Արմինֆո.Հայաստանի կառավարությունը՝ ի դեմս Աշխատանքի եւ սոցիալական հարցերի նախարարության, օրենսդրական փոփոխություններ է նախաձեռնում Աշխատանքային օրենսգրքում եւ "Քաղաքացիական ծառայության մասին" ՀՀ օրենքում, որպեսզի օրինական հիմքերով գործատուն կարողանա աշխատանքից ազատել աշխատակցին՝ պատվաստումից կամ COVID-19-ի ՊՇՌ-թեսթի բացասական արդյունքը ներկայացնելուց հրաժարվելու դեպքում:
Փաստաթղթի վերաբերյալ իրենց դիրքորոշումը քաղաքացիները կարող են արտահայտել e- draft.am իրավական ակտերի միասնական պորտալում՝ մինչեւ հոկտեմբերի 25-ը:
"Նախագծերով առաջարկվում է Աշխատանքային օրենսգրքում և «Հանրային ծառայության մասին» օրենքում կատարել լրացումներ և փոփոխություն, որոնցով սահմանվում են աշխատողին աշխատանքի չթույլատրելու, գործատուի կողմից աշխատանքային պայմանագիրը լուծելու, հանրային պաշտոն զբաղեցնող անձին կամ հանրային ծառայողին աշխատանքի չթույլատրելու և լիազորությունների դադարեցման կամ զբաղեցրած պաշտոնից ազատելու հիմքերն այն դեպքերի համար, երբ աշխատանքի ներկայանալիս աշխատողի կողմից չի ներկայացվում բնակչության սանիտարահամաճարակային անվտանգության ապահովման մասին օրենսդրությամբ սահմանված՝ աշխատանքի ներկայանալու անհրաժեշտ պայման հանդիսացող փաստաթղթերը", - ասվում է փաստաթղթի հակիրճ բնոութագրում:
Այսպես, Հայաստանի իշխանություններն առաջարկում են 2004 թվականի նոյեմբերի 9-ի Աշխատանքային օրենսգրքի 108-րդ հոդվածը լրացնել նոր 1.1 հոդվածով. «1.1. Աշխատանքի ներկայանալիս բնակչության սանիտարահամաճարակային անվտանգության ապահովման մասին օրենսդրությամբ սահմանված՝ վարակիչ հիվանդությունների տարածման կանխարգելմանն ուղղված սանիտարահամաճարակային անվտանգության կանոններով նախատեսված` աշխատանքի ներկայանալու անհրաժեշտ պայման հանդիսացող փաստաթղթերը աշխատողի կողմից չներկայացնելու դեպքում գործատուն աշխատողին չի թույլատրում գտնվելու աշխատավայրում, կատարելու իր աշխատանքային պարտականությունները և չի վճարում աշխատավարձ մինչև սույն մասով նախատեսված փաստաթղթերը ներկայացնելը:»::
Իսկ "Պետական ծառայության մասին" օրենքի փոփոխություններով օրենսդիրը, մասնավորապես, սահմանում է. : " իր աշխատանքային (ծառայողական) պարտականությունների կատարումը չթույլատրվելու հետևանքով ավելի քան 30 օր անընդմեջ կամ վերջին տասներկու ամսվա ընթացքում` ավելի քան 50 օր աշխատանքային (ծառայողական) պարտականությունները չկատարելը հանրային պաշտոն զբաղեցնող անձին պաշտոնից ազատելու կամ հանրային ծառայողի լիազորությունները դադարեցնելու (ծառայությունից ազատելու կամ ծառայությունը դադարեցնելու) հիմք է: Սույն մասով նախատեսված հիմքի ի հայտ գալու դեպքում երեք աշխատանքային օրվա ընթացքում ընդունվում է համապատասխանաբար հանրային պաշտոն զբաղեցնող անձին պաշտոնից ազատելու կամ հանրային ծառայողի լիազորությունները դադարեցնելու (ծառայությունից ազատելու կամ ծառայությունը դադարեցնելու) մասին համապատասխան իրավական ակտ, եթե պաշտոնից կամ ծառայությունից ազատելու (լիազորությունները կամ ծառայությունը դադարեցնելու) այլ ժամկետ սահմանված չէ օրենսդրությամբ":
Հիշեցնենք, որ ավելի վաղ ՀՀ առողջապահության նախարարությունը փոփոխություններ էր կատարել հակահամաճարակային նորմերի պահպանման պահանջներում, որոնք պետք է ուժի մեջ մտնեին հոկտեմբերի 1-ից եւ անդրադառնային մի շարք ոլորտների աշխատակիցների: Մասնավորապես, առողջապահության նախարարի 65 N որոշման համաձայն, հոկտեմբերի 1-ից աշխատողները պարտավոր են գործատուին յուրաքանչյուր 14 օրը մեկ ներկայացնել ՊՇՌ-թեսթի բացասական արդյունք։ Թեստավորման վկայականը պետք է ստացվի 72 ժամից ոչ ուշ, թեստը կատարվում է աշխատակցի հաշվին: Սահմանափակումները չեն վերաբերում այն անձանց, ովքեր անցել են պատվաստման ամբողջական կուրս, կամ ստացել են դեղամիջոցի մեկ չափաբաժին եւ սպասում են երկրորդ դեղաչափին, հղիներին եւ նրանց, ովքեր ունեն պատվաստման ժամանակավոր կամ մշտական հակացուցումներ: Սեպտեմբերի 30-ին ՀՀ արդարադատության նախարարությունը հայտարարություն էր տարածել, որում ասվում էր, որ մի շարք ոլորտների աշխատակիցների համար ՊՇՌ-թեստերի արդյունքների պարտադիր տրամադրման ժամկետը հետաձգվել է մինչեւ հոկտեմբերի 14-ը:
Այնուամենայնիվ, կառավարության վերջին նիստում առողջապահության նախարար Անահիտ Ավանեսյանը բողոքել է բնակչության պատվաստման ցածր տեմպերից, ինչին վարչապետ Նիկոլ Փաշինյանը շատ բուռն է արձագանքել։ Նա պահանջել է օգտագործել ողջ վարչական ռեսուրսը և այսուհետ իրեն չդիմել նման բողոքներով։ Վարչապետը ԱԱԾ և ոստիկանության ղեկավարներին հանձնարարել է ուսումնասիրել նաև "կեղծ պատվաստումների" մասին ահազանգերը, անհապաղ ձերբակալել և կալանավորել անբարեխիղճ բժիշկներին: "Որպեսզի պետական կառավարման համակարգում չլինի ոչ մի չպատվաստված աշխատակից, այլապես դրա ողջ պատասխանատվությունը կընկնի այդ կառույցների առաջին դեմքերի վրա", - հայտարարել է նա:
Բացի այդ, ինչպես հայտարարել է Փաշինյանը, այսօր Հայաստանում ձևավորվում է շարժում, որը կոչ է անում կորոնավիրուսից բուժումը վճարովի դարձնել։ Նրա խոսքով ՝ այդ մարդիկ հարց են տալիս, թե ինչու պետք է վճարեն հարկեր, որպեսզի մարդիկ չպատվաստվեն ու հիվանդանան, չէ որ այդ միջոցները կարող էին ուղղվել դպրոցներին, սոցիալական կարիքներին և այլն։ Նույն երեկոյան առողջապահության նախարարությունը հայտարարել է, որ, հնարավոր է, արդեն այս տարվա դեկտեմբերից կորոնավիրուսի բուժումը պատվաստում չանցած Հայաստանի քաղաքացիների համար մոտ ապագայում վճարովի դառնա: Ինչպես պարզաբանել է առողջապահության նախարարի մամուլի քարտուղար Հռիփսիմե Խաչատրյանը, հարցն արդեն քննարկվում է նախարարությունում: "Խոսքը բավականին թանկարժեք բուժման մասին է ։ Քաղաքացիների բուժումը կարժենա 800 հազար դրամ (մոտ 1,7 հազար դոլար)", - նշել է նա։
Ուշագրավ է, որ աշխատողի ազատման համար օրինական հիմքեր սահմանելու մասին օրենսդրական նախաձեռնությունը իրավական ակտերի միասնական պորտալում զետեղվել է հաջորդ օրը՝ հոկտեմբերի 8 - ին: