Նարեկ Կարապետյան․ Հայաստանը կարող է դառնալ Իրանի և ԱՄՆ շահերի բախման թատերաբեմ

Արմինֆո.Հայաստանը կարող է դառնալ Իրանի և ԱՄՆ-ի շահերի բախման թատերաբեմ։ Այդ մասին Facebook-ի ուղիղ եթերում հայտարարել է "Ուժեղ Հայաստան" կուսակցության քաղխորհրդի անդամ Նարեկ Կարապետյանը, ցույց տալով, թե որտեղ է գտնվում ռազմավարական ճանապարհը, որով պետք է անցնի "Թրամփի ուղին հանուն միջազգային խաղաղության և բարգավաճման" (TRIPP):

Կարապետյանն ուշադրություն է հրավիրել այն փաստի վրա, որ բառացիորեն 40 մետր հեռավորության վրա՝ այն վայրից, որտեղով պետք է անցնի Թրամփի երթուղին, գտնվում են Իրանի զինված ուժերը: "Հիմա պատկերացրեք իրավիճակը. այդ ճանապարհի մի կողմում գտնվելու է մասնավոր ամերիկյան ընկերությունը, իսկ մյուս կողմում ՝ իրանական զինված ուժերը։ Միայն վերջին երկու ամիսների ընթացքում մենք ականատես եղանք, թե ինչպես է Իրանը հարվածել Իրաքում, Դուբայում, Աբու Դաբիում, Կատարում տեղակայված ամերիկյան ռազմակայաններին։ Ինչ եք կարծում, ինչ կլինի ապագայում, եթե նրանց հարաբերությունները վատթարանան, իսկ այստեղ լինի ամերիկյան ընկերությունը", - հարց է հնչեցրել կուսակցության խորհրդի անդամը։

Կարապետյանը համոզմունք է հայտնել, որ դա կարող է վերաճել հակամարտության, և այդ ժամանակ Իրանը մեծ հավանականությամբ թիրախավորելու և հարվածելու է ամերիկյան ընկերությանը: "Ուստի, մենք մեր հայրենակիցներին ասում ենք, որ Հայաստանին պետք է երաշխավորված խաղաղություն, որի շրջանակներում որպես այդ երաշխավոր հանդես գա ոչ միայն ԱՄՆ-ը, այլ, օրինակ, հենց Իրանը։ Այն, որ Հայաստանին խաղաղության մի քանի երաշխավոր է պետք, հասկանալի է նաև այդ ճանապարհի տրամաբանության մեջ", - եզրափակել է "Ուժեղ Հայաստան" կուսակցության խորհրդի անդամը։

Հիշեցնենք, որ "Թրամփի երթուղու" ստեղծման մասին հռչակագիրը Հայաստանի, ԱՄՆ-ի և Ադրբեջանի ղեկավարները ստորագրել են 2025 թվականի օգոստոսի 8-ին Սպիտակ տանը կայացած հանդիպման ժամանակ: 12-էջանոց փաստաթղթում ներկայացված են ծրագրի հիմնական նպատակները և դրա գործունեության մեխանիզմները: Ի թիվս այլ բաների, փաստաթղթում ընդգծվում է, որ Հայաստանը մտադիր է արտոնել եւ աջակցել TRIPP Development Company ընկերության ստեղծմանը: Ընդ որում, ակնկալվում է, որ ընկերությունը պատասխանատու կլինի TRIPP նախագծի զարգացման համար ՝ ստանալով մշակման սկզբնական իրավունքը՝ 49 տարի ժամկետով։ Հայաստանը մտադիր է ԱՄՆ-ին առաջարկել TRIPP Development Company-ի բաժնետոմսերի 74 տոկոսը՝ իրեն պահելով 26 տոկոսը: Ենթադրվում է, որ այդ գործընկերությունը կերկարաձգվի ևս 50 տարով՝ սեփականության լրացուցիչ մասնաբաժնի հատկացմամբ Հայաստանի կառավարությանը, ինչի արդյունքում նրա մասնաբաժինը կկազմի 49 տոկոս: