Երեթշաբթի, 8 Փետրվարի 2022 14:49

Արմինֆո. Հորադիզ-Մեղրի-Ջուլֆա-Օրդուբադ-Երասխ երկաթգիծը պետք է ոչ միայն Հայաստանին ու Ադրբեջանին, այլեւ՝ Չինաստանին, Հնդկաստանին եւ, նույնիսկ, ԱՄՆ-ին։ ԱրմԻնֆո-ին այդպիսի կարծիք է հայտնել "Հանրապետություն" կուսակցության նախագահ, Հայաստանի նախկին վարչապետ Արամ Սարգսյանը։

 

"Եկեք, վերջապես, հասկանանք, որ, նույնիսկ, ԱՄՆ-ը Հարավային Կովկասում սեփական շահերի շրջանակ ունի։ Ամերիկացիներն այս կամ այն հայտարարությունն ու քայլերն անում են բնավ ոչ հանուն մեր գեղեցիկ հայկական աչքերի։ Նրանք հետապնդում են սեփական նպատակները, որոնք բխում են ԱՄՆ-ի տնտեսական շահերից։ Եվ այդ շահերի ճանապարհին կան խնդիրներ, որոնց լուծումը պահանջում է հաղորդակցությունների ապաշրջափակում։ Այդ թվում՝ երկաթուղիների", - ընդգծել է նա։

 

Եվ ահա նման աշխարհաքաղաքական ու աշխարհատնտեսական ֆոնին՝ Հայաստանում, ըստ Սարգսյանի, գտնվում են մարդիկ, և, նույնիսկ,  քաղաքական կուսակցություններ, որոնք պնդում են, թե այդ երկաթուղու վերագործարկումը բոլորովին ձեռնտու չէ Հայաստանին, այլ ձեռնտու է միայն Ադրբեջանին։ Եվ այդ պատճառով, պարզապես, չպետք է տեղի ունենա։ Մինչդեռ, նրա կարծիքով, հաշվի չնստել միջազգային իրողությունների, միտումների և ցանկությունների հետ, առավել ևս, դրանց հակառակվել, Հայաստանը չի կարող։

 

Փետրվարի 3-ին ՀՀ վարչապետ Նիկոլ Փաշինյանը հաղորդել է, որ Հայաստանն արդեն քննարկում է Երասխից Հորադիզ երկաթուղու կառուցման գործնական հարցերը: Այդ նպատակով փետրվարի 2-ին Հայաստան են այցելել ՌԴ փոխվարչապետ Ալեքսեյ Օվերչուկը եւ Ռուսական երկաթուղիների ղեկավար Օլեգ Բելոզերովը։ Նրանց հետ հանդիպման արդյունքներով ՀՀ փոխվարչապետ Մհեր Գրիգորյանը հայտարարել է, որ կողմերը մոտ են եռակողմ խմբի աշխատանքի առաջին արդյունքների հրապարակմանը: Փաշինյանի խոսքով ՝ քննարկվում են ճանապարհի տեխնիկական առաջադրանքը, դրա նախագծումը, ֆինանսավորումը եւ շինարարության մեկնարկը։

 

Հենց նույն Եվրոպայի համար, ըստ քաղաքական գործչի, կարեւորություն է ներկայացնում նաեւ հայ-թուրքական սահմանի ապաշրջափակումը։ Ինչը ժամանակին Ցյուրիխում Հայաստանի եւ Թուրքիայի նկատմամբ ճնշում գործադրելու պատճառ դարձավ։ Եվ ահա հիմա արդեն դրան կոչ են անում ԱՄՆ և ՌԴ նախագահները։ Այս լույսի ներքո՝ Սարգսյանը միանգամայն անտեղի է համարում Հայաստանի ղեկավարության հակազդեցությունը Վաշինգտոնի, Բրյուսելի եւ Մոսկվայի ցանկություններին։ Նա նաեւ նշել է, որ Հայաստանը կարող էր հակազդել Թուրքիայի ձգտումներին, բայց միայն այդ հարցում ունենալով միջազգային աջակցություն: Մինչդեռ, այսօր իրավիճակը ճիշտ հակառակն է։

 

"Այդ հարցում գոնե մեկ լուրջ խաղացողի աջակցության բացակայության պայմաններում մենք, պարզապես, չենք կարող հակազդել տարածաշրջանային հաղորդակցությունների ապաշրջափակման նախագծերին։ Եվ մենք պետք է նաև հասկանանք, որ փակ տնտեսությամբ, գտնվելով ԵԱՏՄ-ում, շարունակվող գնաճի պայմաններում, մենք երկար չենք ձգի։ Եվ մենք ոչինչ չենք ունենա հակադրելու մեր բնակչության արդեն իսկ նկատվող արտագաղթին։ Եվ եթե մենք ուզում ենք կանխել այս ամենը, ապա մենք պետք է սկսենք ինքներս մեզանից, մեր սեփական մտածելակերպից: Ինքնիշխան պետության մտածելակերպից, որը հաշվի է առնում իրողությունները եւ պատրաստ է հարմարվել դրանց։ Սեփական, այլ ոչ թե ուրիշի շահերից ելնելով", - ամփոփել է Սարգսյանը։