Լավրով․ Պարսից ծոցի շուրջ ճգնաժամը սպառնալիք է Արաբական թերակղզու, Կասպից ծովի, Հարավային Կովկասի եւ Կենտրոնական Ասիայի երկրների համար

Արմինֆո. Եվրասիայում սպառնալիքները զգալիորեն աճում են, ինչը լրացուցիչ ջանքեր է պահանջում դրանց չեզոքացման համար։ Այդ մասին հայտարարել է Ռուսաստանի ԱԳ նախարար Սերգեյ Լավրովը՝ Մոսկվայում Հավաքական անվտանգության պայմանագրի կազմակերպության Խորհրդարանական վեհաժողովի խորհրդի նիստում։

Ռուսաստանի նախարարն իր խոսքում նշել է եվրասիական տարածքում, այդ աշխարհաքաղաքական տարածքում և ինտեգրացիոն միավորումների հետ անվտանգության ապահովման կարևորությունը:

"Ով ուշադիր հետևում է իրադարձությունների վերջին զարգացումներին, գիտի․ Եվրասիայում սպառնալիքներն էապես աճում են։ Դա մեզանից լրացուցիչ ջանքեր է պահանջում ։ Նրանք, ովքեր այսօր փորձում են գերիշխել աշխարհում պատերազմների սանձազերծման, խաղաղ քաղաքացիների ոչնչացման հաշվին, ժողովուրդներին վախեցնելու համար, իհարկե, նորանոր սպառնալիքներ են ստեղծում, այդ թվում՝ նաև մեր երկրների համար, մեր ընդհանուր տարածքում", - ասել է Ռուսաստանի ԱԳ նախարարը։

Այդ առումով նա հիշատակել է Աֆղանստանի շուրջ անկայունությունը, որտեղ բարդ պայքար է ընթանում ահաբեկչության դրսեւորումների, թմրանյութերի ապօրինի շրջանառության դեմ։

Այնուհետև նա ուշադրություն է հրավիրել Պարսից ծոցի ճգնաժամի վրա՝ Իրանի դեմ Միացյալ Նահանգների և Իսրայելի սանձազերծած ագրեսիայի հետևանքով, դրան զուգահեռ ՝ Լիբանանում ընդլայնվող պատերազմի, Սիրիայի դեմ ընդլայնվող ռազմական գործողությունների, Գազայում և Հորդանան գետի արևմտյան ափին Պաղեստինի ժողովրդի ողբերգությունների սրման հետևանքով:

Նրա ասելով, եթե նայենք աշխարհագրական քարտեզին, ապա պաղեստինյան պետության ստեղծման հնարավորությունները գնալով պակասում են։ Իսկ Իսրայելից պաշտոնական հայտարարություններ են հնչում, որ նման պետություն երբեք չի լինի, այլ լինելու է Իսրայել պետություն, ընդ որում ՝ ընդլայնված սահմաններով։

"Դա չի շրջանցի մեր տարածաշրջանը։ Նոր եմ վերադարձել Անթալիայի դիվանագիտական ֆորումից։ Թուրքիայի նախագահ Ռեջեփ Թայիփ Էրդողանի, այլ մասնակիցների ելույթներում, այն հարցերում, որոնք հնչեցին այդ միջոցառմանն իմ մասնակցության ժամանակ, լուրջ տագնապ հնչեց ոչ միայն Արաբական թերակղզու, այլև Կասպից ծովի, Հարավային Կովկասի և Կենտրոնական Ասիայի երկրների համար Պարսից ծոցի ճգնաժամի հետևանքների վերաբերյալ։ Այս տարածաշրջանը փոխկապակցված է, և անկայունությունը "հորդում" է մի մասից մյուսը", - ասել է Լավրովը։

Ռուսաստանի ԱԳ նախարարը հավելել է, թե կասկած չկա, որ նրանց հիմնական նպատակներից մեկը, ովքեր ամեն կերպ փորձում են պահպանել այդ քաոսը,  իսլամական աշխարհում պառակտման խորացումն է: "Դա միանգամայն ակնհայտ է։ Մեր կազմակերպությունը, որը, հիմնականում, բաղկացած է մեր մահմեդական գործընկերներից, դա պետք է նկատի ունենա իր գործնական նախագծերում և ծրագրերում։ Արևմտյան ուղղությամբ մենք տեսնում ենք Ռուսաստանի Դաշնությանը "ռազմավարական պարտություն" հասցնելու հերթական փորձի համար նոր բանակներ հավաքելու ընթացքի համառ աճ ։ Հիշատակվում է նաև Բելառուսի Հանրապետությունը",- հայտարարել է ՌԴ գլխավոր դիվանագետը։

Նա համոզմունք է հայտնել, որ ՀԱՊԿ երկրները պետք է ուշադրություն դարձնեն նման բաներին, այդ թվում' իրենց ռազմական պլանավորման մեջ, քանի որ  ՀԱՊԿ-ի պատասխանատվության գոտու պարագծում դիտարկվող ճգնաժամերը  չպետք է դառնան իրական մարտական գործողությունների աղբյուր, որոնք վնաս են պատճառում։ "Անհրաժեշտ է զբաղվել կանխարգելիչ գործողություններով, անել անհրաժեշտ ամեն ինչ, որպեսզի մեզ մոտ ամրապնդվի Հավաքական անվտանգության պայմանագրի կազմակերպության ռազմական բաղադրիչը ։ Դա մեր սուրբ պարտականությունն է։

Մենք պետք է աշխատենք մեր մերձավոր հարևանների, ԱՊՀ, ՇՀԿ երկրների գործընկերների հետ ։ ՇՀԿ-ում կա բավականին լուրջ ծրագիր կայունության և անվտանգության ամրապնդման ոլորտում", - ամփոփել է նա։