ՆԱՏՕ-ի Խորհրդարանական վեհաժողովում ՀՀ Ազգային ժողովի պատվիրակությունը հոկտեմբերի 11-14 –ը մասնակցել է Խորվաթիայի մայրաքաղաքում այդ կառույցի լիագումար նիստին:

ՌԴ Անվտանգության դաշնային ծառայության ղեկավար Ալեքսանդր Բորտնիկովն Աֆղանստանից Լեռնային Ղարաբաղի տարածքով նարկոտրաֆիկի փաստը հաստատող տեղեկատվության չի տիրապետում: Այդ մասին Բորտնիկովը հայտարարել է Երևանում մամլո ասուլիսի ժամանակ: Նշենք, որ Բորտնիկովը Հայաստանում մասնակցել է ԱՊՀ երկրների հատուկ  ծառայությունների ղեկավարների խորհրդի նիստին:

 Հոկտեմբերի 17-ին մեկնարկել է հայ-արգենտինական գործարար համաժողովը, որի շրջանակներում նախատեսված են հայ և արգենտինացի գործարարների հանդիպումը`գործընկերային հարաբերություններ հաստատելու և համագործակցության նոր ուղիներ գտնելու նպատակով:

ՎՏԲ-Հայաստան Բանկն ընդլայնում է քարտից քարտ փոխանցման հնարավորությունները, որոնք առաջարկվում էին 2012 թվականից: Մասնավորապես, նախկինում հաճախորդներին հասանելի էին միայն փոխանցումներ Բանկի քարտերի միջև, այնուհետև` Բանկի Visa քարտերից` տեղական բանկերի թողարկված Visa քարտերին, իսկ այժմ արդեն` փոխանցումներ ինչպես տեղական, այնպես էլ ԱՊՀ երկրների և Վրաստանի բանկերի կողմից թողարկված բոլոր Visa քարտերին ՎՏԲ-Հայաստան Բանկի 117 բանկոմատների միջոցով օրվա ցանկացած ժամի Visa Money Transfer համակարգի միջոցով:

Արևելյան գործընկերության վիլնյուսյան գագաթնաժողովի ընթացքում Հայաստանն, ամենայն հավանականությամբ, Եվրամիության հետ որոշակի բովանդակությամբ փաստաթուղթ կստորագրի: Բացառված չէ, որ դա լինի փոխըմբռնման հուշագիր: Այդ մասին այսօր մամլո ասուլիսի ժամանակ հայտարարել է Հայաստանի հանրապետական կուսակցությունից ԱԺ պատգամավոր, ՀՀ Աժ պաշտպանության, ազգային անվտանգության և ներքին գործերի մշտական հանձնաժողովի ղեկավար Կորյուն Նահապետյանը:

Հայ-ռուսական համագործակցության խորացման շրջանակներում բացառված չէ ռուսական ռազմական գործարաններից զենքի ուղղակի գնումների վերաբերյալ պայմանագրի ստորագրումը: Այդ մասին ԱրմԻնֆո-ի թղթակցի հետ զրույցում հայտարարել է ՀՀ ՊՆ մամուլի քարտուղար Արծրուն Հովհաննիսյանը:

Հայաստանը պատրաստվում է մեղր արտահանել Եվրամիության երկրներ և այդ նպատակով ընդունել է այդ արտադրանքի սերտիֆիկացման կարգը:

 Հայաստանի կառավարությունը որոշել է մաքսային արտոնություններ տրամադրել վերջին ինն ամիսներին պարապուրդի մատնված ՙՍՊՍ սիգարոն՚ ՍՊԸ-ին: 

 Հայաստանի հին մայրաքաղաք Դվինի տարածքում հազարամյա մահմեդական դամբարան է հայտնաբերվել:

 ՙԺառանգություն՚ կուսակցության պատգամավոր Զարուհի Փոստանջյանը Հայաստանի իրավապահ մարմիններից պահանջում է մեկուսացնել ՙՀայոց արծիվներ՚ հասարակական կազմակերպության ղեկավար Խաչիկ Ասրյանին: Այդ մասին նա հայտարարել է այսօր մամլո ասուլիսի ժամանակ: ՙՏվյալ պահին Ասրյանի բոլոր կոչերն ու սպառնալիքներն ակտիվորեն շրջանառվում են ԶԼՄ-ներում և հասանելի են լայն հասարակայնությանը: Իրավապահ մարմինները պետք է մեղադրանք ներկայացնեն ու մեկուսացնեն նրան: Դրանք կանխարգելիչ միջոցներ են, որոպեսզի այլ անձանց մոտ նրա առաջարկած արարքն իրագործելու ցանկություն չառաջանա՚,- նշել է նա: Փոստանջյանը նաև նշել է, որ ըմբռնումով է վերաբերում ընդդիմադիրների կողմից քննադատությանը, քանի որ դրանք սպառնալիքներ ու վիրավորանքներ չեն պարունակում:

Ավստրալական Walk Free հիմնադրամը հրապարակել է ՙՍտրկության համաշխարհային ինդեքս՚ ամենամյա զեկույցը, որում Հայաստանն զբաղեցրել է 57-րդ տեղը: Ինչպես նշվում է զեկույցում, հետազոտությանը մասնակցել է, ընդհանուր առմամբ, 162 երկիր:

Լեռնային Ղարաբաղի և Ադրբեջանի զինված ուժերի շփման գծի Հադրութի ուղղությամբ hոկտեմբերի 17-ին նախատեսված ԵԱՀԿ Մինսկի խմբի առաքելության պլանային դիտարկումն ընդհատվել է ադրբեջանական կողմից ԼՂՀ Պաշտպանության բանակի դիրքերի ուղղությամբ ավտոմատ զենքից արձակված կրակոցների պատճառով:

Հոմո սափիենսի առաջին հետքերը Հայաստանում 40 հազարամյակի պատմություն ունեն:

 Ողջ աշխարհում նվազում է խորհրդարանի նկատմամբ վստահության մակարդակը, և Հայաստանը բացառություն չէ: Հոկտեմբերի 17-ին Երևանում կայացած մամուլի ասուլիսում այդպիսի կարծիք է հայտնել խորհդրարանական էթիկայի հարցերի միջազգային փորձագետ Ռիկ Սթեյփներստը:

Հոկտեմբերի 17-ին Երևանում սկսվել է ՙԱրևելյան  գործընկերության՚ և Սևծովյան տնտեսական համագործակցության կազմակերպության (ՍՏՀԿ) երկրների կրթության նախարարների հաամաժողովը, որի աշխատանքին մասնակցում են նաև Հայաստանում ԵՄ պատվիրակության ղեկավար Տրայան Հրիստեան, ԵԽ կրթության դեպարտամենտի ղեկավար Շուր Բերգենը, Եվրոպական ուսանողական միության գործադիր կոմիտեի նախագահ Ռոկ Պրիմոչիվը, ինչպես նաև պատվիրակություններ Ռումինիայից, Ռուսաստանից, Բելառուսից, Բուլղարիայից, Վրաստանից, Մոլդովայից և Ուկրաինայից: Համաժողովի արդյունքում կընդունվի համատեղ հայտարարություն:

Հոկտեմբերի 21-ին Լոս Անջելեսում Թուրքիայի փոխվարչապետ Ալի Բաբաջանին կհիշեցնեն Ցեղասպանությունը, Արևմտյան Հայաստանի և Կիպրոսի մեկ երրորդի օկուպացումը:

 Սիրիայի շուրջ 50 հազար քրիստոնյաներ պատրաստ են դիմել Ռուսաստանի քաղաքացիություն ստանալու խնդրանքով` մոտալուտ հումանիտար աղետից փրկվելու նպատակով:

 Հայաստանի արտակարգ իրավիճակների նախարար Արմեն Երիցյանը հոկտեմբերի 16-ին կանխել է Դավթաշենի կամրջից նետվելու հերթական փորձը:

 Հոկտեմբերի 15-ին Դամասկոսում Հայ կաթոլիկ եկեղեցու թեմի շեքն արդեն երկրորդ անգամ հրետանային գնդակոծության է ենթարկվել:

Հոկտեմբերի 16-ին, ժամը 20:30-ի սահմաններում ՀՀ հյուսիսարևելյան սահմանագոտում տեղակայված զորամասի հսկողության տարածքում մարտական խնդիր իրականացնելիս մահացու ականապայթյունային վիրավորում է ստացել ՀՀ ՊՆ N զորամասի ինժեներասակրավորային վաշտի հրամանատար, կապիտան Գևորգ Գագիկի Մնացականյանը (ծնված 1988թ., ծառայում էր 2005թ.-ից, Գավառի զ/կ):