Հայաստանում տեղեկատվական տեխնոլոգիաների կիրառմամբ թմրանյութերի վաճառքը կարող է ճանաչվել  ծանրացուցիչ հանգամանքով հանցագործություն

Արմինֆո.Հայաստանում տեղեկատվական տեխնոլոգիաների կիրառմամբ թմրանյութերի վաճառքը կարող է ճանաչվել ծանրացուցիչ հանգամանքով հանցագործություն։ Հայաստանի Ազգային ժողովում ապրիլի 14-ին քննարկվում են Քրեական օրենսգրքում "Քաղաքացիական պայմանագիր" խմբակցության պատգամավոր Հայկ Սարգսյանի առաջարկած փոփոխությունները:

Ինչպես նշել է Հայկ Սարգսյանը՝ առաջին ընթերցմամբ քննարկման ներկայացնելով «Հայաստանի Հանրապետության քրեական օրենսգրքում փոփոխություններ եւ լրացումներ կատարելու մասին» օրենքի նախագիծը, իրավապահ մարմինների կողմից հայտնաբերված թմրամիջոցների ապօրինի շրջանառության հացագործությունների թիվը մի քանի անգամ աճել է, եւ հանցագործությունների կանխարգելման համար երկու ճանապարհ կա՝ պատիժը պետք է լինի խիստ եւ անխուսափելի:

ԱԺ հաղորդագրության համաձայն, պատգամավորը հիշեցրել է, որ նախորդ ԱԺ-ն ընդունել է իր կողմից հեղինակված օրենքի նախագծերի փաթեթը, ըստ որի՝ ոստիկանությանը հազարավոր տեսախցիկների 24-ժամյա հասանելիություն է տրամադրվել:

«Երբ համակարգը սկսի ամբողջությամբ աշխատել, կբերի բոլոր տեսակի հանցագործությունների բացահայտման թվի աճին: Երբ մեզ հաջողվի մեծ ծածկույթ ունեցող տեսախցիկների շնորհիվ ժամերի ընթացքում բացահայտել դժվար բացահայտելի համարվող թմրամիջոցների ապօրինի շրջանառության դեպքերը, մենք կունենանք հանցագործությունների նախականխման եւ կանխարգելման բազում դեպքեր»,- ասել է պատգամավորը:

Ըստ Հայկ Սարգսյանի՝ այժմ ժամանակն է, որպեսզի թմրամիջոցների ապօրինի շրջանառության կանխարգելման համար կիրառվի երկրորդ սկզբունքը: Պատգամավորի խոսքով պատիժը պետք է լինի խիստ եւ համադրելի արարքի ծանրությանը:

«Առաջարկում եմ խստացնել թմրամիջոցների ապօրինի շրջանառության հետ կապված մի շարք հանցագործությունների պատժաչափերը»,- նշել է Հայկ Սարգսյանը: Նա տեղեկացրել է, որ  իրացնելու նպատակով թմրամիջոց արտադրելու, պատրաստելու, վերամշակելու, ձեռք բերելու, պահելու, տեղափոխելու, առաքելու, տարածելու, գովադելու եւ իրացնելու դեպքերում, եթե դա տեղի ունենա տեղեկատվական տեխնոլոգիաների միջոցով, նախատեսվում է խստացում՝  4-8 տարվա ազատազրկում՝  3-6 տարվա փոխարեն:

Համանման պատժի խստացում պատգամավորն առաջարկել է իրականացնել նաեւ արարքն անօգնական վիճակում գտնվող անձի հանդեպ կատարելու դեպքում: Իսկ նույն հանցագործությունն անչափահասի ներգրավվմամբ կամ անչափահասի նկատմամբ կատարելու պարագայում՝ նախագծի հեղինակն առաջարկել է սահմանել առավել խիստ պատիժ, այն է՝  6-12 տարվա ազատազրկում:

«Առաջինից երկրորդ ընթերցում ընկած ժամանակահատվածում գործընկերներիս առաջարկելու եմ, որպեսզի առանձնապես խոշոր չափերով թմրամիջոցների շրջանառության համար եւս առավել խիստ պատիժ սահմանվի»,- ասել է պատգամավորը:

Հարակից զեկույցով հանդես է եկել ԱԺ պետական-իրավական հարցերի մշտական հանձնաժողովի անդամ Լիլիթ Մինասյանը: Պատգամավորը հայտնել է, որ հանձնաժողովը նախագծին տվել է դրական եզրակացություն:

Կառավարության դիրքորոշումը ներկայացրել է Արդարադատության նախարարի տեղակալ Գեւորգ Քոչարյանը: Փոխնախարարը տեղեկացրել է, որ նախագծի հեղինակն ընդունել է գործադիրի առաջարկները, ուստի նրանք նախագծին տվել են դրական եզրակացություն: