Չորեքշաբթի, 6 Մարտի 2024 13:07

Արմինֆո. Հայաստանը ցանկանում է ավելի մոտ լինել Եվրամիությանը։ Այս մասին հայտարարել է Հայաստանում Ֆրանսիայի դեսպան Օլիվիե Դեկոտինյին՝ Defis Humanitaires առցանց ամսագրի հարցազրույցում։

 

Դիվանագետը հիշեցրել է հոկտեմբերի 17-ին Եվրախորհրդարանի առջև ՀՀ վարչապետ Նիկոլ Փաշինյանի հայտարարությունն այն մասին, որ Հայաստանը պատրաստ է զարգացնել իր հարաբերությունները Եվրամիության հետ՝ այնքանով, որքանով ԵՄ-ն պատրաստ է դրան: "Հայաստանը ողջունել է Միությանն անդամակցելու հեռանկարը, որը Վրաստանի համար բացվեց մի քանի շաբաթ առաջ։ Նա նաև Եվրամիության հետ համագործակցության խորհուրդ է անցկացրել", - շարունակել է Ֆրանսիայի դեսպանը։

 

Միևնույն ժամանակ, Դեկոտինյին կարծում է, որ ՀՀ-ում Եվրոպական միության դիտորդական առաքելությունը (EUMA) շատ լավ օրինակ է այն բանի, թե ինչ կարող է անել Եվրամիությունը՝ արդյունավետ և կոնկրետ: "Լինելով տեղերում, պարեկելով առաքելության հետ, ես կարողացա համոզվել, որ եվրոպացի դիտորդներին ջերմորեն դիմավորում են, բարեկամաբար են դիմավորում գյուղերում և ճանապարհներին, որ նրանց ներկայությունը հանգստացնում է։ Ռազմական բախումների գոտիներում ապրող այս խոցելի և մեկուսացված խմբերի համար դրանք ապացույցն են այն բանի, որ աշխարհը չի մոռանում իրենց մասին: Հանգստացնելու այս դերից բացի, այդ դիտորդական առաքելության ներկայության շնորհիվ հնարավորություն կա անաչառ տեղեկատվություն տրամադրել միջազգային հանրությանը, ինչը հիմնարար նշանակություն ունի այս տեսակի ճգնաժամի պայմաններում: Դա օգնում է ցրել պատերազմի մշուշը", - հավաստիացրել է դիվանագետը։

 

Ճշտմանը, թե որքանով է հավանական Սյունիքում EUMA-ի հզորացումը, հաշվի առնելով առկա սպառնալիքները, Ֆրանսիայի դեսպանը հիշեցրել է, որ առաքելության մանդատն ընդգրկում է Հայաստանի ողջ տարածքը, և այն կարող է գնալ ցանկացած վայր: "Նրա պարեկություններն, առաջին հերթին, վերաբերում են սահմանամերձ շրջաններին և ռազմական շփման գոտիներին։ Առաքելության լիազորությունների ավելացումը նպատակ ունի ապահովել բավարար անձնակազմ ՝ պարեկների թիվն ավելացնելու համար, և Սյունիքն ակնհայտորեն այս համատեքստում առաջնային շրջաններից մեկն է", - ասել է Դեկոտինյին:

 

Անդրադառնալով աշխարհում շարունակվող հակամարտությունների ֆոնին Հայաստանի նկատմամբ Ադրբեջանի նոր ագրեսիայի հավանականությանը ՝ դեսպանը խոստովանել է, որ չգիտի, թե ինչ մտադրություններ ունեն Ադրբեջանի իշխանությունները, քանի որ շփումներ չունի նրանց հետ:

"Բայց կարող եմ ասել, որ այս մասնատված, դեգրադացված միջազգային միջավայրում, որը դուք նկարագրում եք, վերջին տարիներին տեղի են ունեցել մի քանի ռազմական դրվագներ, որոնցում բախվել են Ադրբեջանն ու Հայաստանը, կամ Ադրբեջանն ու Լեռնային Ղարաբաղի տարածաշրջանը, և ամեն անգամ Ադրբեջանը եղել է դրանց նախաձեռնողը",- նշել է նա:

 

Հարցին, թե ինչպիսին է տեսնում Հայաստանի ապագան, Դեկոտինյին պատասխանել է, որ տեսնում է դեպի Եվրոպա շարժվելու Հայաստանի ձգտումը: "Սա է այն ժողովրդավարական հետագծի իմաստը, որը հայ ժողովուրդն ընտրել է 2018 թվականի "թավշյա հեղափոխության" ժամանակ, և որին նա աջակցում է այդ ժամանակից ի վեր ՝ չնայած փորձություններին: Այս տեսանկյունից՝ վերջերս Հայաստանի Միջազգային քրեական դատարան մուտք գործելը նույնպես շատ հզոր ազդակ է։ Սակայն դեպի Եվրոպա շրջադարձը չի նշանակում մեկուսացում նրա տարածաշրջանային շրջապատից։ Հայաստանի ապագայի կառուցումը պահանջում է խաղաղ համաձայնության հասնել Ադրբեջանի հետ, ինչպես նաեւ, ավելի լայն իմաստով, մոդուս վիվենդի, որը տարածաշրջանի բոլոր պետություններին թույլ կտա լիարժեք օգտվել իրենց ռազմավարական դիրքից, որը նրանք զբաղեցնում են Եվրոպայի, Ասիայի եւ Մերձավոր Արեւելքի խաչմերուկում: Այդ իսկ պատճառով այդ հակամարտության լուծումը կարեւոր է մեզ ՝ եվրոպացիներիս համար", - ամփոփել է ֆրանսիացի դիվանագետը։