Արմինֆո. Իսրայելի վարչապետ և արտաքին գործերի նախարար Բենիամին Նեթանյահուն ընդունել է երկրի արտաքին գործերի նախարարության հանձնարարականը Հայոց ցեղասպանության ճանաչման օրինագծի շուրջ Քնեսեթում քննարկումները մինչև Թուրքիայում հունիսի 24-ին նշանակված վաղաժամկետ խորհրդարանական ընտրությունների ավարտը հետաձգելու մասին։ Այս մասին նշված է Իսրայելի ԱԳՆ մամուլի ծառայության կողմից հունիսի 3-ին տարածված կոմյունիկեում, հայտնում է ՏԱՍՍ-ը:
«Վարչապետ Նեթանյահուն ընդունել է ԱԳՆ հանձնարարականը Հայոց ցեղասպանության մասին օրենքի շուրջ խորհրդարանական քննարկումները մինչև Թուրքիայում հունիսի 24-ին նշանակված խորհրդարանական ընտրությունների ավարտը տեղափոխելու մասին, քանի որ այդ հարցի քննարկումը նախապես նշանակված օրը կարող էր օգտագործվել Թուրքիայի նախագահ Ռեջեփ Թայիփ Էրդողանի նախընտրական քարոզարշավում»,-ասված է փաստաթղթում։ Իսրայելական Kan պետական ռադիոյի տվյալներով, Հայոց ցեղասպանության ճանաչման մասին հարցի քննարկումը նախատեսված էր հունիսի 3-ին։
Ավելի վաղ ԱրմԻնֆո-ն հայտնել էր, որ Իսրայելի Քնեսետի խոսնակ Յուլի Էդելշտեյնը խորհրդարանում քննարկումից հանել է Հայոց ցեղասպանության ճանաչման հարցը: ԶԼՄ-ների հաղորդումների համաձայն, բանաձևը Քնեսետում քվեարկության պետք է դրվեր մայիսի 29-ին: Քնեսետի մամուլի խոսնակի հավաստմամբ, Էդելշտեյնը հարցը քննարկումից հանել է անհարմար դրությունից խուսափելու համար, քանի որ վստահ չէին, թե արդյոք մեծամասնությունը կողմ կքվեարկի: Ուշագրավ է, որ Էդելշտեյնը բազմիցս հայտարարել էր, որ կողմ է Հայոց ցեղասպանույթյան ճանաչմանը: «Մերեց՚ կուսակցության առաջնորդ Տամար Զանբերգը, ով առաջարկությունը ներկայացրել էր խորհրդարան, Էդելշտեյնին մեղադրել է քաղաքականությունը բարոյականությունից վեր դասելու համար: «Քնեսետը պետք է կատարի խոստումը: Դա պատմական արդարության հարց է՚, - հայտարարել է «Մերեցի՚ առաջնորդը: Հիշեցնենք, որ Քնեսետում Հայոց ցեղասպանության ճանաչման վերաբերյալ բանաձևի հերթական քննարկումը նախաձեռնվել էր Թուրքիայի և Իսրայելի միջև հարաբերությունների կտրուկ վատթարացան ֆոնին, և Իսրայելի մի քանի նախարարներ ու խորհրդարանականներ կոչ էին արել ճանաչել Հայոց ցեղասպանությունը:
ԿԱՐԴԱԼ ԲՈԼՈՐ ՄԵԿՆԱԲԱՆՈՒԹՅՈՒՆՆԵՐԸ