Արմինֆո."Այն փաստը, որ Հայաստանը հայտնվել է ռազմական մեկուսացման մեջ, դա արդեն ագրեսիայի ձեւ է նրա դեմ", - "Վզգլյադ" թերթին ասել է ռազմական փորձագետ Կոնստանտին Սիվկովը՝ մեկնաբանելով Պետդումայի պատգամավոր Կոնստանտին Զատուլինի հայտարարությունը Հայաստանում Ռուսաստանի դեսանտային գործողության հնարավորության մասին:
"Նախ՝ Հայաստանում ռուսական ռազմակայան կա Գյումրիում։ Այնտեղ տեղակայված ստորաբաժանումները բավական են, որպեսզի ազդեցություն ունենան Լեռնային Ղարաբաղում զինված դիմակայության ելքի վրա, - ասել է ռազմական գիտությունների դոկտոր Կոնստանտին Սիվկովը։ - Երկրորդ, ինչ վերաբերում է Գյումրիի ռազմակայանից դուրս ռուսական զորքերի եւ ավիացիայի գործողություններին, ապա այստեղ ստիպված կլինեն հարցը լուծել Վրաստանի տարածքով օդային միջանցքը "բացելու" ճանապարհով"։
"Կամ, հաշվի առնելով Ռուսաստանի եւ Ադրբեջանի ընդհանուր սահմանը եւ այն փաստը, որ իրավիճակի բացասական զարգացման դեպքում մենք ստիպված կլինենք մարտական գործողություններ վարել հենց այդ երկրի դեմ, "խաղաղության պարտադրման" խնդիրը կարող է լուծվել ուղղակիորեն Ադրբեջանին ավիահարվածների միջոցով՝ Լեռնային Ղարաբաղի եւ Հայաստանի ապաշրջափակման նպատակով", - հավելել Է զրուցակիցը:
"Այսօրվա դրությամբ հայ-ադրբեջանական հակամարտությանը Ռուսաստանի մասնակցության համար գոյություն ունի առնվազն երկու միանգամայն օրինական հիմք։ Առաջինն այն է, որ Հայաստանը հայտնվել է մեկուսացման մեջ ։ Դա ինքնին ագրեսիայի ձև է։ Երկրորդ՝ Ադրբեջանը հարվածում է Հայաստանի տարածքին, այլ ոչ թե Լեռնային Ղարաբաղին։ Պաշտոնական Բաքուն ուղղակիորեն հայտարարում է ինչ-որ Ս-300-ների ոչնչացման մասին։ Նման համալիրներ չկան Ղարաբաղի տարածքում, բայց դրանք կան Հայաստանում", - նշել է Սիվկովը։
"Սա էլ ագրեսիայի ձև է, Իսկ եթե այդպես է, գործողության մեջ է մտնում Հավաքական անվտանգության պայմանագրի 4-րդ հոդվածը։ Եվ ՀԱՊԿ-ն այդ դեպքում պետք է հանդես գա ի պաշտպանություն իր անդամներից մեկի։ Պատկերացրեք, եթե ինչ - որ երկիր հարձակվեր ՆԱՏՕ-ի անդամ Լեհաստանի կամ բալթյան երկրներից մեկի վրա։ Այդ դեպքում Հյուսիսատլանտյան դաշինքի բոլոր մասնակիցները պատերազմ կսկսեին այդ երկրի դեմ։ Այստեղ նույնն է", - պարզաբանել է փորձագետը։
"Այդ ամենից զատ՝ Հայաստանը մտնում է Եվրասիական տնտեսական միության (ԵԱՏՄ) մեջ։ Այդ երկրի շրջափակումն ուղղակի վնաս է հասցնում Ռուսաստանին, քանի որ մենք այնտեղ լուրջ տնտեսական շահեր ունենք։ Ուստի՝ Հայաստանի կողմից Ադրբեջանի դեմ հակամարտության մեջ մտնելու հիմքերն ավելի քան բավարար են։ Սակայն դրա համար անհրաժեշտ է Հայաստանի կողմից ՀԱՊԿ-ին հարցում, իսկ դրա դեռ չկա։ Դա, իմ կարծիքով, խոսում է այն մասին, որ Երեւանի գործերը հակամարտության մեջ այնքան էլ վատ չեն, որքան այդ մասին հայտարարում է Ադրբեջանը", - ընդգծել Է զրուցակիցը։
"Իսկ եթե դիմում լինի, ապա Ռուսաստանի միջամտությունը, ըստ ՀԱՊԿ-ի նորմերի, ոչ թե պարզապես հնարավոր կլինի, այլ՝ պարտադիր։ Հակառակ դեպքում՝ հավաքական անվտանգության պայմանագիրը կդադարի գոյություն ունենալ։ Դրանից հետո կփլուզվի ԵԱՏՄ-ն, և Ռուսաստանը կդադարի միջազգային ասպարեզում ընկալվել որպես լուրջ ուժ, որն ի զորու է պաշտպանել իր դաշնակիցներին։ Դա շատ լուրջ հարված կլինի մեր երկրի հեղինակությանը", - եզրափակել է Կոնստանտին Սիվկովը։