Արմինֆո.«Ելք» դաշինքի մաքսիմում ծրագիրը իշխանափոխությունն է, մինիմումը` դառնալ հակակշիռ 6-րդ գումարման խորհրդարանում: Լրագրողների հետ զրույցում այդ մասին հայտարարել է դաշինքի համամասնական ցուցակը գլխավորող Էդմոն Մարուքյանը, ով նաև «Լուսավոր Հայաստան» կուսակցության առաջնորդն է:
Նա նշել է, որ հետևելով «Օհանյան-Րաֆֆի-Օսկանյան» և «Ծառուկյան» դաշինքների անդամների ելույթներին, չի նկատել նրանց ընդդիմադիր մտադրություններ կամ առաջիկա խորհրդարանական ընտրություններում համագործակցության հնարավորություն քննարկելու ծրագրեր: «Նրանք պետք է ցույց տան, թե ինչով են տարբերվում կառավարող ՀՀԿ-ից, որպեսզի հասարակությունը և մյուս քաղաքական ուժերը դա տեսնեն: Տվյալ փուլում ես այդ տարբերությունները չեմ տեսնում», - նշել է Մարուքյանը: Նա նաև տարօրինակ է համարել 2008 թվականի մարտի 1-ի իրադարձությունները հետաքննելու անհրաժեշտության վերաբերյալ նախկին նախարարներ Սեյրան Օհանյանի և Վարդան Օսկանյանի ելույթները: «Այդ մասին խոսում են անձինք, ովքեր անմիջական առնչություն են ունեցել այդ իրադարձություններին: Ես ոչ մի ընդդիմադիր հայտարարություն չեմ լսել, թող ներկայացնեն ծրագիր, և մենք կորոշենք, թե արդյոք նրանց դիրքորոշումը մերին համահունչ է», - ընդգծել է Մարուքյանը:
«Քաղաքացիական պայմանագիր» կուսակցության ղեկավար Նիկոլ Փաշինյանն իր հերթին կարծում է, որ «Օհանյան-Րաֆֆի-Օսկանյան» և «Ծառուկյան» դաշինքները շատ բան պետք է ապացուցեն: «Նրանց քաղաքական կողմնորոշումն ու նպատակներն անհասկանալի են: Խոսելով համագործակցության մասին` անհրաժեշտ է հաշվի առնել շփման կետերը: Կարծում եմ, որ առաջին իսկ հնարավորության դեպքում այդ դաշինքները կսկսեն համագործակցել ՀՀԿ-ի հետ», - ընդգծել է քաղաքական գործիչը: Նրա համար նույնպես համոզիչ չեն մարի 1-ի իրադարձությունները հետաքննելու և քաղբանտարկյալների առկայության մասին Օհանյանի և Օսկանյանի հայտարարությունները: «Նման հայտարարությամբ կարող է հանդես գալ նաև նախկին վարչապետ Հովիկ Աբրահամյանը. դա ոչինչ չի նշանակում: Մեզ համար այդ հարցերը գործունեւթյան հիմք են, այլ ոչ թե այսրոպեական հայտարարություններ: Օսկանյանը 10 տարի շարունակ արտաքին աշխարհում արդարացնում էր երկրում քաղբանտարկյալների առկայությունը: Նա երկրորդ նախագահ Ռոբերտ Քոչարյանի Ռիբենտրոպն էր (Գերմանիայի արտգործնախարարը 1938-1945թթ.): Նրան փորձում են արդարացնել այն բանով, որ եղել է արտաքին գործերի նախարար: Եթե այդպես է, ապա Ռիբենտրոպին չէին դատի Նյուրնբերգյան դատարանում», - ընդգծել է Փաշինյանը: Ընդ որում, քաղքական գործիչը նշել է, որ Ծառուկյանը քաղաքական դաշտից փախավ ամենապատասխանատու պահին, երբ հասարակությունը և քաղաքական ուժերը պատրաստ էին իշխանափոխության: «Հիմա մենք պետք է ունենանք երաշխիքներ, որ նման իրավիճակներում փախչողներ չեն լինի», - ընդգծել է նա:
«Հանրապետություն» կուսակցության առաջնորդ Արամ Սարգսյանը հայտարարել է, որ դաշինքի նպատակն է ստանալ առավելագույն ձայներ և պահնել դրանք: Նա կարծում է, որ տվյալ դաշինքների հետ «Ելքի» համագործակցությանը կարող են խանգարել նաև արտաքին քաղաքականության հարցերի նկատմամբ քաղաքական միավորների դիրքորոշումները: «Օհանյանը հանդես է եկել ռուսական ռազմակայանի տեղակայման ժամկետների երկարաձգման օգտին, Օսկանյանը ողջունել է գույք պարտքի դիմաց ծրագիրը, երբեք հանդես չի եկել ազատ տնտեսության օգտին, երբ Քոչարյանը հայտարարում էր կազմակերպված տնտեսության մասին և այլն», - ընդգծել է կուսակցության ղեկավարը: Նա նշել է, որ ներկայիս սահմանդրությունը, որի հակառակորդն է ինքը, մեծացնում է խորհրդարանի դերը, հետևաբար, այս անգամ մտադիր չէ հրաժարվել մանդատից, ինչպես երկու անգամ արել է նախկինում: