Ուրբաթ, 22 Հոկտեմբերի 2021 17:43

Արմինֆո. Հայաստանի Մարդու իրավունքների պաշտպան Արման Թաթոյանի եւ Պաշտպանության նախարարության միջեւ առճակատումը նոր թափ է հավաքում։

 

ՀՀ պաշտպանության նախարարությունը հանդես է եկել նոր հայտարարությամբ' ի պատասխան Թաթոյանի այսօրվա հրապարակման, որում վերջինը ՊՆ պաշտոնյաներին կոչ է արել  անհեռատես և չմտածված հայտարարություններ չանել իր գործունեության վերաբերյալ' դրանով իսկ պարարտ հող տալով ադրբեջանական քարոզչամեքենային ' վարկաբեկելու իր գործունեությունը միջազգային հարթակներում: Ընդ որում, մարդու իրավունքների պաշտպանը եւս մեկ անգամ ընդգծել է, որ ինքը երբեք մերկապարանոց եւ չճշտված հայտարարություններ չի անում ՝ մշտապես ամրապնդելով դրանք փաստական ապացույցներով, որոնք ստանում է իր գրասենյակը փաստահավաք գործունեության ժամանակ: Նրա խոսքով, դա վերաբերում է նաեւ հոկտեմբերի 18-ի իր հաղորդագրությանն այն մասին, որ դեռեւս մայիսի 13-ին ՀՀ ինքնիշխան տարածք ներխուժած Ադրբեջանի զինված ուժերը նախապատրաստվում են ձմռանը, իրականացնում են ամրաշինական աշխատանքներ, բետոնապատում են ճանապարհները, փայտ են մթերում: "ՀՀ պաշտպանության նախարարության կողմից իմ այս հայտարարությունից հետո, փաստորեն, ծավալվել է մարդու իրավունքների պաշտպանի գործունեության վարկաբեկման արշավ, որին միացել է Անվտանգության խորհրդի քարտուղարը", - նշել է Թաթոյանը:

 

Ի պատասխան՝ Պաշտպանության նախարարության մամուլի ծառայությունը տարածել է հայտարարություն, որում ասվում է. «Հոկտեմբերի 21-ին ՀՀ մարդու իրավունքների պաշտպանի կողմից արված հայտարարության առնչությամբ ՀՀ պաշտպանության նախարարությունը վերահաստատում է իր պնդումը, որ հոկտեմբերի 18-ի ՄԻՊ գրառման մեջ առկա են մի շարք կոպիտ անճշտություններ, ինչպես նաև իրականությանը ակնհայտորեն չհամապատասխանող տվյալներ՝ կապված ադրբեջանական ԶՈՒ կողմից Գեղարքունիքի մարզի որոշ հատվածներ ներթափանցման տարածքներում իրականացվող ամրաշինական աշխատանքների հետ։ Հավելենք, որ խնդրի շուրջ այսօր կայացած հեռախոսազրույցում Մարդու իրավունքների պաշտպանը, ի պատասխան պաշտպանության նախարարի հարցադրմանը, թե Հայաստանի Հանրապետության ո՞ր տարածքում են իրականացվում իր կողմից ներկայացված լուսանկարներում պատկերված աշխատանքները, նշել է, որ դրանք առավելապես իրականացվում են ոչ թե Հայաստանի տարածքներում, այլ դրանց «հարևանությամբ»։ ՀՀ պաշտպանության նախարարությունը ՄԻՊ գրասենյակին կոչ է անում ձեռնպահ մնալ չճշտված տեղեկություններ տարածելու մոտեցումից»։

 

Նկատենք, որ Մարդու իրավունքների պաշտպանի գրասենյակն այն ինստիտուտն է, որն առավել մեծ վստահություն է վայելում հայ հասարակության շրջանում։ Ադրբեջանաթուրքական տանդեմի կողմից Արցախի դեմ սանձազերծված պատերազմի բոլոր 44 օրերի ընթացքում հենց ՄԻՊ գրասենյակն էր մոբիլիզացրել բոլոր ռեսուրսները՝ ինչպես խաղաղ բնակիչների, այնպես էլ զինվորականների իրավունքները պաշտպանելու համար։ Թաթոյանի գրասենյակը շարունակում է բոլոր հնարավոր հարթակներում բարձրաձայնել հայ ռազմագերիների եւ քաղաքացիական անձանց խնդիրը: Նա նաեւ ահազանգում է հայ զինծառայողների եւ քաղաքացիական անձանց նկատմամբ Ադրբեջանի զինված ուժերի ռազմական հանցագործությունների մասին: Այդ առնչությամբ մի շարք զեկույցներ են պատրաստվել։ Թաթոյանը նաեւ շարունակում է առաջ մղել Ադրբեջանի հետ սահմանին անվտանգության գոտի ստեղծելու գաղափարը՝ Ադրբեջանի ԶՈՒ հետ քաշելով սահմանամերձ բնակավայրերից:  Մարդու իրավունքների պաշտպանը բազմիցս ընդգծել է նաև ԱՀ զինված ուժերի ներկայության անօրինականությունը ՀՀ ինքնիշխան տարածքներում՝ արխիվային քարտեզներով հիմնավորելով տարածքների պատկանելությունը։ Այլեւս ոչ ոքի համար գաղտնիք չէ, որ Հայաստանի ինքնիշխան տարածք ներխուժած Ադրբեջանի զինված ուժերը վերջին ամիսների ընթացքում ահաբեկել են ՀՀ սահմանամերձ բնակիչներին, առեւանգել են անասուններ, գնդակոծել նրանց տները, զրկել արոտավայրերից։

Այս պայմաններում անհասկանալի է Հայաստանի պաշտպանական գերատեսչության պահվածքը, որն իրեն վարկաբեկել է հայ հասարակության աչքում՝ ղարաբաղյան հակամարտության գոտում մարտական գործողությունների ողջ ընթացքում ոչ հավաստի տեղեկատվություն տրամադրելուց հետո։ Ավելին, նման պայմաններում տրամաբանական հարց է առաջանում, թե տվյալ իրավիճակում ում շահերն է սպասարկում Հայաստանի պաշտպանական գերատեսչությունը։ Ինչու՞ Հայաստանի քաղաքացիների իրավունքների պաշտպանությունն ապահովելու ջանքերը համախմբելու, բոլոր հարցերում միասնական գործելու եւ դրանով իսկ աշխատանքի արդյունավետությունը բարձրացնելու փոխարեն՝ այն հանկարծ սկսել է զբաղվել մարդու իրավունքների պաշտպանի գործունեությունը սեւացնելով։ Եվ ուզում ենք հավատալ, որ ստեղծված իրավիճակում կողմերը խոհեմություն կդրսևորեն, դասեր կքաղեն պատմությունից և համատեղ կզբաղվեն Հայաստանի Հանրապետության և նրա քաղաքացիների շահերի պաշտպանությամբ՝ փոխանակ "հակառակորդի ջրաղացին ջուր լցնելը" հայ հասարակության վերջնական բաժանման ուղղությամբ։