Քոչարյան. Հայաստանում պատերազմի թեման ամենօրյա ռեժիմով հրահրում է Նիկոլ Փաշինյանը

Արմինֆո. Հայաստանում այսօր պատերազմի թեման ամենօրյա ռեժիմով հրահրում է գործող վարչապետ Նիկոլ Փաշինյանը։ Այս մասին հայտարարել է Հայաստանի երկրորդ նախագահ, «Հայաստան» դաշինքի առաջնորդ, այդ քաղաքական ուժի վարչապետի թեկնածու Ռոբերտ Քոչարյանը Մասիս քաղաքում քաղաքացիների հետ հանդիպման ժամանակ։

Քաղաքական գործիչը նշել է, որ քաղաքացիների հետ բոլոր հանդիպումների ժամանակ իրեն մշտապես անվտանգության հետ կապված հարցեր են տալիս։ Նրա խոսքով՝ դա տեղի է ունենում մի պարզ պատճառով. երբ երկրի ղեկավարությունը չի զբաղվում անվտանգությամբ, այդ հարցը սկսում է անհանգստացնել մարդկանց։

Քոչարյանն ընդգծել է, որ երկրում ստեղծված իրավիճակից դուրս գալու համար պետք է մշակվի գործողությունների համապատասխան ռազմավարություն։ Նա համոզմունք է հայտնել, որ ՀՀ վարչապետ Նիկոլ Փաշինյանի հայտարարություններն այն մասին, թե եթե ինքը չվերընտրվի, պատերազմ կլինի, կործանում են երկիրը։ «Ո՞րն է առաջնորդի խնդիրը՝ ստանա՞լ ժողովրդի ձայնը, թե՞ պահպանել կայունությունը երկրում։ Այսօր պատերազմի թեման ամենօրյա ռեժիմով հրահրում է Նիկոլ Փաշինյանը։ Եվ եթե մարդը հարյուր անգամ դա ասում է, ապա հարյուր մեկերորդ անգամ դա կարող է տեղի ունենալ, քանի որ վախեցած մարդը միշտ զոհ է դառնում թշնամու համար։ Սա այն է, ինչի հետ մենք առերեսվում ենք ամեն օր», - հայտարարել է Քոչարյանը։

Միևնույն ժամանակ նա ընդգծել է, որ հայ ժողովուրդը առաջիկա ընտրություններում պետք է ընտրի այն ուժին, որը կզբաղվի երկրի անվտանգության հարցերի լուծմամբ, իսկ մարդիկ կզբաղվեն իրենց առօրյա գործերով։

Դրա հետ մեկտեղ նա ուշադրություն է հրավիրել այն փաստի վրա, որ գործող իշխանության կառավարման շրջանում Հայաստանը միայն կորուստների ճանապարհով է գնացել՝ պատերազմ, տարածքների կորուստ, բազմաթիվ զոհեր, պետական պարտքի ավելացում։

Այս համատեքստում նա շեշտել է, որ Հայաստանում իշխանության հավակնող բոլոր քաղաքական ուժերը պետք է անցնեն «ժողովրդական ռենտգենի» միջով։ «Իմ համոզմամբ՝ այս իշխանությունները ժողովրդական ռենտգենով անցնելու հնարավորություն չպետք է ունենան։ Հայ ժողովուրդը պետք է պատասխանատվություն ստանձնի. նա ընտրում է քաղաքական ուժ, ղեկավար՝ սեփական կյանքը բարելավելու համար, թե՞ նրանց իր գլխին նստեցնելու համար։ Իմ համոզմամբ՝ ժողովուրդը պետք է ճիշտ ընտրություն կատարի։ Այս իշխանությունները երկրի կառավարման հարցում հեռանկարներ չպետք է ունենան։ Պետք է այդ հեռանկարները հավասարեցնել զրոյի», - ասել է Քոչարյանը։

Պատասխանելով արցախցիների՝ իրենց տները վերադառնալու հեռանկարների մասին հարցին՝ Քոչարյանը հայտարարել է, որ այսօր իրատեսական է խոսել վերադարձի իրավունքի մասին։ «Ես տեսնում եմ, որ այսօր դրա մասին խոսելն իրատեսական է, քանի որ աշխարհն այսօր այնքան տուրբուլենտ է դարձել, որ նման հնարավորությունների պատուհան կարող է բացվել», - հայտարարել է քաղաքական գործիչը՝ հավելելով, որ պետք է վերադարձի իրավունքի պատուհանը բաց թողնել և հարմար առիթի դեպքում օգտվել դրանից։