Կանխատեսում. Հնարավորություն չունենալով խոչընդոտել իրանական էներգակիրների Եվրոպա արտահանմանը՝ Ռուսաստանն ստիպված կլինի մասնակցել դրան

Հնարավորություն չունենալով խոչընդոտել իրանական էներգակիրների Եվրոպա արտահանմանը՝ Ռուսաստանն ստիպված կլինի մասնակցել այդ նախագծին, այսօր մամուլի ասուլիսի ժամանակ այդպիսի կարծիք է հայտնել իրանագետ Վարդան Ոսկանյանը:

ՙԱյսպես թե այնպես, Հայաստանի տարածքով կամ ոչ, իրանական էներգառեսուրսները և, առաջին հերթին, գազը Եվրոպա կհասնեն: Եվ Մոսկվան, կարծում եմ, հնարավոր ամեն բան կանի՝ իրանական գազի Եվրոպա տեղափոխման նախագծին մասնակցելու նպատակով՚,- նշել է նա:

Այս առումով փորձագետը գտնում է, որ Հայաստանը, ունենալով ռազմավարական դաշնակցության հարաբերություններ Ռուսաստանի, դաշնակցային հարաբերություններ Իրանի և Վրաստանի հետ, հիանալի գործընկեր է համատարածաշրջանային նշանակության նոր տարանցիկ նախագծին մասնակցելու համար:

ՙԿարծում եմ, որ վաղուց ժամանակն է, որպեսզի Երևանը հնչեցնի իր ցանկությունները՝ բնականաբար առաջարկվող հնարավորությունների հետ միասին: Հարկավոր է հրաժարվել գաղութային հոգեբանությունից: Իսկ հաշվարկել պետք է ոչ միայն ռիսկերը, այլ նաև՝ հնարավորությունները՚,- հայտարարել է իրանագետը: