Անհետ կորած զինծառայողների հարազատները ստիպված են եղել լսումներ անցկացնել փողոցում, քանի որ Հայաստանի իշխանությունները չափազանց փոքր դահլիճ էին հատկացրել խորհրդարանում

Արմինֆո. Անհետ կորած զինծառայողների հարազատները ստիպված են եղել 2020 թվականի 44-օրյա պատերազմի հանգամանքները քննող զեկույցը գաղտնազերծելու հարցով լսումներ անցկացնել Հայաստանի խորհրդարանի դիմացի փողոցում, քանի որ երկրի իշխանությունները հրաժարվել են նրանց մեծ դահլիճ տրամադրել:

Լրագրողների հետ զրույցում անկուսակցական պատգամավոր Թագուհի Թովմասյանը, ով համաձայնել էր անցկացնել այդ լսումները և աջակցել ծնողներին իրենց խնդիրները բարձրաձայնելու հարցում, հաղորդել է, որ ավելի վաղ ներկայացրել էր մասնակիցների ցուցակը, որում ընդգրկված էր 190 հոգի: "Սակայն լսումների անցկացման համար հատկացվել է 334 սենյակը, որը կարող է տեղավորել առավելագույնը 50-60 մարդ։ Ֆիզիկապես անհնար է, որ այնտեղ կարողանան տեղավորվել բոլոր ծնողները, ինչպես նաև լսումների մյուս մասնակիցները ։ Սա նաև արժանապատվության հարց է", - նշել է Թովմասյանը։

Բացի այդ, ինչպես տեղեկացրել է պատգամավորը, իշխանությունները հրաժարվում են բաց լսումներ անցկացնելուց, և "Քաղաքացիական պայմանագիր" խմբակցության պատգամավորները հրաժարվել են մասնակցել իրենց նախաձեռնած լսումներին: Նրա խոսքով՝ հրավերներ են ուղարկվել նաև ԱԺ պաշտպանության և անվտանգության հարցերի հանձնաժողովի ղեկավար Անդրանիկ Քոչարյանին, ԱԺ պետաիրավական հարցերի մշտական հանձնաժողովի նախագահ Արուսյակ Ջուլհակյանին և ԱԺ առողջապահության մշտական հանձնաժողովի անդամ Վանիկ Օհանյանին:

"Նրանք բոլորն էլ հայտարարել են, որ մտադիր չեն մասնակցել լսումներին։ Հրավեր է ուղարկվել նաև ՀՀ պաշտպանության նախարար Սուրեն Պապիկյանին, ով այս պահին երկրում չէ: Սակայն նախարարությունում հրաժարվել են նրա փոխարեն իրենց ներկայացուցչին ուղարկել։ Հրաժարվել են մասնակցել նաև ԱԱԾ տնօրեն Անդրանիկ Սիմոնյանը, ՀՀ գլխավոր դատախազ Աննա Վարդապետյանը, ՀՀ առողջապահության նախարար Անահիտ Ավանեսյանը, ՀՀ նախագահ Վահագն Խաչատուրյանը: Իսկ Քննչական կոմիտեի նախագահ Արթուր Պողոսյանն ընդհանրապես չի արձագանքել հրավերին։ Բայց ամենազարմանալին այն փաստն է, որ ծնողների հետ հանդիպմանը չի եկել Մարդու իրավունքների պաշտպանի գրասենյակի ոչ մի ներկայացուցիչ", - ուշադրություն է հրավիրել անկուսակցական պատգամավորը։

Թովմասյանը վստահ է, որ փակ քննարկումներ անցկացնելու ցանկությունը բխում է այն ամենը թաքցնելու մտադրությունից, ինչ քննարկվելու է փակ դռների հետևում: Այդ առնչությամբ Թովմասյանը համոզմունք է հայտնել, որ խորհրդարանում տապալված լսումները քաղաքական որոշման արդյունք են: Նրա խոսքով ՝ այսօր տեղի ունեցածի առաջին պատասխանատուն Ազգային ժողովի նախագահ Ալեն Սիմոնյանն է, ինչպես նաև գլխավոր քարտուղար Դավիթ Առաքելյանը:

«Նրանք, ըստ էության, խոչընդոտում են անհետ կորած զինծառայողների ծնողներին լսելի դարձնելուն, ինչպես նաև երկրում խոսքի ազատությանը: Ոչ ոք չի ցանկանում գործ ունենալ զոհվածների, անհետ կորածների կամ բռնի անհետացածների ծնողների հետ, քանի որ, իմ կարծիքով, նրանք, պարզապես, ասելիք չունեն: Հայաստանի իշխանությունները 6 տարի խաբել են ծնողներին ՝ հավաստիացնելով, որ խնդրի բարձրաձայնումը կարող է վնասել նրան երեխաներին։ Սակայն, այս ողջ ընթացքում նրանք ոչինչ չեն արել, պարզապես, խաբել են այդ մարդկանց։ Եվ հենց նրանց կանչում են բաց ձևաչափով հարցերի պատասխանները տալու, փորձում են խուսափել այդ պատասխանատվությունից", - վստահ է պատգամավորը։

Թովմասյանը վերստին կրկնել է, որ, անգամ, զեկույցի առկայությանը չի հավատում, սակայն ընդգծել է, որ այս իրավիճակում իր համար կարևոր է ծնողների կողքին լինելը, որպեսզի իրացնի լսելի լինելու նրանց իրավունքը: "Բայց ես ոչ մի ակնկալիք չունեմ այդ հանձնաժողովից, ես արդեն ասել եմ, որ այն ստեղծվել է, պարզապես, ինչ-որ մեկին մեղադրելու և ՀՀ վարչապետ Նիկոլ Փաշինյանին արդարացնելու համար",- հավելել է քաղաքական գործիչը:

Լսումների ընթացքում ելույթ է ունեցել նաև ԱԺ ընդդիմադիր "Հայաստան" խմբակցության ղեկավար, պաշտպանության նախկին նախարար Սեյրան Օհանյանը, ով ընդգծել է, որ Հայաստանի իշխանությունները, պարզապես, պարտավոր էին զեկույցը ներկայացնել հանրությանը: "Այն, ինչ նրանք անում են, խոսում է իրենց ժողովրդի նկատմամբ վերաբերմունքի մասին։ Քննիչ հանձնաժողովը, որը բաղկացած էր իշխող կուսակցության 8 անդամներից, չի կարողացել 2020 թվականի 44-օրյա պատերազմի դեպքերին համակողմանի գնահատական տալ և ներկայացնել ժողովրդին։ Իշխանությունները փորձում են խուսափել պատասխանատվությունից։ Եվ, ամենայն հավանականությամբ, հետաքննության արդյունքում հանձնաժողովը ստացել է տեղեկատվություն, որը նրանք չեն ցանկանում հնչեցնել ։ Հատկապես՝ նախընտրական շրջանում։ Այն, որ այսօրվա լսումները խորհրդարանում չկայացան, իրենց վախի դրսևորման արդյունքն է", - հայտարարել է Օհանյանը։

Հատկանշական է, որ ՀՀ վարչապետ Նիկոլ Փաշինյանը հավաստիացրել է, որ հանձնաժողովի զեկույցը ոչ մի նոր բան չի բացահայտի, որի մասին հայ ժողովուրդը չգիտեր: Ընդ որում, այդ ժամանակ հասկանալի չէ, թե ինչից են վախենում Հայաստանի իշխանությունները ՝ հրաժարվելով հրապարակել դրա բովանդակությունը։

Հիշեցնենք, որ 2020 թվականի սեպտեմբերի 27-ին Ադրբեջանի կողմից սանձազերծված պատերազմի հանգամանքներն ուսումնասիրող հանձնաժողովը ստեղծվել է ՀՀ Ազգային ժողովի կողմից 2022 թվականի փետրվարին: Հանձնաժողովի անդամներն ուսումնասիրել են տասնյակ ժամերի տեսանյութեր, գաղտնի փաստաթղթեր, լսել են հրավիրված տասնյակ պաշտոնյաների, այդ թվում՝ նաև ՀՀ վարչապետ Նիկոլ Փաշինյանին: 2025 թվականի երկրորդ տասնօրյակում հայտնի դարձավ, որ զեկույցը պատրաստ է, սակայն այն չի հրապարակվի, քանի որ պարունակում է գաղտնիության տարրեր ։