Արմինֆո.ԱՄՆ Կոնգրեսի հայ-ամերիկյան բարեկամության խմբի անդամները ջանքեր են գործադրում 2018 ֆիսկալ տարում Հայաստանին տրամադրվելիք ֆինանսական օգնությունը կրճատելու մասին Թրամփի վարչակազմի որոշման նախագծի չեղարկման ուղիներ գտնելու նպատակով: ԱրմԻնֆո-ին այդ մասին հաղորդել են Ամերկայի հայ ազգային կոմիտեի (ANCA) մամուլի ծառայությունից:
Կոմիտեի գործադիր տնօրեն Արամ Համփարյանը նշել է, որ իրենք ողջունում են վերոհիշյալ որոշումը չեղարկելու նպատակով հայամետ կոնգրեսականների ջանքերի վերսկսումը: «Կոնգրեսի ղեկավարությունը կարևոր դեր է կատարում ֆինանսական օգնության կրճատման վերաբերյալ որոշման նախագիծը հետ կանչելու գործում», - ասել է Համփարյանը:
ANCA-ն նշում է, որ 25-ից ավելի կոնգրեսականներ նամակ են հղել նախագահ Հել Ռոջերսին, որում մտահոգություն են հայտնել Հայաստանին տրամադրվելիք ֆինանսական օգնությունը 67%-ով կրճատելու մասին Թրամփի վարչակազմի որոշման առնչությամբ: Նրանք կոչ են արել վերականգնել ինչպես Հայաստանին, այնպես էլ Արցախին տրամադրվելիք ֆինանսական օգնությունը, նշելով, որ ֆինանսավորումը կրճատելու արդյունքում կարող են տուժել երկրում իրագործվելիք մի շարք ծրագրեր, այդ թվում` կրթության և առողջապահության ոլորտներում:
Նշենք, որ մայիսի 24-ին ԱՄՆ նախագահ Դոնալդ Թրամփի վարչակազմը Կոնգրեսի համար հրապարակել էր 2018 ֆինանսական տարվա իր բյուջետային հանձնարարականները (FY18): Ներկայացվող FY18 բյուջեն առաջարկում է, ընդհանուր առմամբ, 29%-ով, իսկ Եվրոպայի ու Եվրասիայի երկրների համար 60%-ով կրճատել տրամադրվող օգնությունը: Փաստաթղթի համաձայն, FY18-ում Հայաստանին տրամադրվող օգնությունը կրճատվել է 67%-ով` նախորդ ֆինանսական տարվա 20,4 միլիոնից դոլարից մինչև 6,8 մլն դոլար: Վրաստանի և Ուկրաինայի համար նախատեսվում է, համապատասխանաբար 58% և 70%-ով կրճատում: Ադրբեջանին օգնությունը կրճատվել է 90%-ով, և նախատեսվում է այդ երկրին տրամադրել, ընդհանուր առմամբ, 1 մլն դոլար:
Հիշեցնենք, որ 2017 թվականին ԱՄՆ Սենատի հատկացումների կոմիտեն Հայաստանին տրամադրել է 24,1 մլն դոլարի ֆինանսական օգնություն, Ադրբեջանին` 10,9 մլն դոլարի: Սենատը նաև հանձնարարել է 1 մլն դոլար տրամադրել որպես ռազմական օգնություն, ևս 600 հազար դոլար` ռազմական վարժանքների անցկացման համար: Ընդհանուր առմամբ, Հայաստանին հատկացված օգնությունը 3 մլն դոլարով ավելի էր, քան բյուջեից խնդրել էր ԱՄՆ նախագահ Բարաք Օբաման: 1998 թվականից ի վեր Արցախին հատկացվող օգնությունը մնացել է անփոփոխ: Հիշեցնենք, որ 2016 ֆինանսական տարում ԱՄՆ Սենատի հատկացումների կոմիտեն Հայաստանին տրամադրել էր 20.06 մլն դոլար օգնություն, ինչպես նաև 1.7 մլն դոլար` որպես ռազմական օգնություն, ևս 600 հազար դոլար` ռազմական մարզումներ անցկացնելու համար: Ադրբեջանի և Վրաստանի համար ԱՄՆ օրենսդիրներն առաջարկել են, համապատասխանաբար, 8.778 մլն դոլարի և 54 մլն դոլարի օգնություն: