"Բոլորին դեմ եմ"-ն իր նախընտրական քարոզարշավն սկսել է ցեխոտ ակցիայով

Արմինֆո."Բոլորին դեմ եմ" կուսակցությունն իր քարոզարշավն սկսել է ցեխոտ ակցիայով։

Մասնավորապես, նրանք Երևանի կենտրոնում Պաստառ են տեղադրել ՝ 2026 թվականի հունիսի 7-ին Հայաստանի խորհրդարանական ընտրություններին մասնակցող  կուսակցությունների լոգոտիպերով, և սկսել են ցեխ շպրտել պաստառի վրա՝ անցնող քաղաքացիներին  կոչ անելով միանալ իրենց։

Ինչպես լրագրողների հետ զրույցում պարզաբանել է կուսակցության կողմից վարչապետի թեկնածու առաջադրված Նինա Կարապետյանցը, նման ակցիայով իրենք ցանկացել են ընտրողներին ցույց տալ, թե իրենց ինչ են առաջարկում տվյալ քաղաքական ուժերը: "Նրանք կգան մարդկանց մոտ՝ գեղեցիկ հագնված, և կխոսեն մեծ ծրագրերի մասին, բայց խնդիրների բովանդակային քննարկում մենք այդպես էլ չենք տեսնի։ Ընտրություններից հետո նրանք լուրջ դեմքերով ներողություն կխնդրեն, որ չեն կատարել իրենց խոստումը", - վստահ է Կարապետյանցը։

Նա նշել է, որ իրենց ակցիան անլուրջ չի համարում։ Կուսակցության անդամի կարծիքով ՝ իրենք միայն ցուցադրել են այն պատկերը, որն այսօր տիրում է Հայաստանի քաղաքական դաշտում։ Կարապետյանցը կարծում է, որ այսօր Հայաստանում ամենամեծ խնդիրը հասարակության բևեռացումն է։ "Քաղաքացիների մի մասը հստակ գիտի, թե ում օգտին է քվեարկելու, բայց մյուս մասը, պարզապես, չի գնալու ընտրության։ Դա հաստատում են սոցիոլոգիական հարցումները։ Մեր ակցիաներով մենք ուզում ենք ցույց տալ, թե ինչ այլ ընտրություն ունեն մեր քաղաքացիները ։ Սա անլուրջ է թվում, բայց մենք ուշադրություն գրավելու այլ հնարավորություն էլ չունենք. մենք միլիարդներ չունենք, վարչական ռեսուրս չունենք, Հանրային հեռուստատեսությունն օրերով մեզ համար չի աշխատում։ Դրա համար էլ մենք "հայփ" ենք անում (աղմուկ-խմբ․)։ Ի տարբերություն մյուսների, ովքեր լուրջ դեմքերով ընտրողներին ինչ-որ բան են խոստանում, այո, մենք օգտագործում ենք հայփ: Փոխարենը մենք չենք ասում ՝ "Արցախը Հայաստան է և վերջ", իսկ հետո ներողություն ենք խնդրում, որ ոչինչ չի ստացվել", - նշել է կուսակցության վարչապետի թեկնածուն։ Կարապետյանցի կարծիքով ՝ իրենց կուսակցությունը միակն է, որ եկել է կոնկրետ քաղաքական առաջարկով։ "Մենք շատ լուրջ առաջարկ ունենք, որը կարող է հանգեցնել հիմնարար փոփոխությունների ։ Մենք կարծում ենք, որ փոքր կուսակցությունները պետք է հնարավորություն ունենան խորհրդարան անցնելու, և այդ առումով նրանց համար սահմանված 4 տոկոսի շեմը, պարզապես, անհաղթահարելի է", - դժգոհել է Կարապետյանցը։

Նրա խոսքով՝ իրենց կուսակցությունը մտադիր է հնարավորինս շատ ձայներ ստանալ և խորհրդարանում ներկայացնել բոլոր այն մարդկանց դիրքորոշումը, ովքեր դեմ են Հայաստանի բոլոր քաղաքական ուժերին:

Հիշեցնենք, որ 2026 թվականի հունվարի 29-ին "Բոլորին դեմ եմ" շարժումը ներկայացրել էր Հայաստանում քաղաքական դաշտի վերափոխման հայեցակարգ ։ Ինչպես պատմել է շարժման նախաձեռնողներից Արամ Քոչարյանը, իրենց նպատակն է ստեղծել, այսպես կոչված, "ինքնալուծարվող կուսակցություն" ։ Այնուհետև նա ընդգծել է, որ իրենք մտադիր են հաղթել 2026 թվականի հունիսի 7-ի խորհրդարանական ընտրություններում և պաշտոնավարման 100 օրվա ընթացքում իրականացնել երեք առանցքային օրենսդրական փոփոխություն՝ կայուն քաղաքական մեծամասնության վերացում, ընտրական շեմը 4 տոկոսից իջեցնել 1 տոկոսի և քվեաթերթիկում "բոլորին դեմ" սյունակի մուտքագրում, ինչը թույլ կտա քաղաքացիներին արտահայտել իրենց դժգոհությունը ստեղծված քաղաքական իրադրությունից։