Հինգշաբթի, 2 Մայիսի 2019 21:03

Արմինֆո.

 

Երևան: 02.05.19: ԱրմԻնֆո: Ասյա Բալայան: Մի շարք պաշտոնյաների համաձայնությամբ

Ամբերդ ամրոցի տարածքը 2013 թվականին դուրս է բերվել մշակութային ժառանգության օբյեկտի պահպանության գոտուց: Այդ մասին մայիսի 2-ին մամուլի ասուլիսի ժամանակ հայտարարել է մշակույթի փոխնախարար Տիգրան Գալստյանը՝ անդրադառնալով պատմամշակութային արգելոցի պահպանվող գոտու մոտակայքում տեղի ունեցող շինարարական աշխատանքներին։

 

Ինչպես պարզաբանել Է Գալստյանը, Մշակույթի նախարարությունը դիմել է դատախազություն՝ պարզելու համար, թե ինչու է փոխվել Ամբերդի եւ նրա շրջակայքի պահպանության գոտին։ Ինչպես նշել է Գալստյանը, այսօրվա դրությամբ շինարարական աշխատանքները կասեցվել են։

 

Գալստյանը հավաստիացրել է, որ դատախազություն հարցում է ուղարկվել՝ պարզելու, թե ինչ հիմքով են հուշարձանի շրջակայքը հանել պահպանվող գոտուց: Այս կապակցությամբ նրանք պարզաբանումներ են ակնկալում մշակութային ժառանգության պահպանման գիտահետազոտական կենտրոնից։

 

Փոխնախարարը խոստովանել է, որ 2018 թվականի վերջին տեղեկացվել է օբյեկտի կառուցման նախագծի մասին, բայց քանի որ տարածքը փաստացի հատուկ պահպանվող գոտի չէր, նախարարությունը որեւէ եզրակացություն անելու կամ դրա կառուցման թույլտվություն տալու լիազորություն չուներ: Նա միայն խոստովանեց, որ նախարարությանը շատ տարօրինակ թվաց, թե ինչու հուշարձանի հարևանությամբ գտնվող հատվածը գտնվում է իր գոտուց դուրս։ Դրանով լիազոր գերատեսչության գործողությունները սահմանափակվել են, եւ միայն  ԶԼՄ-ներում և սոցիալական ցանցերում բարձրացված աղմուկից հետո նախարարությունը հանկարծ ձեռնարկել է որոշակի քայլեր՝ բացի տարակուսանք արտահայտելուց։  Պարզվել է, որ դատախազություն դիմելու լիազորություն գերատեսչությունն, այնուամենայնիվ, ունի։

 

Նշենք, որ ամրոցի տարածքի փոփոխության համաձայնությունը ստորագրած պաշտոնյաների ցանկում են գիտարշավների ղեկավար Հակոբ Սիմոնյանը, մշակույթի նախկին փոխնախարար Արթուր Պողոսյանը, Արագածոտնի նախկին մարզպետ Սարգիս Սահակյանը։

 

Փոխնախարարի հավաստմամբ, գերատեսչությունն իրավունք ունի արգելել շինարարական աշխատանքների իրականացումը, եթե խախտվեն հուշարձանի պատմական, մշակութային շերտերը: ՙՀաշվի առնելով այն փաստը, որ փորված հատվածում հայտնաբերվել են խեցեղենի և մարդկային ոսկորների բեկորներ, կարելի է ասել ՝ խախտումներ են եղել, սակայն մենք պետք է սպասենք դատախազության որոշմանը՚, - ասել է նա, տեղեկացնելով, որ սեփականաշնորհված տարածքի սեփականատերը ոմն Սիրակ Մանուկյան է, որի հայրը ՙՊատմամշակութային արգելոց - թանգարանի և մշակութային միջավայրի պահպանության ծառայություն՚ ՊՈԱԿ-ի Արագածոտնի մարզային բաժանմունքի ղեկավար Մանուկ Մանուկյանն է: Նա ավելի վաղ պարզաբանել էր, որ 2000 քմ մակերեսով հողատարածքը 2017 թվին ձեռք է բերվել 8 մլն դրամով։    Գալստյանը նաեւ նշել է, որ կոռուպցիոն սխեմաների առկայության եւ պաշտոնեական լիազորությունների չարաշահման մասին խոսելը վաղաժամ է, հայտարարելով, որ Մշակույթի նախարարությունը Մանուկ Մանուկյանին աշխատանքից ազատելու լիազորություն չունի ՝ հասարակությանը կոչ անելով սպասել դատախազության արձագանքին:

 

Բացի այդ, փոխնախարարն ընդգծել է, որ շինարարական աշխատանքները գլխավոր հատակագիծ չունեն, իսկ հուշարձանի մոտակայքում գտնվող սննդի կետը ներառված չէ նախագծի ծրագրում: