Արմինֆո. Հասարակական կարծիքի ուսումնասիրման համառուսաստանյան կենտրոնը /ВЦИОМ/ ներկայացրել է խորհրդարանական ընտրություններից մեկ շաբաթ առաջ սոցիալ-քաղաքական իրավիճակի վերաբերյալ ՀՀ բնակիչների հարցման տվյալները:
Ինչպես նշվում է ВЦИОМ-ի հաղորդագրության մեջ, ընտրությունների նախաշեմին կարելի է խոսել օրակարգի խիստ քաղաքականացման մասին՝ բնակչության երեք քառորդը (75%) հետևում է ընտրարշավին: Միաժամանակ բարձրացել է անորոշության մակարդակը. հարցման մասնակիցների ավելի քան 40%-ը ընտրություն չի կատարել կամ պատրաստ չէ դրա մասին խոսել:
Խորանում է իրադրության գնահատման կրիտիկականությունը. 85%-ը դժգոհ է երկրում տիրող իրավիճակից, ընդամենը 26%-ն է գտնում, որ Հայաստանը ճիշտ ուղղությամբ է ընթանում: Իշխանություններից հիմնական պահանջը գործազրկության խնդրի լուծումն է: Առաջիկա ընտրություններում ընտրողների մեծ մասն ուղղորդվելու է թեկնածուի անձով (79%), այլ ոչ թե՝ կուսակցական կառույցին պատկանելիությամբ: Մեծամասնության համար կատարյալ թեկնածուն «երիտասարդ ռեֆորմիստն է՝ հարուստ փորձով և բանակցելու ունակությամբ»:
Ընտրությունների նախաշեմին սրվել է առաջատար ուժերի միջև մրցակցությունը՝ «Ծառուկյան» դաշինք (22%) և Հանրապետական կուսակցություն (21%), որոնց վարկանիշները գրեթե հավասարվել են: Սակայն, առաջիկա ընտրություններին Հայաստանի ընտրողները պետք է քվեարկեն ոչ միայն քաղաքական ուժերի, այլ նաև՝ ընտրատարածքի թեկնածուների օգտին: Կուսակցությունների վարկանիշերն ըստ յուրաքանչյուր ընտրատարածքի թեկնածուների ունեցած աջակցության հաշվարկելու դեպքում ՀՀԿ-ն զբաղեցնում է առաջին տեղը: Կշռված տվյալների հիման վրա, երբ կուսակցությունների և դաշինքների վարկանիշները հաշվարկվում են ընտրություններին մասնակցողների և կողմնորշվածների թվից, Հայաստանի հանրապետական կուսակցությունը հավաքում է 44%, իսկ «Ծառուկյան» դաշինքը՝ 36%:
Առաջին հարցումից հետո մեկ ամսվա ընթացքում փոքր կուսակցությունների Ազգային Ժողովում հայտնվելու հնարավորությունները փոխվել են:
Համաձայն նոր տվյալների՝ 5% շեմը հաղթահարում է ՀՅԴ-ն, անցումային շեմի հաղթահարման եզրին են գտնվում (դաշինքների համար շեմը կազմում է 7 %) «Ելք» դաշինքը և «Հայկական Վերածնունդ» կուսակցությունը:
«Ծառուկյանե դաշինքի նախընտրական ներուժը հիմնվում է Գագիկ Ծառուկյանի նկատմամբ վստահության բարձր կայուն մակարդակով (87%): Հայաստանի Հանրապետական կուսակցությանը մեծ աջակցություն է ցուցաբերում կառավարության ղեկավար Կարեն Կարապետյանը (84%), որի վարած գործունեությունը հարցվողների 72%-ը դրական է գնահատում: «Ելք» դաշինքը նույնպես ուժեղ առաջնորդ ունի՝ ի դեմս Նիկոլ Փաշինյանի (59%):
Հասարակական կարծիքի ուսումնասիրման համառուսաստանյան կենտրոնի հարցումն իրականացվել է 2017 թ. մարտի 17-24-ը՝ «Շանթ» հեռուստաընկերության պատվերով:
Նշենք, որ նախօերին իր հարցումն է հրապարակել լատվիական Institute for Marketing and Communication Sciences-ը: Հարցման համաձայն՝ առաջատար է «Ծառուկյան» դաշինքը՝ 40.70%, այնուհետև հաջորդում են՝ Հանրապետական կուսակցությունը 19,40%, «Օհանյան-Րաֆֆի-Օսկանյան» դաշինքը՝ 8,70%, «Ելք» դաշինքը՝ 4,10%, «Հայկական վերածնունդը»՝ 3,90%, ՀՅԴ-ն՝ 3,79%, «ՀԱԿ-ՀԺԿ»-3,15, «Ազատ դեմոկրատները»՝ 1.70%:
Նշենք,որ Gallup International Association-ի հարցման համաձայն, Հանրապետական կուսակցությունն առաջատար է՝ 29,4%-ով, այնուհետև հաջորդում են «Ծառուկյան» դաշինքը՝ 28,2 %, «Ելք» դաշինքը՝ 6.1%, ՀՅԴ-ն՝ 4,8%, «Ազատ դեմոկրատները»՝ 4,4%, «Հայկական վերածնունդը»՝ 3,4%, «ՀԱԿ-ՀԺԿ»-ն՝ 2,9%, «Օհանյան-Րաֆֆի-Օսկանյան» դաշինքը ՝ 2,5% և Կոմունիստական կուսակցությունը՝ 1,2%: