Երեթշաբթի, 15 Օգոստոսի 2023 13:22

Արմինֆո.Զինված ուժերում մարդու իրավունքներին առնչվող ցանկացած հարց գտնվում է մարդու իրավունքների պաշտպանի անմիջական ուշադրության ներքո: Այդ մասին հայտարարել է ՀՀ մարդու իրավունքների պաշտպան Անահիտ Մանասյանը՝ մահացու հրազենային վիրավորում ստացած 2 հայ զինծառայողների մահվան վերաբերյալ Մարդու իրավունքների պաշտպանի աշխատակազմի նախաձեռնած քննարկումների ժամանակ:

 

ՄԻՊ գրասենյակի հաղորդագրության համաձայն, մահացու հրազենային վիրավորումով 2 զինծառայողների մասին տեղեկությունների հրապարակումից անմիջապես հետո Մարդու իրավունքների պաշտպանի աշխատակազմում նախաձեռնվել է քննարկման ընթացակարգ։

 

«Միջադեպերի հետ կապված՝ պարզաբանումներ ստանալու նպատակով գրություններ են ուղարկվել իրավասու պետական մարմիններին: Պաշտպանն ընդգծում է, որ Զինված ուժերում նման դեպքերի առկայությունը մտահոգությունների տեղիք է տալիս։ Պաշտպանը կարևորում է իրավասու պետական մարմինների կողմից ինչպես նշված գործերի արդյունավետ քննության իրականացումը, այնպես էլ համանման դեպքերի կանխարգելմանն ուղղված անհրաժեշտ միջոցառումների ձեռնարկումը։

 

Զինված ուժերում մարդու իրավունքներին առնչվող ցանկացած հարց գտնվում է Մարդու իրավունքների պաշտպանի անմիջական ուշադրության ներքո։ Պաշտպանը հետևողական է լինելու ոլորտում առկա խնդիրների հասցեավորմանն ու դրանց լուծմանն ուղղված քայլերի իրականացմանը», - ասվում է հաղորդագրությունում։

 

Հիշեցնենք, որ օգոստոսի 10-ին և 11-ին Արարատի մարզում ՀՀ ԶՈՒ զորամասերից մեկում

արձանագրվել են ժամկետային զինծառայողներ  18-ամյա Ժորա Կարապետյանի և Գրանիկ Խնկոյանի մահվան դեպքերը: Զինծառայողներից մեկը Գեղարքունիքի մարզից էր, մյուսը՝ Շիրակի։

 

ՀՀ քննչական կոմիտեում երկու դեպքերի առնչությամբ նախաձեռնվել են քրեական վարույթներ՝ ինքնասպանության հասցնելու կասկածանքով: Ոչ առաջին զինծառայողի, ոչ երկրորդի հարազատները չեն հավատում քննության պաշտոնական վարկածին։

 

Ավելին, ԱրմԻնֆո-ի տեղեկություններով, ժամկետային զինծառայող Ժորա Կարապետյանի մարմնի վրա հայտնաբերվել են ծեծի բազմաթիվ հետքեր: Հարազատները պատմել են, որ Կարապետյանը գլխի շրջանում երկու հրազենային վնասվածք ունի, ինչն՝ ինքնին, բացառում է ինքնասպանության մասին հետաքննության վարկածը: Նրանք նաև ասում են, որ նշված զորամասի կրտսեր սպայական կազմի սպաներից մեկը նորակոչիկների կողմից բանկային քարտեր ստանալու պահից, որոնցով նրանք ստացել են իրենց աշխատավարձերը, դրանք խլել է վեց զորակոչիկներից, այդ թվում ՝ Կարապետյանից: Եվ այդ քարտին փոխանցված բոլոր դրամական միջոցները, այդ թվում՝ նաև զինվորի հարազատներից, գնում էին նրա գրպանը ։ Բացի այդ, զինծառայողին պարտադրել են մարտական հերթապահություն իրականացնել ոչ միայն իր, այլև մյուս ծառայակիցների փոխարեն: Նա մշտական հիմունքով գտնվել է զինծառայողների որոշակի արտոնյալ շրջանակի ճնշման ներքո։ Իսկ "ինքնասպանության" օրը, պարզապես, հրաժարվել է ծառայակցի փոխարեն հերթապահել, ինչպես ենթադրում են հարազատները, ինչի համար էլ կյանքով է վճարել։

 

Բացի այդ, օգոստոսի 11-ին զոհված Գրանիկ Խնկոյանը Կարապետյանի բանակային ընկերն էր։ Վերջինիս հարազատների խոսքով՝ մահվանից մեկ օր առաջ նշված զորամասի սպան նրան նվաստացրել է ողջ զորքի առջև, ինչն էլ "ինքնասպանության" պատճառ է դարձել:

 

Հաշվի առնելով այն հանգամանքը, որ այժմ ընթանում են քննչական միջոցառումներ, միայն դրանց ավարտը կփարատի կամ կհաստատի զոհվածի հարազատների այդ պնդումները: