Ինքնահարգանքը վերածննդի բանալին է. ԱրարատԲանկը ներկայացրել է "Ոտքի կանգնելու կամքը" ֆիլմաշարի եզրափակիչ մասը

Արմինֆո. Դեկտեմբերի 4-ին «Մոսկվա» կինոթատրոնում տեղի է ունեցել «ԱրարատԲանկ» ԲԲԸ աջակցությամբ նկարահանված ռեժիսոր Վահե Սուքիասյանի «Ոտքի կանգնելու կամքը» ֆիլմաշարի եզրափակիչ՝ երրորդ մասի ցուցադրությունը:

Նախագիծը մեկնարկել է 2022 թվականին՝ "Ոտքի կանգնելու կամքը" ֆիլմի առաջին մասի թողարկմամբ, և նվիրված էր Հայաստանի ամենահերոսական հաղթանակներին, դավաճանություններին, ամենածանր պարտություններից հետո ոտքի կանգնելու կամքին և այդ պարտությունների իրական պատճառներին: Այդ մասը պատրաստվել էր դպրոցների աշակերտների համար:

ԱրարատԲանկի հասարակայնության հետ կապերի բաժնի պետ և սոցիալական ծրագրերի ղեկավար Աննա Ալլահվերդյանի խոսքով՝ ֆիլմի ցուցադրությունից մի քանի ամիս անց "Կրթության և նորարարությունների ազգային կենտրոն" հիմնադրամը Տավուշի մարզի 11 ուսուցիչների հետ համատեղ մշակել է ուսումնամեթոդական ձեռնարկ, որն այժմ կիրառվում է ոչ միայն Հայաստանի բազմաթիվ հանրակրթական դպրոցներում, այլև Սփյուռքի կրթօջախներում: Այն, հիմնականում, օգտագործում են պատմության, նախնական զինվորական պատրաստության և հայ գրականության ուսուցիչները։

"Ոտքի կանգնելու կամքը. ինքնաճանաչում" երկրորդ ֆիլմը նվիրված էր ինքնաճանաչմանը, որի թիրախային լսարանը ուսանողներն ու տարեցներն էին: Քանի որ առանց ինքդ քեզ ճանաչելու, առանց քո արժեքները իմանալու հնարավոր չէ հասկանալ, թե ինչ է նշանակում պետություն, պետականություն, և պայքարել դրա համար:

Երրորդ ֆիլմը նվիրված է ինքնահարգանքի թեմային: Մասնավորապես, եզրափակիչ մասում խոսվում է տեղեկատվական պատերազմի մասին, որի միջոցով մեզ փորձում են ամեն գնով համոզել մեր իսկ անօգնականության, թուլության մեջ, այն մասին, թե ինչպես են արժեզրկվել և "աղբանոցում" հայտնվել հայ ժողովրդի համար այնպիսի հասկացություններ, ինչպիսիք են «գեն», «հայրենիք», «եկեղեցի» և «հող»: Այս ֆիլմում ՀՀ վաստակավոր արտիստ Արթուր Կարապետյանը պատմում է, թե ինչպես մաքրվել տեղեկատվական աղբից և սկսել հարգել ինքն իրեն:

Հանդիսատեսին ներկայացնելով այդ սոցիալական նախագիծը՝ Աննա Ալլահվերդյանը նշել է, որ ֆինանսական կառույցի հաջողությունը ոչ միայն ֆինանսական ցուցանիշներն են՝ բարձր շահույթը, ակտիվները, պասիվները, հաջողությունը, այլ, նրա համոզմամբ, սոցիալական ազդեցությունն է:

Ֆիլմի ռեժիսոր Վահե Սուքիասյանը լրագրողների հետ զրույցում նշել է, որ միայն ինքնահարգանքն  է ոտքի կանգնելու բանալին: Նա նշել է, որ 2020 թվականի պատերազմից հետո հայ ժողովուրդը գտնվել է ընկճախտի վիճակում, ինչը միանգամայն հասկանալի է և նորմալ: Բայց քանի որ, ընդհանուր առմամբ, հանրությունը լավ չգիտի պատմությունը, ծանոթ չէ հոգեբանությանը, իսկ տեղեկատվական պատերազմը նոր բան է, ապա այդ ամենը մեզ վրա ավելի մեծ ազդեցություն ունեցավ, քան՝ պետք էր։

Սուքիասյանն ընդգծել է, որ պատերազմում մենք չենք պարտվել, այլ հայտնվել ենք բոլորի կողմից լքված որբի կարգավիճակում։ «Իսկ ոտքի կանգնելու համար պետք է ինքդ քեզ հարգես, ուրիշ ոչինչ պետք չէ: Ոչ մի ժողովուրդ մյուսից լավը չէ։ Պարզապես, յուրաքանչյուր ժողովուրդ ունի իր սրբություններն ու ոգեշնչման աղբյուրները, որոնք չպետք է կորցնի", - ընդգծել է ռեժիսորը։

ԱրարատԲանկի վարչության նախագահ և գլխավոր տնօրեն Մհեր Անանյանը լրագրողների հետ զրույցում նշել է, որ աջակցելով նման կարևոր նախագծին, ԱրարատԲանկը վստահել է կստեղծարար թիմին, հավատալով, որ ֆիլմը կլինի ուսանելի և կհամապատասխանի բանկի տեսլականին ու նպատակներին: Այս առումով նա նշել է, որ բանկի հիմնական նպատակն ազգային գաղափարախոսությամբ մարդ, հանրություն ձեւավորելն է։

«Եվ այսօր մենք կարող ենք ուրախությամբ փաստել, որ բոլոր 3 ֆիլմերը ծառայել են իրենց նպատակներին, և, եթե յուրաքանչյուր դիտող գոնե ինչ-որ փոքր բան վեերցնի այս ֆիլմից, դա մեր ընդհանուր հաջողությունն է», - նշել է Անանյանը։ Ընդ որում, ի պատասխան լրագրողների խնդրանքին՝ հնչեցնել ոտքի կանգնելու բանաձևը, ԱրարատԲանկի ղեկավարը նշել է, որ ամեն ինչ միասնության մեջ է, համատեղ աշխատանքում, այդ թվում ՝ առողջ հանրություն ձևավորելու նպատակով:

Նշենք, որ միայն 2023 թվականին ԱրարատԲանկն ավելի քան 100 մլն դրամի ներդրում է կատարել սոցիալական ծրագրերի իրականացման համար։