"Ուժեղ Հայաստանը"՝ Արտաշատում. Հայաստանում չպետք է լինի բերք չտվող հող

Արմինֆո.  Հայաստանում չպետք է լինի այնպիսի հող, որը բերք չի բերի և չի կերակրի ողջ Հարավային Կովկասը։ Այդ մասին հայտարարել է "Ուժեղ Հայաստան" կուսակցության վարչության անդամ Նարեկ Կարապետյանը՝ Արտաշատի բնակիչների հետ հանդիպման ժամանակ։

Ինչպես հաղորդել են կուսակցության մամուլի ծառայությունից, հանդիպմանը Կարապետյանը վստահեցրել է, որ իրենց ընտրած ուղին միտված է ընդհանուր շահին: Իր ելույթի ընթացքում նա, նախ, դիմել է համազգեստավոր հայրենակիցներին, ուշադրություն հրավիրելով այն հանգամանքին, որ վերջին 8 տարիներին Արարատի մարզում հանցագործությունների թիվն ավելացել է երեք անգամ: "Միայն 2024 թվականի ընթացքում գրանցվել է 5400 հանցագործություն, 10 անգամ ավելացել է ծանր հանցագործությունների թիվը", - նշել է կուսակցության վարչության անդամը:

Բացի այդ, ինչպես նշել է Կարապետյանը, 8 տարվա ընթացքում Հայաստանում գործող իշխանության օրոք ցանքատարածությունը կրճատվել է 35 տոկոսով, ցորենի ցանքատարածությունը կրճատվել է երկու անգամ: "2024 թվականին նաև նվազել են առևտրի ծավալները՝ 2022 թվականի համեմատ։ Մարզն այսօր գտնվում է խոցելի վիճակում, 9000 հա հողատարածք ջրի և մատակարարումների պակասի արդյունքում մնում է անմշակ", - հայտարարել է կուսակցության վարչության անդամը։

Նա հավաստիացրել է, որ իրենց քաղաքական ուժը մտադիր է փոխել իրավիճակը և այնպես անել, որ ամենաբերրի մարզում չլինի չցանված հեկտար: "Արմավիրն ու Արարատը, Արարատյան հարթավայրը մեր երկրի ամենաբերրի հատվածներն են։ Մեր կուսակցությունը այնպես կանի, որ Հայաստանում չլինի այնպիսի հող, որը բերք չի բերի և չի կերակրի ողջ տարածաշրջանը", - եզրափակել է Կարապետյանը։

Հիշեցնենք, որ մարտի 31-ին հայտնի դարձավ, որ "Ուժեղ Հայաստան" կուսակցությունը առաջիկա խորհրդարանական ընտրություններին մասնակցելու է "Ուժեղ Հայաստան Սամվել Կարապետյանի հետ" դաշինքով: Դրանից հետո, տառացիորեն օրվա ընթացքում, կառավարող կուսակցությունն ապրիլի 7-ին արտահերթ նիստ էր հրավիրել, որի ընթացքում ընդունվել են Ընտրական օրենսգրքի փոփոխությունները։

Փոփոխությունների համաձայն,  մի կողմից, արգելք է դրվում ընտրությունների օրը քվեարկության գործընթացի նկատմամբ վերահսկողության վրա, մյուս կողմից ՝ արգելվում է անուն-ազգանուններն օգտագործել կուսակցությունների և դաշինքների անվանումներում։ Իշխանությունների նախաձեռնությունը տարակուսանք ու վրդովմունք է առաջացրել խորհրդարանական ընդդիմության շրջանում։ Նրանք այդ առնչությամբ հիշեցրել են, որ գոյություն ունի միջազգային փորձ, կան Վենետիկի հանձնաժողովի՝ Հայաստանին տրված հանձնարարականներ, որոնց համաձայն, չի կարելի ընտրություններից առնվազն մեկ տարի առաջ փոխել խաղի կանոնները։