Հայաստանն ապացուցեց, որ բարգավաճումը հնարավոր է առանց կայսրությունների միջամտության. Էմանուել Մակրոն

Արմինֆո. Հարավային Կովկասը չպետք է լինի այն կայսրությունների դիմակայության թատերաբեմը, որոնք տարածաշրջանը դիտարկում են որպես ավար եւ միմյանց դեմ են լարում տեղի ժողովուրդներին։ Այդ մասին մայիսի 5-ին հայտարարել է Ֆրանսիայի նախագահ Էմանուել Մակրոնը՝ "Երեւանյան երկխոսություն" համաժողովում  ելույթի ժամանակ։

Նա ընդգծել է, որ տարածաշրջանն ի զորու է վերականգնել իր կենտրոնական դերը Եվրոպայի, Ասիայի և Մերձավոր Արևելքի միջև ՝ իսկապես դառնալով, այսպես կոչված, միջին միջանցքի խաչմերուկ և մաս, ինչը ենթադրում է սահմանների բացում: "Ցանկանում եմ, որ ձեր հարեւանները նույնքան քաջություն ցուցաբերեն, որքան դուք, եւ ուղեկցեն ձեզ խաղաղության, բարգավաճման եւ ժողովրդավարության ճանապարհին", - ասել Է Ֆրանսիայի նախագահը:

Նշելով, որ տարածաշրջանում սահմանները երկար ժամանակ, փաստորեն, հերմետիկ փակ են մնացել, Մակրոնը մեջբերել է թուրքահայ լրագրող Հրանտ Դինքին. "Պետք է կոտրել այն կողպեքները, որոնք մերձավոր ժողովուրդներին դարձնում են հեռավոր հարեւաններ": Ֆրանսիայի նախագահն ընդգծել է, որ Հայաստանի, Թուրքիայի և Ադրբեջանի միջև սահմանները պետք է բաց լինեն, ընդ որում, Վրաստանի հետ սահմանափակումներ չպետք է լինեն:

"Սա մեր համոզմունքն է, եւ այն պետք է նաեւ պարտավորություն դառնա Եվրոպայի եւ Զարգացման ֆրանսիական գործակալության համար, որն ակտիվորեն աշխատում է Հայաստանում ՝ շուրջ 4 մլրդ եվրո ներդնելով տարածաշրջանում", - նշել Է Մակրոնը:

Ողջունելով տարածաշրջանում խաղաղության հաստատմանն ուղղված Հայաստանի ջանքերը՝ նախագահը վստահեցրել է, որ Ֆրանսիան հավատում է Հայաստանին և մտադիր է լինել նրա կողքին:

"Հայաստանն առանցքային հիմք է դրել ողջ տարածաշրջանում խաղաղության համար։ Երկար ժամանակ շատերը կարծում էին, որ նրա ճակատագիրը Ռուսաստանի հովանավորության տակ է գտնվում", - ասել է պետության ղեկավարը: Հիշեցնելով  2020թ․ պատերազմի արդյունքների մասին՝ Մակրոնը նշել է, որ այն իրադարձությունները մեծապես փոխել են իրավիճակի ընկալումը։

Նրա խոսքով ՝ Ռուսաստանը լքել է Հայաստանը։ «Բոլորը սովոր են, որ Ռուսաստանը պետք է հովանավոր լինի տարածաշրջանում, քանզի համարվում էր, որ Հարավային Կովկասը միշտ պետք է գտնվի ինչ-որ մեկի պաշտպանության ներքո: Հայաստանը, սակայն, ապացուցեց, որ գոյություն ունի Ժողովրդավարական ուղի, որը նա որդեգրել է 2018 թվականին։ Խաղաղությւոնը, որը դուք ընտրել եք, իրատեսական է, եւ վերջին երեք տարիներին դուք ցույց եք տվել, որ բարգավաճումը հնարավոր է առանց կայսրությունների միջամտության", - նշել է Ֆրանսիայի նախագահը, համոզմունք հայտնելով, որ Հայաստանն ունի եվրոպական ճակատագիր եւ կոչում: