Արմինֆո. Ադրբեջանի նախագահ Իլհամ Ալիևը հուսով է, որ Հայաստանի նոր ղեկավարությունը չի կրկնի ղարաբաղյան հակամարտության կարգավորման հարցում «նախկին իշխանությունների սխալները», լուրջ աշխատանք կկատարի ղարաբաղյան հակամարտության շուտափույթ կարգավորման համար: Այդ մասին Ալիևը հայտարարել է Ռամազան ամսվա առթիվ կազմակերպված իֆթարի արարողության ժամանակ:
Միաժամանակ նա կրկին ընդգծել է, որ ղարաբաղյան հակամարտությունը պետք է կարգավորվի միայն միջազգային նորմերի ու սկզբունքների հիման վրա: «Լեռնային Ղարաբաղը մեր պատմական հողն է, մենք այդ իրողությունները հասցնում ենք ողջ աշխարհին: Վստահ եմ, որ հետևողական քաղաքականություն իրականացնելով՝ կվերականգնենք մեր երկրի տարածքային ամբողջականությունը: Ես կասկած չունեմ դրանում»,- հայտարարել է Ադրբեջանի նախագահը:
Նրա հավաստմամբ, այն, ինչ ինքն ասել է տարիներ շարունակ, այսօր այդ մասին խոսում է հայ ժողովուրդը: «ՄԱԿ-ի ամբիոնից ես մերկացրել եմ Հայաստանի նախկին քրեական ռեժիմին: Ես Հայաստանի նախկին իշխանությունը անվանել եմ արյունախում, կրիմինալ, ավազակային վարչակարգ: Այս ամենն իրողություն է: Այսօր հայ ժողովուրդը վերջապես հասկացել է, որ 20 տարիների ընթացքում նրանց ղեկավարել է կրիմինալ խունտայի վարչակարգը: Վարչակարգ, որը միայն իր շահերն է հետապնդել, որի հանցագործ գործունեության հետևանքով Հայաստանը հայտնվել է նման ցավալի վիճակում: Հուսով եմ, որ Հայաստանի նոր ղեկավարությունը չի կրկնի նախկին իշխանության սխալները, լուրջ աշխատանք կկատարի հակամարտության շուտափույթ կարգավորման համար և մեկնարկ կտրվի իրական, այլ ոչ թե՝ հանուն իմիտացիայի, բանակցային գործընթացին: Այդպիսով՝ խնդիրը կարող է լուծում ստանալ, և Կովկասում կարող է խաղաղություն տիրել»,- եզրափակել է Ալիևը:
ԿԱՐԴԱԼ ԲՈԼՈՐ ՄԵԿՆԱԲԱՆՈՒԹՅՈՒՆՆԵՐԸ