Արմինֆո.Հայաստանի ոչ մի պետական պաշտոնյա իրավունք չունի բանակցել այս կամ այն գյուղը, այս կամ այն տարածքը հանձնելու շուրջ։ Այդ մասին այսօր ԱԺ արտաքին հարաբերությունների հանձնաժողովի նիստում կառավարության 2021-2023թթ. ծրագրի կատարողականի քննարկման ժամանակ հայտարարել է ՀՀ ԱԳ նախարար Արարատ Միրզոյանը ՝ ընդդիմանալով ԱԺ ընդդիմադիր "Հայաստան" խմբակցության պատգամավոր Քրիստինե Վարդանյանին։
Պատգամավորը, մասնավորապես, բարձրացրել է Տավուշի մարզի չորս գյուղ Ադրբեջանին հանձնելու իշխանությունների մտադրության մասին հարցը ։ Բացի այդ, խորհրդարանականը նախարարին հարցրել է, թե ինչու պետք է վավերացվեր Հռոմի ստատուտը, եթե այսօր իշխանությունները խոսում են միջազգային դատարաններում հայցերը հետ կանչելու հնարավորության մասին:
Ի պատասխան՝ Միրզոյանն ասել է, որ Հայաստանում չկա պաշտոնյա, որը բանակցի Ադրբեջանի հետ գյուղերը հանձնելու հարցով: Դա, ինչպես ընդգծել է ՀՀ ԱԳՆ ղեկավարը, աքսիոմա է, որը ապացույցներ չի պահանջում։ Դրա երաշխիքը, նախարարի ասելով, իրավական մեխանիզմներն են։ "Մենք բանակցություններ չենք վարում Տավուշի մարզի գյուղերը հանձնելու շուրջ", - ընդգծել է ՀՀ ԱԳ նախարարը:
Ինչ վերաբերում է Հռոմի ստատուտի հարցին, ապա, ինչպես նշել է արտաքին քաղաքական գերատեսչության ղեկավարը, միջազգային դատական հայցերը հետ կանչելու վերաբերյալ Ադրբեջանի հետ պայմանավորվածության մասին լուրերը չեն համապատասխանում իրականությանը: "Ոչ մի պայմանավորվածություն այդ կապակցությամբ չկա։ Այո, քննարկվում են բազմաթիվ տարբերակներ, բնականաբար, հասկանալով, որ դա կարող է դառնալ ընդհանուր իրավիճակի եւ միջավայրի մաս", - ասել է ՀՀ ԱԳՆ ղեկավարը, հավելելով, որ երկրի իշխանությունների ցանկացած գործողություն կհամակարգվի եւ կքննարկվի ընդհանուր դիվանագիտական ջանքերի համատեքստում։ Բացի այդ, ինչպես նշել է Միրզոյանը, երկրի ղեկավարությունը երբեք չի ասել, որ Հռոմի ստատուտը վավերացվել է "Ադրբեջանի նախագահ Իլհամ Ալիևին դատի տալու համար": "Որքան հիշում եմ, նման ձևակերպումներ երբեք չեն հնչել Հայաստանի պաշտոնատար անձանց կողմից", - նշել է Արարատ Միրզոյանը:
Նշենք, որ մարտի 13-ին լրագրողների հետ զրույցում ՀՀ տարածքային կառավարման և ենթակառուցվածքների նախարար Գնել Սանոսյանը հաղորդել էր, որ չորս գյուղերը, որոնց հավակնում է Ադրբեջանը, Հայաստանի վարչական տարածքում չեն եղել: Նա նշել էր, որ Տավուշի մարզում սահմանազատման և սահմանագծման աշխատանքները դեռ չեն սկսվել, չկան նաև կոնկրետ ժամկետներ ։ Ընդ որում, նա ընդգծել էր, որ Հայաստանն էլ շարունակում է Ադրբեջանից պահանջել 31 ոչ անկլավային գյուղերի տարածք, որոնք գտնվում են ադրբեջանական կողմի վերահսկողության տակ:
Հիշեցնենք, որ մարտի 12-ին կայացած մամուլի ասուլիսում ՀՀ վարչապետ Նիկոլ Փաշինյանը հայտարարել էր, որ Երևանը փոխադարձության հիման վրա կարող է միջազգային դատական ատյաններից հետ կանչել դատական հայցերը, բայց այդ հարցը պետք է քննարկվի բանակցային գործընթացի ամենավերջում, երբ խաղաղության պայմանագրի բոլոր դրույթները կհամաձայնեցվեն, և կողմերին մնա միայն ստորագրել այն: Ավելի վաղ Հռոմի ստատուտի վավերացման անհրաժեշտության մասին իրենց հիմնավորումներում իշխանությունները հայտարարել էին Հայաստանի տարածքում պատերազմական հանցագործություններ կատարելու համար Ադրբեջանի իշխանությունների դեմ ՄՔԴ դիմելու հնարավորության մասին: