Երկուշաբթի, 6 Նոյեմբերի 2023 15:34

Արմինֆո. Խոսելու ու լռելու գինը, կամ բաց նոթեր ԿԳՄՍ նախարար Ժաննա Անդրեասյանի գրառման առիթով: Հայոց ցեղասպանության ինստիտուտ-թանգարանի նախկին տնօրեն Հայկ Դեմոյանն այդպես է մեկնաբանել Հովհաննես Թումանյանի թանգարանի տնօրեն Անի Եղիազարյանին աշխատանքից ազատվելու պատճառների մասին Ժաննա Անդրեասյանի գրառումը։

 

«ԿԳՄՍ նախարար Ժաննա Անդրեասյանը այսօր ընդարձակ գրառումով անդրադարձավ Հովհաննես Թումանյանի թանգարանի տնօրեն Անի Եղիազարյանին պաշտոնից հեռացնելու որոշման հիմնավորմանը։ Տեքստն, ինչ խոսք, չինովնիկական հռետորաբանության գլուխգործոց է, սովետական արատավոր վարչարարության մնացուկային դասական նմուշ։ Ինչպես ասում են, ամեն ինչ տեղը տեղին մանրամասնելով տիկին նախարարը փորձել էր իր լսարանին համոզել նախարարության որոշման հիմնավոր լինելը։ Չեմ ցանկանում այս պահին դատավորի կեցվածք ընդունել և պաշտպանել որևէ մեկին։

 

Գտնում եմ, որ Անի Եղիազարյանն իր իրավունքները պետք է պաշտպանի դատական կարգով։ Ես առավել քան վստահ եմ, որ Անիի դեմ նման գործելաոճը բոլորովին այլ հիմքեր ու հիմնավորումներ ունի․․․ Կմանրամասնեմ շուտով։

 

Այսօրվա իր գրառումը տիկին նախարարը ավարտում է հետևյալ տողերով «Սա պետություն է և մենք պարտավոր ենք հարգել մեր պետությունն ու դրա կանոնները, մեզ վրա դրված պատասխանատվությանը մոտենալ ամենայն լրջությամբ, հատկապես, երբ ներկայացնում ենք պետական կառույց, առավել ևս՝ երբ ղեկավարում ենք այն»։

 

ԿԳՄՍ նախարար Ժաննա Անդրեասյանին լոկ ցանկանում եմ հիշեցնել, որ այս տարվա ընթացքում նախարարը քար լռություն պահպանեց ու ոչ մի կերպ չարձագանքեց մի շարք աղաղակող խնդիրների կապակցությամբ, որոնք հանրայնացնում էի ողջ տարվա ընթացքում։ Մասնավորապես․

• Նախարար Անդրեասյանը լռում էր, երբ ահազանգում էի դպրոցական դասագրքերի խայտառակ հրատարակությունների ու բովանդակության առթիվ

• Նախարար Անդրեասյանը լռում էր, երբ ահազանգում էի, որ Գիտությունների ակադեմիայի պատմության ինստիտուտից հարյուրավոր փաստաթղթեր ու բնօրինակ լուսանկարներ ոչնչացման են տարվել զուգարանի թղթի արտադրամաս

• Նախարար Անդրեասյանը լռության մատնեց "Հայկական թատերական ընկերության" հարուստ գրադարանի ու արխիվի ոչնչացումը զուգարանի թղթի արտադրամասում

• Նախարար Անդրեասյանը լռում էր, երբ մի ողջ բուհական գրադարան արժեքավոր ու հազվագյուտ միավորներով կրկին հայտնվել էր նույն թղթի արտադրամասում

• Նախարար Անդրեասյանը լռում էր, երբ ահազանգում էինք, որ ՀՑԹԻ տնօրեն Հարություն Մարությանը մի քանի քրեորեն հետապնդելի արարքներ է թույլ տվել, այդ թվում կոծկելով ֆինանսական կարևոր փաստաթղթերի ոչնչացման փաստը։

• Նախարար Անդրեասյանը լռում է, երբ Երևանի տարածքում ոչնչացվում են պետության պահպանության տակ գտնվող հուշարձան շենքեր ու պատմական միջավայրեր

• Նախարար Անդրեասյանը լռում է, երբ Գիտությունների ակադեմիայում խարդախ ու անօրինական ճանապարհով հինգերորդ անգամ անընդմեջ տնօրեն է ընտրվում ամեն ինչ տապալած ու բազմաթիվ կոռուպցիոն գործարքների մեջ «փայլատակած» անձը։

• Նախարար Անդրեասյանը լռում էր, երբ Գիտությունների ակադեմիայի գիտաշխատողները իրենց հարցազրույցներով ու «գիտական» հրապարակումներով առատ նյութ են մատուցում ադրբեջանական քարոզչությանը, Հայաստանի ու հայության դեմ շահեկան արշավ սկսելու համար։

• Այս տարի պատմության նոր դասագրքերի պատրաստման կապակցությամբ ամռանը հանրային հայտարարությամբ հանդես եկա, առաջարկելով ԱՆՎՃԱՐ, հասարակական հիմունքներով ծանոթանալ ու համապատասխան առաջարկներ անել խայտառակ բովանդակությամբ դասագրքեր տպագրելու արատավոր նախադեպերից խուսափելու համար։ Նախարարությունը լռեց ու չարձագանքեց իմ առաջարկին։ Արդյունքում ստացանք այն, ինչ ստացանք։ Այս կապակցությամբ մանրամասն իմ գրախոսությունը կհրապարակվի մոտ օրերս․․․Ու այս ամենը միայն 2023 թվականի կտրվածքով․․․», - գրել է Դեմոյանը՝ «Ֆեյսբուքի» իր էջում:

 

Օրեր առաջ հայտնի դարձավ Հովհաննես Թումանյանի թանգարանի տնօրեն Անի Եղիազարյանի աղմկահարույց պաշտոնանկության մասին: Ինչպես պարզաբանել է ինքը՝ Եղիազարյանը, իրեն աշխատանքից ազատելու պատճառն այն է, որ նա երկար աշխատանքային այց է կատարել արտերկիր ՝ առանց կրթության, գիտության, մշակույթի և սպորտի նախարար Ժաննա Անդրեասյանի հրամանի, թեև այցը դեռ տարեսկզբին նախատեսված էր և հաստատվել էր նախարարության կողմից: Նա նշել է, որ մեկնելուց առաջ համապատասխան դիմում է ուղարկել ԿԳՄՍՆ, սակայն իր դիմումի պատասխանը չի ստացել: Այնուամենայնիվ, նա գործուղման է մեկնել հայ համայնքի ներկայացուցիչների համար դասախոսությունների դասընթաց անցկացնելու համար։ Նրա խոսքով՝ այցը տեղի է ունեցել հրավիրող կողմի հաշվին։ Նա նաև հաղորդել է, որ բողոքարկելու է աշխատանքից ազատման որոշումը՝ օրենքի շրջանակներում: Եղիազարյանը տնօրենի պաշտոնը զբաղեցնում էր 2019 թվականից: Թանգարանն այժմ հիմնանորոգման փուլում է, ցուցադրությունը ժամանակավորապես տեղափոխվել է Հրանտ Մաթևոսյանի կենտրոն:

 

ՀՀ կրթության, գիտության, մշակույթի և սպորտի նախարարի տեղակալ Արաքսյա Սվաջյանը, մեկնաբանելով աշխատանքից ազատումը, հիշեցրել է, որ ցանկացած կազմակերպությունում աշխատանքային հարաբերությունները կառուցվում են Աշխատանքային օրենսգրքի հիման վրա, և Աշխատանքային օրենսգրքով սահմանված կարգավորումները չպահպանելու բոլոր դեպքերում ձեռնարկվում են համապատասխան միջոցներ:

 

Իսկ Անդրեասյանը ֆեյսբուքյան իր էջում հավաստիացրել է, որ մերժել է ուղեւորության վերաբերյալ Եղիազարյանի դիմումը՝ այս փուլում դրա աննպատակահարմարության, այդ թվում ՝ ֆինանսական հարցերի պատճառով ։ Նրա խոսքով՝ Եղիազարյանն անտեսել է իր որոշումը, առանց իր թույլտվության մեկնելով երկարատև գործուղման՝ դրանով իսկ խախտելով Աշխատանքային օրենսգիրքը: