Ուրբաթ, 18 Նոյեմբերի 2016 18:18

Արմինֆո. Հայաստանի հանրապետական կուսակցության խմբակցության ղեկավար Վահրամ Բաղդասարյանը չի բացառում զինծառայողների կյանքին կամ առողջությանը պատճառված վնասների հատուցման հիմնադրամին 1000 դրամ վճարի պարտադիր բաղադրիչի վերանայման հնարավորությունը: Այդ մասին նա հայտարարել է խորհրդարանում ճեպազրույցի ժամանակ:

Բաղդասարյանն ավելացրել է նաև, որ պարտադիր վճարի սկզբունքը քննարկումների առարկա է, և այն կարելի է վերանայել: «Կա նման առաջարկ, և այն քննարկվում է»,- հայտարարել է նա: 

ՀԱԿ խմբակցության անդամ Արամ Մանուկյանը հայտարարել է, որ չի հասկանում կառավարող կուսակցության տրամաբանությունը, որը ոչ միայն պայքարել է պարտադիր բաղադրիչի պահպանման համար, այլև՝ հավանության արժանացրել համապատասխան օրինագիծը: Ըստ որում, նա հավելել է, որ ցանկության դեպքում կարելի է այդ հիմնադրամի ֆինանսավորման այլ տարբերակներ գտնել: Ընդդիմադիր գործիչը համոզմունք է հայտնել, որ կամավոր հիմունքով քաղաքացիները շատ անգամ ավելի միջոցներ կվճարեին: 

Նշենք, որ ՀՀ խորհրդարանն առաջին ընթերցմամբ քննարկել է «ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» եւ կից օրինագծերի փաթեթը, որով առաջարկվում է հատուցման գումարներ վճարել այն զինծառայողներին, ովքեր մահացել կամ հաշմանդամություն են ստացել մարտական գործողություններին մասնակցելու կամ հակառակորդի հետ շփման գծում մարտական հերթապահության կամ հատուկ առաջադրանք կատարելու ժամանակ: Հատուցման գումարների վճարումն իրականացնելու եւ հավաքագրված դրամական միջոցները կառավարելու նպատակով առաջարկվում է ստեղծել հատուկ կառույց՝ զինծառայողների կյանքին կամ առողջությանը պատճառված վնասների հատուցման հիմնադրամ, որի դրամական միջոցները կձեւավորվեն յուրաքանչյուր աշխատող ֆիզիկական անձի կողմից ամսական 1000 դրամ գումարի չափով վճարվող դրոշմանիշային վճարներից, հատուկ այդ նպատակով թողարկված արժեթղթերի վաճառքից, հատուկ այդ նպատակով ստացված դրամաշնորհներից, նվիրաբերություններից եւ նվիրատվություններից: Նախատեսվում է, որ սպայի, ենթասպայի կամ շարքային զինծառայողին մահվան կամ առաջին կարգի հաշմանդամության դեպքում նրա ընտանիքին կամ նրան միանվագ կհատկացվի 10 մլն դրամ, սպային ամսական կհատկացվի համապատասխանաբար 300 հազար դրամ, ենթասպային՝ 250 հազար դրամ, շարքային զինծառայողին՝ 200 հազար դրամ: Երկրորդ կարգի հաշմանդամության դեպքում սպային կհատկացվի միանվագ 5 մլն դրամ, ամսական հատուցում 20 տարվա ընթացքում՝ 200 հազար դրամ, ենթասպային՝ 5 մլն դրամ միանվագ եւ ամսական 150 հազար դրամ, շարքային զինծառայողին՝ 5 մլն դրամ միանվագ եւ ամսական 100 հազար դրամ: Բոլոր դեպքերում, եթե զինծառայողն ունի 3 կամ ավելի երեխա, ապա, ի լրումն վերոնշյալ գումարների, նրա ընտանիքին յուրաքանչյուր ամիս կվճարվի եւս 100 հազար դրամ: Նախարար Վիգեն Սարգսյանը վստահեցրել է, որ համակարգի կառավարման հետ կապված ծախսերը պետք է հասցվեն նվազագույնի, որպեսզի հավաքագրված միջոցները հասնեն շահառուներին, գործընթացը լինի պարզ եւ թափանցիկ, որպեսզի այն արժանանա հանրության վստահությանը: Նախատեսվում է, որ հատուցման գումարները կվճարվեն 2017 թվականի հունվարի 28-ից հետո տեղի ունեցող հատուցման դեպքերի համար: Պարոն Սարգսյանը տեղեկացրել է, որ 1000-ական դրամ վճարից կազատվեն այն քաղաքացիները, ովքեր ընտանիքում ունեն հաշմանդամ կամ զոհված զինծառայողներ: Բացի այդ, վճարից կազատվեն նաեւ այն ընտանիքները, որոնք ունեն ժամկետային զինծառայողներ, վստահեցրել է Վիգեն Սարգսյանը: Նախարարն ընդգծել է, որ նախագիծն առնչվում է երկրի պաշտպանական քաղաքականությանը, ոչ թե սոցիալական ոլորտին: Նա նշել է, որ օրենքի նախագիծը մշակելիս մանրակրկիտ ուսումնասիրվել է նախադեպային սահմանադրական իրավունքը եւ անդրադարձ է կատարվել ՍԴ համապատասխան որոշմանը: Սարգսյանը հավելել է, որ հիմնադրամը թիրախային է, որեւէ այլ ծրագրի համար այս հիմնադրամից միջոցներ օգտագործվել չեն կարող: Խոսելով հոգաբարձուների խորհրդի կառուցվածքի մասին՝ նա տեղեկացրել է, որ այն բաղկացած կլինի 9 անդամից, որոնցից 3-ը կնշանակվեն ՀՀ կառավարության, 3-ը Կենտրոնական բանկի կողմից, եւս 3 անդամներ էլ կներկայացնեն քաղաքացիական հասարակությունը: