Հայացք Վաշինգտոնից. Ղարաբաղյան հակամարտության չլուծվածությունը պայմանավորված է հասարակ մարդկանց շահերի հետ Հայաստանի և Ադրբեջանի առաջնորդների շահերի հակասականությամբ

Արմինֆո. Ղարաբաղյան հակամարտության չլուծվածությունը պայմանավորված է Հայաստանի և Ադրբեջանի առաջնորդների կողմից սեփական շահերի պաշտպանությամբ, որոնք հակասում են հասարակ մարդկանց շահերին, ԱրմԻնֆո-ին այդպիսի կարծիք է հայտնել Գլոբալ շահերի կենտրոնի /Վաշինգտոն/ հիմնադիր և նախագահ Նիկոլայ Զլոբինը:

«Այս առումով ղարաբաղյան հակամարտության չկարգավորվածության պատճառը մարդկային ընտրության գաղափարի քաղաքական ձևակերպման բացակայությունն է: Այն բանի, ինչ ցանկանում են մարդիկ, այլ ոչ թե՝ իշխանությունները: Կարծում եմ՝ ժողովուրդների ինքնորոշումը, անշուշտ, գերակշռում է ցանկացած երկրի ինքնիշխանության և տարածքային ամբողջականության նկատմամբ: Լինելով լիբերալ՝ համոզված եմ, որ մարդիկ պետությունից ավելի կարևոր են, և եթե այդ մարդիկ ուզում են ապրել այնպես, ինչպես իրենք են ցանկանում, ոչ ոք չպետք է նրանց խանգարի, լինի դա Ղրիմում կամ Ղարաբաղում»,- ընդգծել է նա:

Այդպիսով, Զլոբինի կարծիքով, խմդիրն առաջին հերթին ոչ թե Ռուսաստանի կողմից Ադրբեջանին մատակարարվող զենքի, այլ՝ Ղարաբաղի շուրջ ստեղծված փակուղուց ելքի ինտելեկտուալ գաղափարի բացակայության մեջ է: Նշելով զենքի համաշխարհային շուկայի բացությունը՝ քաղաքագետը հայտարարել է, որ Ղարաբաղի հարցում Բաքվի և Երևանի միջև փոխըմբռնման բացակայության առաջնահերթ պատճառը հաստատ ռուսական զենքի մատակարարումները չեն:

«Հակամարտության թեժացումը կտրականապես հակասում է Ռուսաստանի շահերին: Մոսկվային ուղղակի ձեռնտու չէ ևս մեկ թեժ օջախ՝ այս անգամ հարավային սահմաններին: Այստեղ չեմ կարող չնշել Մոսկվայի կողմից ռուսական սպառազինությունների գնորդների և վերջնական հասցեատերերի որոշման հարցում որոշակի զգուշավորություն դրսևորելու նպատակահարմարությունը»,- ամփոփել է քաղաքագեը: