Հայաստանի ԱԳՆ նախկին ղեկավար․ Փաշինյանն Արցախի քաղաքական միավորի կարգավիճակը պահպանելու պատմական շանս ուներ

Արմինֆո. Հայաստանի վարչապետ Նիկոլ Փաշինյանը Արցախի համար քաղաքական միավորի կարգավիճակը պահպանելու պատմական շանս ուներ, սակայն բաց թողեց այն՝ նախկին ղեկավարների հանդեպ ատելության և ճիշտ ընտրություն կատարելու անկարողության պատճառով:

Հայաստանի նախկին արտգործնախարար Վարդան Օսկանյանը Facebook-ի իր էջում այդպես է արձագանքել Սյունիքում քարոզարշավի ընթացքում Փաշինյանի այն հայտարարություններին, թե "Արցախը երբեք հայկական չի եղել, և Ղարաբաղյան շարժումը ամենամեծ սխալն է եղել"։ "Այնտեղ սարսափելի մտքեր են հնչել, որոնք ես չեմ ուզում վերարտադրել։  Միայն հարց ես տալիս, թե մարդն ինչպես կարող է այդպես նվաստացնել իրեն սեփական ժողովրդի առջև ՝ հանուն "աթոռի",- հայտարարել է Օսկանյանը։

Այս առնչությամբ Հայաստանի նախկին արտգործնախարարը հիշեցրել է, որ 1992 թվականից եղել է Լեռնային Ղարաբաղի հարցով բանակցային խմբում, որը շուտով ինքն է գլխավորել, ինչի կապակցությամբ ներկա է եղել բոլոր հանդիպումներին: Նրա խոսքով՝ այդ ժամանակահատվածում Ադրբեջանը երբեք հավակնություններ չի ունեցել Լեռնային Ղարաբաղի Հանրապետության (ԼՂՀ) տարածքի նկատմամբ որեւէ վերահսկողություն հաստատելու վերաբերյալ: "Նրանք ընդունել են, որ դա հայկական տարածք է. դա բազմիցս ասվել է ԵԱՀԿ Մինսկի խմբի համանախագահների ներկայությամբ բանակցություններում ՝ Ադրբեջանի ղեկավարների կողմից՝ նախկին և ներկա։ Նրանք ընդունում էին, որ Արցախը հայկական է՝ ներառյալ Շուշին", - ընդգծել է Օսկանյանը։

Նրա խոսքով՝ ադրբեջանական կողմը միայն խոչընդոտներ ուներ դե յուրե այդ փաստը հաստատելու համար, քանի որ պնդում էր, որ այդ դեպքում կարող են խնդիրներ ունենալ սահմանադրության հետ: Ինչպես նկատել է Օսկանյանը, նույնիսկ Ադրբեջանի ներկայիս նախագահ Իլհամ Ալիեւը հայտարարել է, որ փակ դռների հետեւում ԵԱՀԿ ՄԽ-ն եւ միջազգային հանրությունն իրեն ստիպում են ճանաչել Արցախի անկախությունը: "Այսինքն ՝ Ադրբեջանն ընդունում էր, որ այդ տարածքը  հայկական է։ 2018-ին Փաշինյանն ուներ բոլոր հնարավորությունները Արցախի հարցը խաղաղ ճանապարհով լուծելու համար. Արցախին քաղաքական միավորի կարգավիճակ տալը հնարավոր կլիներ, եթե Հայաստանի վարչապետը բանակցությունները շարունակեր այն փաստաթղթերի հիման վրա, որոնք այդ պահին գտնվում էին բանակցային սեղանին։ Փաշինյանն այն ժամանակ պատմական շանս ուներ, ավելին, նա միակ ղեկավարն էր, որն ուներ Արցախը պահպանելու բոլոր հնարավորությունները", - ընդգծել է Հայաստանի նախկին արտգործնախարարը։

Սակայն, ինչպես պարզաբանել է Օսկանյանը, այդ հնարավորությունը բաց է թողել Հայաստանի վարչապետը՝ նախկին ղեկավարների նկատմամբ ատելության եւ ճիշտ ընտրություն կատարելու անկարողության պատճառով։ "Եվ, արդյունքում, մենք ունենք այն, ինչ ունենք։ Վերջին ելույթներով Փաշինյանը ոչ այնքան ուզում է ինչ-որ բանում համոզել ուրիշներին, որքան՝ ինքն իրեն, քանի որ հասկանում է, թե ինչ վնաս է հասցրել հայ ժողովրդին։ Այդ ելույթներով նա փորձում է արդարացնել իրեն", - եզրափակել է ՀՀ նախկին արտգործնախարարը։

Հիշեցնենք, որ Սյունիքում քարոզարշավի ժամանակ Փաշինյանը հայտարարել էր, թե Ղարաբաղյան շարժումն ի սկզբանե "ամենամեծ սխալն էր":  "Ասում են՝ մենք հողեր ենք կորցրել։ Բայց ինչպե՞ս էին այդ հողերը մերը։ Խնդրում եմ բացատրեք՝ դրանք մե՞րն էին։ Ես չեմ ուզում զոհվածների թիկունքում խոսել, բայց, այսպես ասենք, դրանք գտնվում էին մի քանի գեներալների վերահսկողության տակ, որոնք, օրինակ, այնտեղ ցորեն էին ցանում, ճի՞շտ է։ Ինչպե՞ս էին դրանք մերը։ Ինչպե՞ս։ Բացատրեք՝ ինչպես էր դա։ Միթե՞ մենք այնտեղ դպրոց ենք կառուցել։ Մանկապարտե՞զ եք կառուցել: Գործարա՞ն։ Միթե՞ մենք այնտեղ ենք ապրել։ Ստեղծել եք բնակավայր: Ինչպե՞ս էին դրանք մերը։ Դրանք մերը չէին", - հայտարարել էր Հայաստանի վարչապետը։