հանդիպման ժամանակ։

Դաշինքի առաջնորդի հետ հանդիպման ընթացքում գյուղում ժամանակավորապես բնակվող բռնի տեղահանված արցախցիները ներկայացրել են այն խնդիրները, որոնց բախվում են Հայաստանի իշխանությունների անգործության պայմաններում: Մասնավորապես, նրանք նշել են բնակարանների բացակայության խնդիրը։ Նրանց խոսքով, ժամանակի ընթացքում, հաշվի առնելով տարբեր հանգամանքներ, իրենք ստիպված են փնտրել նոր բնակարան վարձակալության համար, իսկ սեփականը ձեռք բերելու հնարավորություն չկա. Շատերը, նրանց ասելով, կանգնած են փողոցում մնալու վտանգի առաջ։

"Այսօր կան բոլոր հնարավորությունները, որպեսզի 2-3 տարում արցախցիներին ապահովենք բնակարաններով։ Սակայն տպավորություն է ստեղծվում, որ ամեն ինչ արվում է, որպեսզի նրանք Հայաստանից մեկնեն", - այդ առնչությամբ հայտարարել է Քոչարյանը։

"Հայաստան" դաշինքի առաջնորդի խոսքով՝ պետության համար նման հարցերի լուծումն ամենահեշտներից մեկն է։ Նա պարզաբանել է, որ երկրի իշխանությունները պետք է, պարզապես, սոցիալական շինարարություն իրականացնեին, այլ ոչ թե՝ բիզնես վարեին ։ Այդ առնչությամբ նա հիշեցրել է, որ իր նախագահության օրոք վերականգնվել են Գյումրին, Սպիտակը (1988թ.դեկտեմբերի 7 - ի Սպիտակի երկրաշարժից հետո-խմբ.): "Այն ժամանակ պետության հաշվին նոր շենքեր կառուցվեցին, տուժած մարդկանց բնակարաններ տրամադրվեցին։ Այն պայմաններում, երբ մարդը տուն չունի եւ ապրելու տեղ չունի, պետությունն ինքը պետք է նրանց բնակարանով ապահովի", - կարծում է Քոչարյանը ։

Քաղաքական գործչի կարծիքով՝ այն ամենը, ինչ այսօր արվում է Երևանում, ոչ այլ ինչ է, քան բիզնես։ Նա վստահ է, որ ստեղծված իրավիճակում պետությունը պարտավոր է փոխել իր մոտեցումը ։ "Վերջին 8 տարիների ընթացքում Հայաստանում սոցիալական շինարարություն չի իրականացվել։ Եթե պետությունը չի լուծում այդ հարցերը, ուրեմն իր տեղում չէ", - ամփոփել է Քոչարյանը ։

Իսկ Վարդենիս համայնքի բնակիչների հետ հանդիպմանը ՀՀ երկրորդ նախագահն ուշադրություն է հրավիրել սահմանամերձ գյուղերից բնակչության արտահոսքի խնդրի վրա։ Քաղաքական գործիչը համոզմունք է հայտնել, որ Հայաստանի իշխանությունները նպատակաուղղված ամեն ինչ անում են, որպեսզի խթանեն Ադրբեջանի հետ սահմանամերձ գյուղերից բնակչության արտահոսքը՝ փակելով դպրոցները, մանկապարտեզները, հիվանդանոցները, որպեսզի սահմանագծման ժամանակ ավելի հեշտ լինի տարածքը հանձնել թշնամուն: "Մենք պետք է ամեն ինչ անենք, որ մարդիկ չհեռանան իրենց տներից ։ Մենք պետք է աշխատենք, որպեսզի մեր սահմանամերձ գյուղերը բարգավաճեն",- ասել է Քոչարյանը ՝ խոստանալով անել անհրաժեշտ ամեն ինչ՝ երկրում իշխանության գալու դեպքում։

Հիշեցնենք, որ 2023 թվականի սեպտեմբերի 19-ին Ադրբեջանը "հակաահաբեկչական գործողության" պատրվակով լայնածավալ ագրեսիա նախաձեռնեց Արցախի նկատմամբ, որը հանգեցրեց ԼՂՀ լիակատար հայաթափման։ Դրան նախորդել էր հանրապետության գրեթե 10-

ամսյա շրջափակումը։ 2020 թվականի աշնանը սկսված թշնամական ագրեսիայից հետո, որը 2023 թվականի սեպտեմբերին ավարտվեց Արցախի ամբողջական էթնիկ զտմամբ, ավելի քան 150 հազար արցախցիներ զրկվեցին հայրենիքից և դարձան փախստական։

Հավելենք, որ 2026 թվականի հունվարի 9-ի դրությամբ բնակարանային աջակցության պետական ծրագրից օգտվել է Արցախից բռնի տեղահանված 4040 ընտանիք: