Երկուշաբթի, 6 Հունիսի 2022 21:59

Արմինֆո.Չինացի Զեն Թիենքին խոստանում է՝ հայկական գինին իր հետ Չինաստան է տանելու, բայց ոչ միայն իր հարազատներին հյուրասիրելու, այլ նաև բիզնես մտադրության նպատակով։ Ցանկանում է համագործակցել մի քանի գինի արտադրողի հետ: «Երևանի գինու օրերին» առաջինը կանգ է առել «Արենիի գինու գործարանի» տաղավարի մոտ. չինացի բիզնեսմենին հայտնի է նաև Արենիի գինին։

«Առաջին անգամ եմ մասնակցում «Երևանի գինու օրեր» միջոցառմանը։ Հավանում եմ գաղափարը: Ի դեպ, իսկապես տարբեր երկրներում հայտնի է հայկական գինին։ Լավ գինի է, Հույս ունեմ, որ բոլորն ըստ արժանվույն կգնահատեն հայկական գինին»,– նշում է չինացի գործարարը:

«Արենիի գինու գործարանի» տնօրեն Տիգրան Սիմոնյանը պատմում է՝ անկախացումից երեք տարի հետո են սկսել զբաղվել պրոֆեսիոնալ գինեգործությամբ։ Հիմա տարեկան 200,000 շիշ գինի են արտադրում, որի մոտ 70%-ը հենց «Արենի» տեսակի խաղողից է պատրաստվում։  Նռան գինին Արցախից բերված բերքով են պատրաստում, որն էլ ավելի է բարձրացնում համային երանգը։ Տիգրանը հիշում է՝ 5 տարեկան էր, երբ ծնողները սկսեցին գինու արտադրությամբ զբաղվել․ այդ օրվանից վարակվել է գինեգործությամբ․ հիմա գործարանի ղեկավարն է։

«Հիմնադրման ժամանակվանից փոքր մառանն եմ հիշում, թե ոնց էինք շիշը ձեռքով փակում: Այն ժամանակ ոչ մի սարքավորում չկար։ Հիմա փորձում ենք բիզնեսը զարգացնել։ Ունենք նաև մրգային գինիների տեսականի, նռից, բալից ստանում ենք գինիներ, կիսաքաղցր են հիմնականում, նորից վաճառվում են այստեղ և արտահանվում են Ռուսաստանի Դաշնություն»,– նշում է «Արենիի գինու գործարանի»  տնօրեն Տիգրան Սիմոնյանը։

Տիգրանի համոզմամբ բիզնեսը զարգացնելուն նպաստում է նաև «Երևանի գինու օրեր» միջոցառումը, քանի որ այստեղ արդեն հայնտի բրենդը էլ ավելի մեծ ճանաչելիություն է ձեռք բերում ընդամենը մի քանի օրվա ընթացքում՝ հատկապես օտարերկրացիների շրջանում։ Մեծ շուկաներ գրավելու համար նաև կարևոր է համարում ֆինանսական կառույցների հետ փոխգործակցությունը․ այս հարցում վստահում է Ակբա բանկին, որն արդեն երկրորդ անգամ իր ուսերին է վերցրել «Երևանի գինու օրերի» գլխավոր հովանավորի պարտականությունը: Այս տարի Ակբայի հետ միասին միջոցառման գործընկեր է նաև «Վիզա» միջազգային վճարային համակարգը։

«Ակբա բանկի հետ մենք շատ վաղուց ենք աշխատում, այն ժամանակից, երբ Ակբա բանկի անունը Հայգյուղփոխբանկ էր: Այդ ժամանակից ենք աշխատում նրանց հետ, շատ արդյունավետ համագործակցություն ունենք։ Հիմա էլ գործարանում նոր ներդրում ենք արել լիզինգով՝ Ակբայի օգնությամբ»,– նշում է «Արենիի գինու գործարանի»  տնօրեն Տիգրան Սիմոնյանը։

Տիգրանը չի հորդորում բացառապես իրենց արտադրանքը գնել․ ասում է՝ առաջնահերթ հարցը հայկական գինու տարածումն է աշխարհով մեկ՝ հատկապես որ անկախ գույնից՝ գինու չափավոր օգտագործումը առողջարար է և իր հերթին ապրելակերպ է թելադրում։

Մանրամասն՝ տեսանյութում: