Արմինֆո.Հայաստանի արդարադատության նախարար Արփինե Հովհաննիսյանը չի կիսում ԱՄՆ դեսպան Ռիչարդ Միլսի օրերս հնչեցրած գնահատականը, որ Կոռուպցիայի դեմ պայքարի խորհուրդն առաջընթաց չի ունեցել: Այդ մասին նախարարը հայտարարել է` ի պատասխան ԱրմԻնֆո-ի հարցմանը:
«Չեմ կարծում, որ արդարացված է չնկատելը, որ մի շարք կարևոր օրինագծեր, որոնք ընդունվել են Ազգային ժողովի կողմից՝ խորհրդարանական բոլոր ուժերի միաձայն քվեարկության արդյունքում, ըստ էության Հակակոռուպցիոն խորհրդում են քննարկվել, հանձնարարականները հնչել են հենց այդ խորհրդում և դրա գործունեության արդյունքում են ծնվել և իրողություն դարձել», - հայտարարել է նախարարը:
Ըստ Արփինե Հովհաննիսյանի՝ սա վառ ապացուցում է, որ ՀՀ իշխանությունները քաղաքական կամք ունեն և Կառավարությունն այդ քաղաքական կամքը դրսևորում է: «Ուղերձը հստակ է և դրանք այն քայլերն են, որոնք մենք կատարում ենք: Չեմ կարծում, որ դրա վերաբերյալ պետք է մամուլի ասուլիս հրավիրվի և հատուկ ուղերձ հղվի: Եվ շատ մտահոգություններ, որոնք դեսպանն իր խոսքում բարձրաձայնել է, դրանց լուծումներն արդեն իրականություն են, այդ մասին մենք բարձրաձայնել ենք, քայլերն էլ՝ ձեռնարկել: Ընդ որում, հարկ եմ համարում նշել, որ մենք գնացել ենք հենց այն ճանապարհով, որ չսպասեն, մինչև մարդուն բռնեն կաշառք ստանալու պահին կամ լավություն անելիս»,- ասել է նախարարը: Արփինե Հովհաննիսյանը հիշեցրել է, որ ապօրինի հարստացման քրեականացումը հենց այդ նպատակն է հետապնդում, որ եթե հայտարարագրերի վերլուծությունից հետո ակնհայտ է դառնում, որ տվյալ անձի օրինական եկամուտը որևէ առնչություն չունի այն գույքի հետ, որն ինքը հայտարարագրել է կամ նույնիսկ չի հայտարարագրել, նա պետք է ենթարկվի քրեական պատասխանատվության: Եվ դա բավարար է, որպեսզի վարույթն իրականացնող մարմինը, ողջամիտ կասկածների առկայության դեպքում, գործընթաց սկսի: «Սա նշանակում է, որ իրավասու մարմիններին մենք տվել ենք բավարար գործիքակազմ, այդ հայտարարագրերի վերլուծության հիման վրա կատարելու կոռուպցիայի դեմ քայլեր: Բայց մենք համարում ենք, որ դա էլ բավարար չէ և հավելյալ քայլեր ենք արել, օրինակ, մշակել կանխիկ գործառնությունների սահմանափակումը նախատեսող օրենսդրական փաթեթ: Ի դեպ, ԱԺ գլխադասային հանձնաժողովը այսօր դրական եզրակացություն տվեց երկրորդ ընթերցմամբ օրակարգ ներառել հայտարարագրերի թերի, կեղծ կամ սխալ ներկայացման դեպքում պաշտոնատար անձանց վարչական կամ քրեական պատասխանատվության ենթարկելու վերաբերյալ օրենսդրական նախագիծը»,- նշել է նա:
Հաջորդ քայլը, շարունակել է Հովհաննիսյանը, որ Կոռուպցիայի դեմ պայքարի խորհուրդը քննարկել և դրական եզրակացություն էր տվել, վերաբերում է հայտարարագիր ներկայացնող անձանց շրջանակի ընդլայնմանը, փոխկապակցված անձանց շրջանակի ընդլայնմանը: Ինչ վերաբերում է դեսպանի կողմից հիշատակված անկախ հակակոռուպցիոն մարմնի ստեղծմանը, ապա նախարարը նշել է, որ ՀՀ նախագահի կարգադրությամբ ստեղծված է աշխատանքային խումբ, որը ավարտին է հասցնում աշխատանքները և ներկայացնելու է իր տարբերակը՝ երկրում անկախ հակակոռուպցիոն մարմին ունենալու, Էթիկայի հանձնաժողովի հենքի վրա իր որոշումների մեջ անկախ, լայն լիազորություններ և գործիքակազմ ունեցող մարմին ստեղծելու մասին, որը կկարողանա ձեռնարկել այն միջոցները, որոնք բավարար են իր հայտնաբերած ցանկացած թերությանը համարժեք արձագանք տալու համար: «Հուսով եմ ՝ ամբողջությամբ փարատեցի դեսպանի մտահոգությունները և վստահ եմ, որ մեր Կառավարության ծրագրում ամրագրված բոլոր քայլերը, որոնք վերաբերում են հակակոռուպցիոն քաղաքականությանը, իրականում համապատասխանում են ինչպես Եվրամիության, այնպես էլ, վստահ եմ, ԱՄՆ դեսպանի կամ այլ գործընկերների սահմանած առաջնահերթություններին»,- ամփոփել է Արփինե Հովհաննիսյանը:
Սակայն նշենք, որ իր մամուլի ասուլիսում ԱՄՆ դեսպան Ռիչարդ Միլսը բարձրաձայնել էր ոչ միայն կոռուպցիային, այլև մարդու իրավունքներին առնչվող խնդրնրի մասին: Ի դեպ, ՀՀ մարդու իրավունքների պաշտպան Արման Թաթոյանը համաձայնել է դեսպանի նշած փաստարկներին: Միլսը, մասնավորապես, հայտարարել էր, որ վեջին 15 ամիսների ընթացքում Հայաստանում ԱՄՆ դեսպանությունն անհանգստության տեղիք տվող միտումների է ականատես եղել ժողովրդավարական հաստատությունների, մարդու իրավունքների ու քաղաքացիական հասարակության ամրապնդման ոլորտում: «Մեզ համար խորապես մտահոգիչ էին հուլիսի 29-30-ին անզեն ցուցարարների ու լրագրողների նկատմամբ ոստիկանության կողմից ուժի անհամաչափ կիրառման մասին վստահելի հաղորդումները», - նշել էր Միլսը: ԱՄՆ դեսպանը մտահոգիչ էր համարել նաև մեկ այլ խնդիր` նախնական կալանքի օգտագործումը կառավարության կողմից: «Նախնական կալանքն օգտագործվում է աշխարհի շատ երկրների, այդ թվում ԱՄՆ-ի իրավական համակարգում, սակայն դա պետք է կիրառվի որպես ծայրահեղ միջոց, երբ սպառված են բոլոր այլընտրանքային միջոցները, որոնք կարող են ապահովել, որ կասկածյալը փախուստի չդիմի և չմիջամտի քննության ընթացքին: Այն երբեք չպիտի գործածվի որպես ազատ խոսքի ու հանրահավաքների ազատության իրավունքի իրացումից քաղաքացիներին հետ պահելու պատժիչ գործիք, իսկ երբ դատարանը սահմանում է նախնական կալանք, պետք է լիովին թափանցիկ ու իրավականորեն հիմնավորված պատճառներ լինեն», - ընդգծել էր դեսպան Միլսը: Դիվանագետը նշել էր, որ 2015թ. դեկտեմբերի սահմանադրական հանրաքվեի հետ կապված դեսպանատունը խորապես մտահոգ էր ընտրակեղծիքների մասին անկախ դիտորդների, լրատվամիջոցների ու քաղաքացիական հասարակության արժանահավատ հաղորդումներով: «Վերջերս մենք լսում ենք լրատվամիջոցների ու քաղաքացիական հասարակության վրա ճնշումները մեծացնելու մասին ակնարկներ, որոնք, կարծես թե, միտված են ազատ արտահայտվելու իրավունքի սահմանափակմանը և գարնանը կայանալիք խորհրդարանական ընտրություններին ընդառաջ լրատվամիջոցներում քննադատական դիրքորոշումները մեղմելուն», - ասել էր Միլսը: Բացի այդ, նա վերստին բարձրացրել էր «Հայաստանի ազգային անվտանգության ապահովման հարցերում կոռուպցիայի կործանարար ներգործության» հարցը: