Արմինֆո.Եվրոպական խորհրդի հեռացող ղեկավար Դոնալդ Տուսկի Երեւանի եւ Բաքվի հայտարարությունները բոլոր քույրերին մեկական ականջօղ բաժանելու փորձ են: Այս լույսի ներքո եվրոպացի պաշտոնյայի ասածները գերագնահատել, ակնհայտորեն, չարժե։ ԱրմԻնֆո-ին այդպիսի կարծիք է հայտնել Կովկասի ինստիտուտի տնօրեն Ալեքսանդր Իսկանդարյանը։
Հուլիսի 10-ին Հարավային Կովկաս այցի ընթացքում Եվրախորհրդի նախագահը Երեւանում հայտարարել էր ղարաբաղյան հակամարտությունը ռազմական ճանապարհով լուծելու անհնարինության մասին' դրանով իսկ ընդգծելով տարածաշրջանում խաղաղության պահպանման եւ ժողովուրդների ինքնորոշման իրավունքի անհրաժեշտությունը: Հուլիսի 9-ին Բաքվում Տուսկը Եվրամիության անունից պաշտպանել Էր Ադրբեջանի տարածքային ամբողջականությունը:
"Ընդհանուր առմամբ, Տուսկի հայտարարությունները լիովին տեղավորվում են հայկական եւ ադրբեջանական ազգային դիսկուրսների մեջ։ Հասկանալի է, որ հաճախ օտարերկրյա պաշտոնյաների և դիվանագետների նման մանևրներն այնքան էլ հաջող չեն ստացվում։ Այնուամենայնիվ, նրանց նպատակը միանգամայն հասկանալի է. դա Բրյուսելի փորձն է աջակցելու Ռուսաստանի եւ Իրանի միջեւ գտնվող տարածաշրջանում գոնե ինչ-որ փոխգործակցությանը։ ԵՄ-ի համար դա անհրաժեշտ է՝ հաշվի առնելով այդ երկրների հետ հարաբերություններում Արևմուտքի խնդիրները, մասնավորապես ՝ Իրանի շուրջ մշտապես սրվող իրավիճակը", - ընդգծել է քաղաքագետը։
Նրա գնահատականների համաձայն՝ ԵՄ-ն, նույնիսկ, միասնական դիրքորոշում չունի ղարաբաղյան խնդրի վերաբերյալ։ Հստակ դիրքորոշում չունի նաեւ ներկայիս ամերիկյան վարչակազմը, ընդ որում, ոչ միայն Ղարաբաղի, այլեւ Հարավային Կովկասի ողջ տարածաշրջանի նկատմամբ։ Գոյություն ունի միայն ԵԱՀԿ Մինսկի խմբի միասնական, համակարգված դիրքորոշում։ Այս փուլում այդ դիրքորոշումն, ըստ Իսկանդարյանի, արտացոլված է "մադրիդյան սկզբունքներում " և, ընդհանուր առմամբ, վայելում է մյուս միջազգային կառույցների աջակցությունը։
Ղարաբաղյան հակամարտության կարգավորմամբ 1992 թվականից զբաղվում է ԵԱՀԿ Մինսկի խումբը, որը ներկայացրել են Ռուսաստանից ԱՄՆ-ի եւ Ֆրանսիայի համանախագահները: Ներկայումս կարգավորման գործընթացն անվանապես տեղի է ունենում ԵԱՀԿ ՄԽ համանախագահների կողմից 2007 թվականին Մադրիդում առաջադրված եւ 2009 թվականին նորացված "մադրիդյան սկզբունքների" հիման վրա:
Քաղաքագետն այս լույսի ներքո որպես հայ լոբբիստների աշխատանքի արդյունք է գնահատում վերջերս ԱՄՆ-ում Ադրբեջանին այնպիսի զենքի վաճառքի արգելքի մասին ընդունված փոփոխությունները, որոը կարող է օգտագործվել քաղաքացիական ինքնաթիռների ոչնչացման համար: Նրա գնահատմամբ՝ նման որոշումը պայմանավորված չէ ԱՄՆ պետական շահերով։
ԱՄՆ Կոնգրեսի Ներկայացուցիչների պալատը հավանություն է տվել կոնգրեսական Բրեդ Շերմանի առաջարկած օրենսդրական ուղղումներին, որոնք նախատեսում են ԱՄՆ-ի կողմից Ադրբեջանին այնպիսի սպառազինության տրամադրման արգելք, որը կարող է գործի դրվել Ստեփանակերտի օդանավակայանից թռչող և այնտեղ վայրէջք կատարող քաղաքացիական ինքնաթիռների դեմ: