Խաչատուր Սուքիասյան. Հայաստանի հարուստ քաղաքացիները չպետք է ներգրավվեն պետական կառավարման համակարգում

Արմինֆո. Հայաստանի հարուստ քաղաքացիները չպետք է ներգրավվեն պետական կառավարման համակարգում։ Նման տեսակետ ունի ՀՀ Ազգային ժողովի կառավարող "Քաղաքացիական պայմանագիր" խմբակցության պատգամավոր, գործարար Խաչատուր Սուքիասյանը։

Նրա խոսքով՝ ընտանիքի կապիտալը, որն ինքն է ներկայացնում, գնահատվում է 1-2 մլրդ դոլար, բայց ընտանիքի անդամներից ոչ մեկը քաղաքական իշխանության չի ձգտել: Հարուստ մարդը չպետք է կառավարի պետական  ինստիտուտները, քանի որ նա միշտ գայթակղվում է օգտագործել իշխանությունն իր անձնական նպատակների համար: "Սեփականությունը միշտ դառնում է գործիք, որով անձնական շահը կարող է ավելի արտոնյալ լինել, քան պետության շահը։ Պետական կառույցները պետք է ուշադիր լինեն այս հարցում։ Սրիկաները, որոնք իշխանության գալիս անգամ կոշիկ չունեին, 30 տարի դառնում էին խոշոր կապիտալի տեր։ Մենք բոլորս գիտենք այս 30 տարիների իրադարձությունների մասին։ 2008-2009թթ. նրանք ունեցել են օգնականներ, որոնք կարող էին զանգահարել ցանկացած դատավորի, դատախազի, այս կամ այն մարդուն իր սեփականությունից զրկելու հրամաններ տալով, իսկ դիմադրողներին բերման էին ենթարկում: Հիմա երկրում պետականության ձևավորման գործընթաց է ընթանում, երկիրը լավ վիճակում է, իսկ առաջիկա երկու տարիներին տնտեսությունն ավելի ակտիվ տեմպերով է շարժվելու, թվերն այդ մասին են  խոսում։ Վերջերս իմացա, որ Հրազդանի տվյալների կենտրոնը 600 ՄՎտ էլեկտրաէներգիա է խնդրել, իսկ այդ ծավալները նշանակում են ատոմակայան ՝ գումարած դրա հզորության 50 տոկոսը", - ասել է գործարարը։

Վերադառնալով օգնականների թեմային՝ Խաչատուր Սուքիասյանը հիշեցրել է ԱԺ ընդդիմադիր "Հայաստան" խմբակցության պատգամավոր Արմեն Գևորգյանի մասին, ով, Սուքիասյանի խոսքով, զանգահարում էր դատավորներին, դատախազներին՝ նրանց նկատմամբ ճնշում գործադրելով, այլ անձանց ունեցվածքը հետ վերցնելու նպատակով։ Այսօր նույն Արմեն Գևորգյանն ունի 10-ից ավելի միավոր շարժական, շուրջ երկու տասնյակ անշարժ գույք: "Ես մի պարզ հարց ունեմ․ ո՞վ է պատասխան տալու այդ ամենի համար, թեև արդեն 17-18 տարի է անցել։ Որքա՞ն կարելի է հանդուրժել այս ամենը: Ի՞նչ են ուզում նրանք: Չի լինելու այնպես, ինչպես իրենք են ուզում, Հայաստանը զարգանալու է, երկիրը ղեկավարելու են քաղաքական գործիչներ, որոնք բիզնեսում մեծ հնարավորություն չունեն, նրանք լինելու են լավ կրթություն ստացած շարքային քաղաքացիներ։ Հասարակությունը շատ լավ հասկանում է եւ տեսնում տարբերությունը", - հայտարարել է գործարարը։