Ուրբաթ, 29 Սեպտեմբերի 2017 13:27

Արմինֆո. Ադրբեջանը միջազգային հետախուզում է հայտարարել Արցախ այցելած թուրք մտավորականության ներկայացուցիչների նկատմամբ:

 

Ինչպես հայտնում է ԱՊԱ-ն, Ադրբեջանում այդ փաստի առնչությամբ արդեն քրեական գործ է հարուցվել: ԱՀ Գլխավոր դատախազության տարածած հաղորդագրության մեջ նշվում է, որ հիմնավորված կասկածներ կան այն մասին, որ 2017 սեպտեմբերի 22-ին Թուրքիայի Հանրապետության քաղաքացիներ Ուֆուք Արասը, Ալի Բայրամօղլուն, Սաիդ Չեքինօղլուն և Էրոլ Քաթըրջըօղլուն, դիտավորյալ հատել են Ադրբեջանի Հանրապետության միջազգայնորեն ճանաչված պետական սահմանը՝ առանց գործադիր իշխանության համապատասխան մարմնի փաստաթղթերի և համաձայնության, շրջանցելով պետական սահմանի անցակետը, այսինքն՝ Հայաստանի տարածքով «ապօրինի այցելել են Ստեփանակերտ և այլ բնակավայրեր»:  Այդ առնչությամբ 2017 թ. սեպտեմբերի 28-ին Գլխավոր դատախազության ծանր հանցագործությունների քննչական վարչությունում հարուցվել է քրեական գործ ՔՕ 318.2 հոդվածով, այն է՝ Ադրբեջանի Հանրապետության պետական սահմանի ապօրինի հատում։ Նրանց նկատմամբ հայտարարվել է միջազգային հետախուզում:

 

Թուրք մտավորականության ներկայացուցիչների այցն իր հերթին բացասական արձագանք է գտել Թուրքիայի քաղաքական շրջանակներում: Թուրքիայի խորհրդարանի պատգամավոր, Ազգայնական շարժում կուսակցության անդամ Աթիլա Կայան դատապարտել է Թուրքիայի քաղաքացիների կողմից Արցախ այցելությունը և նրանց կողմից հակաթուրքական և հակաադրբեջանական հայտարարություններ անելը. «Դատապարտում եմ մարդկանց, ովքեր, այցելելով Ադրբեջանի տարածքների 20%-ն օկուպացրած Հայաստան, այնտեղ հանդես են գալիս Թուրքիայի և Ադրբեջանի դեմ հայտարարություններով»:

 

Ժողովրդահանրապետական կուսակցությունից պատգամավոր Դուրսուն Չիչեքի խոսքով, «Ադրբեջանի օկուպացված տարածք այցելած այդ մարդկանց պետք չէ լրջորեն վերաբերել: Դա հակասում է միջազգային իրավունքին, նրանց խոսքը որևէ ուժ չունի: Դա նրանց անձնական կարծիքն է, այն չի կարող ստվեր նետել թուրք-ադրբեջանական բարեկամությանվրա»:

 

«Վաթան» կուսակցության ղեկավար Դողու Փերինչեքը նշված անձանց մեղադրել է «օկուպանտներին» աջակցելու մեջ: «Այդ մարդիկ այցելել են Լեռնային Ղարաբաղ, որպեսզի խանգարեն տարածքները վերադարձնելու Ադրբեջանի արդար պայքարին: Սակայն, նրանց փորձերը դատապարտված են ձախողման, մենք միացյալ ուժերով կվերականգնենք եղբայրական Ադրբեջանի տարածքային ամբողջականությունը»:

 

Չնայած Թուրքիայի քաղաքական շրջանակներում կոշտ արձագանքին՝ Ուֆուք Արասը, Ալի Բայրամօղլուն, Սաիդ Չեքինօղլուն և Էրոլ Քաթըրջըօղլուն չեն ափսոսում Հայաստան ու Արցախ իրենց այցելության համար և մտադիր չեն վերանայել այցի ընթացքում արված հայտարարությունները: Այդ մասին ԱրմԻնֆո-ի թղթակցի հետ զրույցում հավաստիացրել է Արևմտահայոց ազգային համագումարի համանախագահ Արագած Ախոյանը, ում նախաձեռնությամբ թուրք մտավորականության ներկայացուցիչներն այցելել են Հայաստան և Արցախ: Նրա խոսքով,  Ուֆուք Արասը, Ալի Բայրամօղլուն, Սաիդ Չեքինօղլուն և Էրոլ Քաթըրջըօղլուն սկզբունքային մարդիկ են, լավ գիտակցել են իրենց արարքի հետևանքները և մտադիր չեն վերանայել իրենց դիրքորոշումը, քանի որ արդարության մարտիկներ են: Ըստ որում, Ախոյանը դժվարացել է կանխատեսել նրանց ճակատագիրը՝ հաշվի առնելով, որ «գործ ունենք Թուրքիայի և Ադրբեջանի նման երկրների հետ, որտեղ չեն գործում ժողովրդավարության նորմեր»: