ԱԺ ՀԱԿ խմբակցության պատգամավոր, Հայաստանի նախկին
վարչապետ Հրանտ Բագրատյանը facebook-ի իր էջում գրառում է
կատարել պարտադիր կուտակային
կենսաթոշակային համակարգի վերաբերյալ:
Ինչպես նշել է Բագրատյանը, դեռեւս ՀԱԿ-ում հարկ եղել վերլուծել եւ վեր հանել պարտադիր կուտակայինի հայկական տարբերակի թերությունները։ «Հետագայում, ԱԺ-ում, քայլ առ քայլ վեր հանվեցին ստերը. գործի մեջ դրված տարբերակը որեւէ լուրջ աղերս չունի ռուսական, էստոնական ու չիլիական տարբերակների հետ (սա էլ վերջերս պարզ դարձավ)։ Ուրախ եմ, որ այդ աշխատանքի շնորհիվ է նաեւ, որ հասարակությունը հասկացել է, թե ինչ այլանդակ բան է իր վզին փաթաթել կառավարությունը։ Սահմանադրական դատարանը, կարծում եմ, չեղյալ է հայտարարելու այս «ռեֆորմը»։ Այնքան ճչացող է հիմարությունը։ Բայց ափսոս է այս հիմարությունը։ Բանն այն է, որ շանս կա Գինեսի ռեկորդի։ Այսպես, այս օրենքով 18-ամյա քաղաքացին 45 տարով դեպոզիտ է դնում։ Սա ռեկորդ է։ Երեկ քրքրել եմ ինտերնետը՝ 30 տարվանից ավել դեպոզիտ չկա։ Իսկ գուցե կա՞։ Խնդրում եմ մի հատ էլ դուք նայեք։ Գինեսի ռեկորդը ձեռքներիցս բաց չթողնենք», - հայտարարել է պատգամավորը: