Արմինֆո. Հունիսի 14-ին ՀՀ ԱԻ նախարար Հրաչյա Ռոստոմյանն ընդունեց ՀՀ-ում Ճապոնիայի նորանշանակ արտակարգ և լիազոր դեսպան Ջուն Յամադային: Հանդիպման նպատակն էր քննարկել և նախանշել ԱԻ նախարարության և Ճապոնիայի կառավարության միջև ձևավորված համագործակցության ուղղություններն ու ծրագրերը:
Ինչպես ԱրմԻնֆո-ին հաղորդեցին ԱԻՆ մամուլի ծառայությունից, նախարար Ռոստոմյանը շնորհավորեց Ջ. Յամադային նշանակման կապակցությամբ և հույս հայտնեց, որ, պահպանելով արդեն ձևավորված սերտ համագործակցությունը, երկու երկրների փոխգործակցությունը շարանուկական բնույթ կկրի:
Նշանակման կապակցությամբ փոխադարձ շնորհավորանք հղելով ԱԻ նախարար Ռոստոմյանին՝ Ճապոնիայի դեսպանը նշեց, որ ինքը պաշտոնը ստանձնել է Հայաստանի համար կարևոր մի ժամանակահատվածում: Նա ասաց, որ ՀՀ-ում Ճապոնիայի նախկին դեսպանը իրեն ներկայացրել է ԱԻ նախարարության և Ճապոնիայի կառավարության միջև ձևավորված փոխգործակցության մանրամասները:
- Մեկ ընդհանրություն կա Հայաստանի և Ճապոնիայի միջև: Երկու պետությունն էլ առերեսվել են բնության տարբեր արհավիրքների՝ մասնավորապես երկրաշարժերի: Հիշում եմ, որ 1988 թվականին՝ Սպիտակի երկրաշարժի ժամանակ, Ճապոնիան փրկարարական ջոկատ ուղարկեց Հայաստան: 2011 թվականի ցունամիի ժամանակ Հայաստանն իր հերթին աջակցեց Ճապոնիային, որի համար իմ երախտագիտությունն եմ հայտնում հայ ժողովրդին: Ճիշտ է՝ աղետների ռիսկերի նվազեցումը և կանխարգելումը չի կարող շատ մարդկանց ուշադրությունը գրավել, բայց մենք մեր ուշադրությունը կսևեռենք հենց այս ուղղության վրա:
- Մենք համակարծիք ենք Ձեզ հետ բոլոր հարցերում, քանի որ մենք ևս շեշտը դնում ենք աղետների կանխարգելման և ռիսկերի նվազեցման վրա: ԽՍՀՄ փլուզումից հետո, հաշվի առնելով հարևանների հետ հարաբերությունները, մենք ի վիճակի չենք եղել ներդրումներ կատարել բարձր տեխնոլոգիաների ոլորտում, ինչն այսօր շատ կարևոր է: Ուստի ցանկանալով բարձրացնել Հայաստանի կարողություններն այս բնագավառում՝ մենք մշակել ենք Ճապոնայի հետ համագործակցության մի շարք ծրագրեր, - ընդգծեց նախարար Ռոստոմյանը:
Հանդիպման ընթացքում ներկայացվեցին Ճապոնիայի կառավարության հետ համագործակցության հնարավոր ուղղությունները՝ հետագայում առավել մանրամասն քննարկելու նպատակով: Մասնավորապես՝ ներկայացվեցին ՀՀ արտակարգ իրավիճակների նախարարությանը պարամեդիկական ավտոմեքենաներ և շարժական հոսպիտալներ տրամադրելու ծրագիրը, որը հնարավորություն կտա դեպքի վայրում տուժածներին անմիջապես առաջին բուժօգնություն ցուցաբերել և տեղափոխել մասնագիտացված բժշկական հաստատություններ, ինչպես նաև Ճգնաժամային կառավարման պետական ակադեմիայում ճապոնական ուսուցման համակարգի ներդրման, Լուսակերտի վարժահրապարակի կառուցման աջակցության, ուսումնական հրշեջ-փրկարարական տեխնիկա, գույք և սարքավորումներ տրամադրելու, Գյումրի քաղաքում իրական ժամանակում սեյսմիկ ինտենսիվության արտապատկերման նոր սերնդի համակարգի ստեղծման և մի շարք այլ ծրագրեր: