Հինգշաբթի, 24 Օգոստոսի 2017 14:46

Արմինֆո.ԵԱՀԿ Մինսկի խմբի ամերիկացի համանախագահ Ռիչարդ Հոգլանդի հայտարարությունը ղարաբաղյան հակամարտության կարգավորման հիմնական կետերի վերաբերյալ վերջնագիր չէ, գտնում է ԼՂՀ նախագահի մամուլի քարտուղար Դավիթ Բաբայանը:

 

«Այդ փաստաթուղթը վերջնագիր կամ պարտադրանք չէ: Դա ԱՄՆ տեսլականն է ղարաբաղյան հակամարտության կարգավորման վերաբերյալ: Եվ այդ տեսլականում երկու առանցքային կետ կա՝ ղարաբաղյան հակամարտության խաղաղ կարգավորում և այն, որ ԱՄՆ-ը Արցախն Ադրբեջանի կազմում չի տեսնում»,- հայտարարել է Բաբայանն ԱրմԻնֆո-ի թղթակցի հետ զրույցում: Ըստ որում, նա ընդգծել է, որ անցյալին վերադարձ չկա, քանի որ Արցախը ԼՂԻՄ սահմաններում / ինչպես ասվում է Հոգլանդի հրապարակած կետերում-խմբ./ «թնդանոթի միս» կդառնա, և Ադրբեջանը չի դիմանա ուժային կարգավորման գայթակղությանը, քանի որ Բաքուն երբեք չի թաքցրել, որ տեսնում է հակամարտության կարգավորման միայն մեկ ճանապարհ՝ Ադրբեջանի, այսպես կոչված, տարածքային ամբողջականության վերականգնում: «Պաշտոնական Բաքուն բազմիցս ընդգծել է, որ երկրորդ հայկական պետություն չի լինի»,- հիշեցրել է Բաբայանը:

 

Միաժամանակ ԼՂՀ նախագահի պաշտոնական ներկայացուցիչը հիշեցրել է, որ Ստեփանակերտը բազմիցս հայտարարել է բանակցությունների լիարժեք ձևաչափի վերականգնման անհրաժեշտության մասին: Նրա խոսքով, Արցախը պետք է ներգրավված լինի բանակցությունների բոլոր փուլերին, հակառակ դեպքում՝ լիարժեք կարգավորման հասնել չի լինի: «Երկրորդ՝ մենք միշտ ասել ենք, որ հակամարտությունը պետք է կարգավորվի փաթեթային, այլ ոչ թե՝ աղավաղված-սուբստանտիվ ճանապարհով, ինչպես Ադրբեջանն է պնդոմ: Իսկ եթե Բաքուն հանդես է գալիս հակամարտության փուլային լուծման օգտին, ապա առաջին փուլում պետք է լինի Լեռնային Ղարաբաղի ճանաչումը, այլ տարբերակ չպետք է քննարկվի»,- ասել է Բաբայանը: Նա ավելացրել է, որ Հոգլանդի առաջարկը հակամարտության կարգավորման տեսական ուղիներից մեկն է, բայց դա չի նշանակում, որ աշխատանքը պետք է կանգնեցվի. գործընթացը կշարունակվի՝ փոխընդունելի լուծում գտնելու նպատակով: 

 

Նշենք, որ երեկ ուշ երեկոյան ԵԱՀԿ Մինսկի խմբի ամերիկացի համանախագահ Ռիչարդ Հոգլանդը /նրա փոխարեն կնշանակվի Միջազգային կազմակերպություններում Միացյալ Նահանգների առաքելության գործերի ժամանակավոր հավատարմատար Էնդրյու Շեֆերը- խմբ./ հրապարակել է Լեռնային Ղարաբաղի հակամարտության կարգավորման հիմնական կետերը:

 

«Հաշվի առնելով Լեռնային Ղարաբաղի բարդ պատմությունը, կողմերը պետք է սահմանեն դրա վերջնական իրավական կարգավիճակը ապագայում՝ փոխադարձ համաձայնությամբ եւ իրավական պարտավորեցնող կամարտահայտմամբ:

 

Նախկին Լեռնային Ղարաբաղի ինքնավար մարզի սահմանների մեջ գտնվող տարածքին, որը Բաքվի կողմից չի վերահսկվում, պետք է ժամանակավոր կարգավիճակ տրվի, որն առնվազն ապահովում է անվտանգության եւ ինքնավարության երաշխիքներ։

 

Լեռնային Ղարաբաղի շուրջ գրավված տարածքները պետք է հանձնվի Ադրբեջանի վերահսկողությանը։ Այնտեղ չի կարող լինել որեւէ բնակեցում՝ առանց հաշվի առնելու Ադրբեջանի ինքնիշխանությունը։ Այդ տարածքների նկատմամբ Ադրբեջանի ինքնիշխանությունը պետք է վերականգնվի:

 

Պետք է լինի միջանցք, որը կմիացնի Հայաստանը Լեռնային Ղարաբաղի հետ: Այն պետք է լինի բավականաչափ լայն՝ անվտանգ փոխադրումների ապահովման համար։ Սակայն այն չի կարող ներառել Լաչինի ամբողջ շրջանը:

 

Հարատեւ կարգավորումը պետք է ճանաչի բոլոր տեղահանված անձանց եւ փախստականների իրավունքը՝ վերադառնալ բնակության նախկին վայր:

 

Կարգավորումը պետք է իր մեջ ներառի անվտանգության միջազգային երաշխիքներ, որոնք կներառեն խաղաղարար միջոցառումներ: Գոյություն չունի սցենար, որում խաղաղությունը կարող է ապահովված լինել առանց լավ նախապատրաստված խաղաղ գործողությունների, որոնք վայելում են բոլոր կողմերի վստահությունը»,- նշել է համանախագահը: