Արմինֆո.Պուտին-Էրդողան գործարքի արդյունքում Արցախի տարածքների հանձնումը չի կարող ապահովել հայկական շահերի երկարաժամկետ իրականացում և խաղաղության պահպանում, առաջին հերթին, նման գործարքի մասնակիցների կողմից մեր շահերն այլոց կողմից հարգելու որևէ երաշխիքների բացակայության պատճառով: ԱրմԻնֆո-ին այդպիսի կարծիք է հայտնել ԼՂՀ նախկին արտգործնախարար, անկախ վերլուծաբան Արման Մելիքյանը:
Ռուսաստանի իր պաշտոնակից Վլադիմիր Պուտինի հետ հանդիպման նախաշեմին Թուրքիայի նախագահ Ռեջեփ Թայիփ Էրդողանը հայտարարել է հանդիպման ընթացքում, ի թիվս այլ հարցերի, ղարաբաղյան խնդրի քննարկան մասին: Էրդողանը ենթադրություն է հայտնել, որ եթե Ռուսաստանի իր պաշտոնակիցը կենտրոնանա այդ խնդրի վրա, այն «հեշտությամբ կլուծվի՚:
«Արցախին առնչվող Էրդողանի առաջարկությունները Մոսկվան կարող է ընդունել բացառապես այն պայմանով, եթե դրանք համապատասխանեն տարածաշրջանում ռուսականն ազդեցության խորացմանն ու ամրապնդմանը: Այդ լույսի ներքո` առավել հավանական է թվում Ադրբեջանին հանձնված արցախյան տարածքներում ռուս խաղաղապահների տեղակայման դիմաց Հայաստանի հետ սահմանը բացելու Անկարայի առաջարկությունը՚, - ենթադրություն է հայտնել վերլուծաբանը:
Նրա գնահատմամբ, այդպիսով Ռուսաստանը կընդլայնի իր ռազմական ներկայությունը տարածաշրջանում, Ադրբեջանը կստանա Արցախի տարածքի կեսից ավելին` առանց արցախցիների ինքնորոշման իրավունքը ճանաչելու, Հայաստանը կստանա դեպի Արևմուտք ցամաքային ճանապարհներ, իսկ Թուրքիան` Հայաստանով դեպի Ադրբեջան տարանցման նոր հնարավորություններ` արդեն ողջ Հարավային Կովկասում սեփական ազդեցության էական մեծացմամբ:
Վերլուծաբանը խնդիր է տեսնում հայկական կողմի ձեռքբերումների ժամանակավոր բնույթի առնչությամբ` Թուրքիայի, Ռուսաստանի և Ադրբեջանի երկարաժամկետ ձեռքբերումների ռազմավարական բնույթի ֆոնին: Նրա գնահատմամբ, հայկական կողմի ձեռքբերումներն ամբողջապես կախված կլինեն ռուսների և Թուրքերի բարի կամքից, իսկ Թուրքիան նաև հեշտությամբ կարող է ինչպես այսօր բացել Հայաստանի հետ սահմանը, այնպես էլ` վաղն այն փակել: Նույն կերպ կարող են վարվել նաև ռուսները, ում վերահսկողության տակ է հայ-թուրքական սահմանը:
ՌԴ նախագահի օգնական Յուրի Ուշակովի ասելով, Վլադիմիր Պուտինը Թուրքիայի իր պաշտոնակից Ռեջեփ Թայիփ Էրդողանի հետ հանդիպելու է նոյեմբերի 13-ին Սոչիում: Նախագահները կքննարկեն երկկողմ համագործակցությունը, ինչպես նաև Սիրիայում առկա իրավիճակը, մասնավորապես` Սիրիայի ժողովուրդների կոնգրեսին և ազգային երկխոսության կոնգրեսին նախապատրաստվելը:
ԿԱՐԴԱԼ ԲՈԼՈՐ ՄԵԿՆԱԲԱՆՈՒԹՅՈՒՆՆԵՐԸ