Սամվել Կարապետյան. Ես Ռուսաստանից Հայաստանին եմ վերադարձրել ռազմավարական ակտիվները, իսկ հիմա էլ ինքս եմ վերադառնում Հայաստան

Արմինֆո.  «Ես Ռուսաստանից Հայաստանին եմ վերադարձրել նրա հիմնական ռազմավարական ակտիվները՝ Էլեկտրական ցանցերը, Հրազդանի ՋԷԿ-ը, Սևան-Հրազդան կասկադը, իսկ հիմա էլ ինքս եմ վերադառնում Հայաստան»,— այսօր մամուլի ասուլիսի ժամանակ հայտարարել է խոշորագույն ընդդիմադիր «Հզոր Հայաստան» կուսակցության ղեկավար, հայտնի գործարար և բարերար Սամվել Կարապետյանը՝ պատասխանելով լրագրողների հարցերին, այդ թվում՝ իշխանությունների այն նարատիվի վերաբերյալ, թե իշխանության գալով նա երկրի ենթակառուցվածքները կհանձնի Ռուսաստանի կառավարմանը։

Ըստ Կարապետյանի՝ ինքը միշտ ասել է, որ յուրաքանչյուրը պետք է զբաղվի իր գործով, և դեռ մի քանի տարի առաջ չէր էլ մտածում քաղաքական գործիչ դառնալու մասին։

«Եթե չլիներ իմ դեմ իրականացվող քրեական հետապնդումը, եթե չլիներ իշխանությունների նման ապօրինությունը մարդկանց նկատմամբ, հարձակումները Հայաստանյայց Առաքելական Սուրբ Եկեղեցու և մեր ազգային ինքնության դեմ, ես քաղաքական գործիչ չէի դառնա, քանի որ ինձ չէի պատկերացնում քաղաքականության մեջ։ Բայց եթե հարցը վերաբերում է մեր Հայաստանի կորստին, ապա բոլոր ամբիցիաները, մեր ցանկությունները մղվում են երկրորդ պլան»,— ասել է Կարապետյանը։ Այդ պատճառով էլ նա որոշում է կայացրել անձամբ մասնակցել այս քաղաքական գործընթացներին. «Ավելի լավ է մեկ անգամ սեփական ձեռքերով անել ճիշտ ու լավ, քան անընդհատ հույս դնել այլ քաղաքական ուժերի վրա»։

Նա կարծիք հայտնեց, որ իշխանությունները չեն կարող վախեցնել իր քաղաքական ուժին բռնաճնշումներով։ «Մենք ամեն օր և ամեն ժամ պայքարում ենք իշխանության ապօրինությունների դեմ, և այդ պատճառով մեր մեջ արդեն իսկ ձևավորվել է դրանց նկատմամբ իմունիտետ. մենք կուրս ենք վերցրել դեպի բացառիկ հաղթանակի հասնելը»,— ասել է «Հզոր Հայաստան»-ի ղեկավարը։

Այս համատեքստում, խոսելով ընդդիմադիր մյուս խոշոր առաջնորդների՝ ի դեմս Ռոբերտ Քոչարյանի և Գագիկ Ծառուկյանի հետ համագործակցության մասին, Կարապետյանը հիշեցրեց նրանց համատեղ հայտարարությունը՝ պատրաստակամության մասին սատարել այն ուժին, որը կհավաքի առավելագույն ձայներ, և վստահություն հայտնեց, որ այդ ուժը լինելու է «Հզոր Հայաստանը»։ Իր նման վստահությունը նա հիմնավորեց ժողովրդի աջակցությամբ, բոլոր սոցիոլոգիական հարցումների արդյունքներով և Փաշինյանի բացառիկ ցածր վարկանիշով, ում հնարավոր է հաղթել նույնիսկ տնային կալանքի տակ գտնվելով։

Կարապետյանն ընդգծեց, որ այսօր Հայաստանի քաղաքական դաշտում տեղի ունեցող ապօրինությունների մասին գիտեն ողջ աշխարհում։ «Մեր մասին խոսում և գրում են Վաշինգտոնում, Լոնդոնում, Փարիզում։ Ռուսաստանում ամենաբարձր մակարդակով է այդ մասին ասվել։ Բայց դա չի նշանակում, որ մենք պետք է ունենանք որոշակի կողմնորոշում։ Քանի որ Փաշինյանն այսօր ամեն ինչ անում է Հայաստանը գերտերությունների բախման կենտրոն դարձնելու համար՝ այստեղ քաոս ստեղծելու լուրջ ծրագրերով, այդ թվում՝ այստեղ 300 հազար ադրբեջանցիների վերաբնակեցման միջոցով։ Մենք հասկանում ենք, որ նրանց Հայաստան տեղափոխելով՝ մենք հետագայում ստիպված կլինենք նրանցով համալրել մեր բանակը՝ առնվազն 10 հազար մարդու չափով։ Իսկ մենք լավ ենք հիշում (Ռամիլ) Սաֆարովի հանցագործությունը Հունգարիայում։ Այսինքն՝ մենք պետք է համբերատար նայե՞նք այս բոլոր քայլերին։ Հենց այդ պատճառով մեզ պետք է նոր ուժեղ առաջնորդություն, որպեսզի հավասարակշռենք մեր բոլոր միջազգային գործընկերների դիրքորոշումը։ Եվ վստահ եղեք, որ շատ շուտով մենք դրան կհասնենք»,— նշել է «Հզոր Հայաստան»-ի առաջնորդը։