Արմինֆո.Հուլիսի 6-ին Մարտունու շրջանում ադրբեջանական կողմը խախտել է հրադադարի պահպանման ռեժիմը: Այդ մասին հաղորդել է Արցախի ներքին գործերի նախարարությունը:
«Հուլիսի 6-ին ժամը 13:50-ին, ոստիկանության Մարտունու շրջանային բաժնում հաղորդում է ստացվել, որ ժամը 12:15-ի սահմաններում, Մարտունի քաղաքի բնակիչներ` փականագործներ Բ.Ի.-ն, Ռ. Ա.-ն և էլեկտրոմանտյոր Ա.Ֆ.-ն, Բերդաշեն գյուղի վարչական տարածքում արտեզան ջրհորի նորոգման աշխատանքներ կատարելու ժամանակ, ադրբեջանական մարտական դիրքերից հրաձգային տարբեր տրամաչափի զինատեսակներով կրակ են արձակել իրենց ուղղությամբ։ Հրադադարի ռեժիմի խախտման պատճառով` դադարեցվել են նորոգման աշխատանքները: Հաղորդումը փոխանցվել է ռուսական խաղաղապահ զորակազմին», - ասվում է հաղորդագրությունում։