Արմինֆո. Արցախի շուրջ հակամարտության կարգավորման ուղղությամբ ԵԱՀԿ Մինսկի խմբի գործունեության վերսկսումը, անկասկած, կհանգեցնի Ալիևի ջանքերով արդեն իսկ գոյություն ունեցող սահմանային էսկալացիայի էլ ավելի ուժեղացմանը։ ԱրմԻնֆո-ին այդպիսի կարծիք է հայտնել Միջազգային հարաբերությունների և անվտանգության հայկական ինստիտուտի ղեկավար Ստեփան Սաֆարյանը։
"Սա է իմ գնահատականը՝ այս գործընթացին ուղեկցող ռիսկերին։ Եվ Հայաստանի ազգային անվտանգության ապահովման համար պատասխանատու կառույցները պետք է հստակ հասկանան դա: Նման հեռանկարը որևէ կերպ կախված չէ Մինսկի խմբում համանախագահող երկրների միջև 44-օրյա պատերազմի արդյունքում կտրուկ սաստկացած հակասություններից: Հասկանալի է, որ ԱՄՆ-ը և Ֆրանսիան, պարզապես, չէին կարող ծափահարություններով ընդունել Արցախի եւ, ավելի լայն, տարածաշրջանի վերաբերյալ պայմանական ռուսական ծրագիրը", - նշել է նա:
Մեկնաբանելով Գեղարքունիքի մարզի սահմանին ալիեւյան ագրեսիայի վերջին դրսեւորումները, որոնք Հայաստանի համար երեք զինծառայողի կյանք են արժեցել, վերլուծաբանն ընդգծել է, որ իրադարձությունների նման զարգացումն անձամբ իր համար միանգամայն սպասելի էր: Առաջին հերթին, նկատի ունենալով նախորդ տարվա ավարտին ԵԱՀԿ Մինսկի խմբի համանախագահ երկրների ԱԳ նախարարների հայտարարությունը։ Նրա խոսքով, այդ հայտարարության բովանդակությունն անհրաժեշտ բոլոր հիմքերն ստեղծել էր նման եզրակացության հանգելու համար՝ ուղեկցող ռիսկերի համապատասխան գնահատականով:
Հունվարի 11-ին ադրբեջանական զինուժը հերթական սադրանքն էր ձեռնարկել Հայաստանի հետ սահմանի արևելյան ուղղությամբ: Հատկապես ինտենսիվ կրակ են բացել Նորաբակ, Վերին Շորժա և Ներքին Շորժա գյուղերի ուղղությամբ։ Հրետանու ու անօդաչու թռչող սարքերից արձակված կրակոցները լսվել են նաև Կութ գյուղում։ Ալիևյան վարչախմբի ագրեսիայի հերթական ակտի դրսևորման հետևանքով զոհվել է երեք հայ զինծառայող, ևս երկուսը վիրավորվել են։
Ըստ Սաֆարյանի, չնայած հստակ հասցեականության բացակայությանը, Լավրովի, Բլինքենի եւ Լե Դրիանի հայտարարության բովանդակությունը բավական խիստ տոնայնություն ուներ եւ ակնհայտորեն ուղղված էր, առաջին հերթին, Ալիեւին: Մասնավորապես, դրա այն մասը, որտեղ փաստացի հիշատակվում էր ԵԱՀԿ Մինսկի խմբի համանախագահների տարածաշրջան վերադառնալու անհրաժեշտությունը։ Ընդ որում՝ ոչ միայն Երեւան եւ Բաքու։ Անհրաժեշտություն, որը հակամարտոզ կողմերը պետք է ողջունեն: Ինչին ի պատասխան՝ ադրբեջանցի բռնապետը բառացիորեն օրերս խոստացավ կասեցնել նրանց աշխատանքը։
"Եթե մենք հիշենք 44-օրյա պատերազմի ավարտից հետո նրանց առաջին այցի ընթացքում Բաքվում համանախագահներին ցուցաբերած Ալիևի կոշտ ընդունելությունը, ապա մեզ համար պարզ կդառնա, որ Վաշինգտոնում և Փարիզում մինչեւ կոկորդը կուշտ են նրա պահվածքց։ Եվ ահա հիմա համանախագահները պատրաստվում են այցելել տարածաշրջան, իսկ Ալիևն իր հայտարարություններով ու սպանություններով սահմանին կրկին հասկացնում է, որ ինքը բոլորովին չի սպասում ոչ միայն դեկտեմբերին հնչեցված օրակարգին, այլև՝ հենց իրենց։ Այսպիսով, այն, ինչ տեղի է ունենում մեր սահմանին, Ալիևի և ԵԱՀԿ Մինսկի խմբի միջև դիմակայության մի մասն է", - ամփոփել է Սաֆարյանը։